FILM
ಡ್ರಗ್ಸ್‌ ಮಾಫಿಯಾದಲ್ಲಿ ಸಂಜನಾ ಗಲ್ರಾನಿ ಹೆಸರು! ಸಿಸಿಬಿ ಮುಂದೆ ಸಂಜನಾ ರಂಪಾಟ
ಬೆಂಗಳೂರು: ದಿನದಿಂದ ದಿನಕ್ಕೆ ಮಾದಕ ವಸ್ತು ಜಾಲದ ಬಗ್ಗೆ ಹೊಸ ಹೊಸ ಸತ್ಯ ಬಯಲಾಗುತ್ತಿದೆ. ಸಿಕ್ಕ ಪ್ರಾಥಮಿಕ ಮಾಹಿತಿಗಳನ್ನು ಆಧರಿಸಿ ಸಿಸಿಬಿ ಪೊಲೀಸರು ದಾಳಿ ನಡೆಸುತ್ತಿದ್ದಾರೆ. ಮೊದಲು ಕೆಲವು ಪೆಡ್ಲರ್‌ಗಳನ್ನು ವಶಕ್ಕೆ ಪಡೆದುಕೊಂಡಿದ್ದ ಪೊಲೀಸರಿಗೆ ಸೂಕ್ತ ಸುಳಿವು ಸಿಕ್ಕಿದೆ. ಅದನ್ನು ಹಿಂಬಾಲಿಸಿ ಹೊರಟರೆ ಕಾಣಿಸಿಕೊಂಡಿದ್ದು ಸೆಲೆಬ್ರಿಟಿಗಳ ಹೆಸರು ಎಂಬುದು ಅಚ್ಚರಿ!
ಸಂಜನಾ ಗಲ್ರಾನಿ ಅವರ ಆಪ್ತ ರಾಹುಲ್ ಎಂಬಾತನನ್ನು ಸಿಸಿಬಿ ಅಧಿಕಾರಿಗಳು ವಶಕ್ಕೆ ಪಡೆದ ದಿನದಿಂದಲೇ ಸಂಜನಾ ಕೂಗಾಡಲು ಶುರು ಮಾಡಿದ್ದರು. ಅಷ್ಟೇ ಅಲ್ಲ, ತಮ್ಮ ಮನೆ ಮೇಲೆ ದಾಳಿ ನಡೆದ ಸಂದರ್ಭದಲ್ಲೂ ಅಧಿಕಾರಿಗಳ ಜೊತೆ ಅವರು ರಂಪಾಟ ಮಾಡಿದರು ಎಂಬ ಮಾಹಿತಿ ಕೇಳಿಬಂದಿದೆ. ಈವರೆಗೂ ಸಂಜನಾ ಮಾಡಿದ ಕಿರಿಕ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ.
ನಟಿ ಸಂಜನಾ ಈ ಪ್ರಕರಣದಲ್ಲಿ ಸಿಕ್ಕಿ ಹಾಕಿಕೊಳ್ಳಲು ಮೊದಲ ಕಾರಣ ಆಗಿದ್ದೇ ಅವರ ಆಪ್ತ ರಾಹುಲ್. ಕೆಲವೇ ದಿನಗಳ ಹಿಂದೆ ರಾಹುಲ್‌ನನ್ನು ಅಧಿಕಾರಿಗಳು ವಶಕ್ಕೆ ಪಡೆದಾಗ ಸಂಜನಾ ಮೇಲೆ ಸಹಜವಾಗಿಯೇ ಅನುಮಾನದ ಕಣ್ಣುಗಳು ಬೀಳಲು ಆರಂಭ ಆದವು. ಆದರೆ ಈ ಬಗ್ಗೆ ಪ್ರಶ್ನಿಸಿದರೆ ಸಂಜನಾ ಏಕಾಏಕಿ ಗರಂ ಆಗುತ್ತಿದ್ದರು. ಮೊದಲಿಗೆ ರಾಹುಲ್ ನನಗೆ ಗೊತ್ತೇ ಇಲ್ಲ ಎಂದು ಹೇಳಿದ ಅವರು ನಂತರ ‘ನನಗೆ ಆತ ರಾಖಿ ಬ್ರದರ್‌’ ಎಂದು ಹೇಳಿದ್ದರು. ಅಷ್ಟೇ ಅಲ್ಲದೆ, ‘ಅವನು ತುಂಬ ಒಳ್ಳೆಯವನು. ಯಾವುದೋ ಹುಡುಗಾಟದಲ್ಲಿ ಹೀಗೆ ಆಗಿರಬಹುದು’ ಎಂದಿದ್ದರು ಸಂಜನಾ. ಆದರೆ ಆತನ ಜೊತೆಗೆ ತಮಗೆ ಇರುವ ಒಡನಾಟದ ಬಗ್ಗೆ ಪ್ರಶ್ನೆ ಬಂದಾಗ ಸಂಜನಾ ಗರಂ ಆಗಿದ್ದರು.
ಖಚಿತ ಮಾಹಿತಿ ಆಧರಿಸಿ ಮಂಗಳವಾರ (ಸೆ.8) ಸಿಸಿಬಿ ಅಧಿಕಾರಿಗಳು ಸಂಜನಾ ಗ್ರಲಾನಿ ಮನೆ ಮೇಲೆ ದಾಳಿ ಮಾಡಿದ್ದಾರೆ. ಮೂರು ವಾಹನಗಳಲ್ಲಿ ಬಂದ ಆರಕ್ಕೂ ಹೆಚ್ಚು ಅಧಿಕಾರಿಗಳು ಮುಂಜಾನೆಯೇ ಸಂಜನಾಗೆ ಶಾಕ್‌ ನೀಡಿದ್ದಾರೆ. ಇಂದಿರಾ ನಗರದಲ್ಲಿ ಇರುವ ಅವರ ಫ್ಲಾಟ್‌ಗೆ ಬಂದ ಅಧಿಕಾರಿಗಳಿಗೆ ಸಂಜನಾ ಆರಂಭದಲ್ಲಿ ಸರಿಯಾಗಿ ಸ್ಪಂದಿಸಲಿಲ್ಲ ಎನ್ನಲಾಗುತ್ತಿದೆ. ತಾಯಿಯ ಅನಾರೋಗ್ಯದ ನೆಪ ಹೇಳಿ ತಪ್ಪಿಸಿಕೊಳ್ಳುವ ಪ್ರಯತ್ನ ಮಾಡಿದರು ಎನ್ನಲಾಗಿದೆ. ಈ ವಿಚಾರದಲ್ಲಿ ಸಂಜನಾ ಮೊದಲಿನಿಂದಲೂ ಗರಂ ಆಗಿಯೇ ಮಾತನಾಡುತ್ತಿದ್ದರು. ವಿಚಾರಣೆಗೆ ಬಂದ ಅಧಿಕಾರಿಗಳ ಎದುರಿಗೂ ಇದೇ ವರ್ತನೆ ತೋರಿಸಿದ್ದರೆ ಅಚ್ಚರಿ ಏನಿಲ್ಲ.
ರಾಹುಲ್ ಬಂಧನ ಆಗುತ್ತಿದ್ದಂತೆಯೇ ಸಹಜವಾಗಿ ಸಂಜನಾರ ಪ್ರತಿಕ್ರಿಯೆ ಪಡೆಯಲು ಮಾಧ್ಯಮದವರು ಪ್ರಯತ್ನಿಸಿದರು. ಆರಂಭದಲ್ಲಿ ಯಾವುದೇ ಪ್ರತಿಕ್ರಿಯೆ ನೀಡಲು ಒಪ್ಪದ ಅವರು, ನಂತರ ಕೆಲವು ಹೇಳಿಕೆ ನೀಡಿದ್ದರಾದರೂ ತುಂಬ ಸಿಟ್ಟನಿಂದಲೇ ವರ್ತಿಸಿದ್ದರು. ತಾವು ಏನೂ ತಪ್ಪೇ ಮಾಡಿಲ್ಲ ಎಂಬ ವಾದವನ್ನು ಪ್ರತಿ ಹಂತದಲ್ಲೂ ಮುಂದಿಡುತ್ತಿದ್ದರು. ಸಹಜವಾದ ಪ್ರಶ್ನೆಗಳಿಗೆ ಸಹಜವಾಗಿಯೇ ಉತ್ತರಿಸುವ ಬದಲು ತೀವ್ರವಾಗಿ ಕಿಡಿ ಕಾರುತ್ತಿದ್ದರು. ತಮ್ಮ ಮೇಲೆ ಬಂದ ಎಲ್ಲ ಆರೋಪಗಳನ್ನು ತಳ್ಳಿ ಹಾಕಿದರು. ಆದರೆ ಈಗ ಸಿಸಿಬಿ ಅಧಿಕಾರಿಗಳು ಕೆಲವು ಖಚಿತ ಮಾಹಿತಿ ಆಧರಿಸಿ ಅವರ ಮೇಲೆ ದಾಳಿ ಮಾಡಿರುವುದರಿಂದ ತಮ್ಮೆಲ್ಲಾ ಸಿಡಿಮಿಡಿಯನ್ನೂ ಪಕ್ಕಕ್ಕೆ ಇಟ್ಟು ಅವರು ವಿಚಾರಣೆ ಎದುರಿಸುವುದು ಅನಿವಾರ್ಯ ಆಗಿದೆ.
ತಮ್ಮ ಮೇಲೆ ಆರೋಪ ಕೇಳಿಬರುತ್ತಿದ್ದಂತೆಯೇ ಸಂಜನಾ ಒಂದು ಪ್ರಕಟಣೆ ಹೊರಡಿಸಿದರು. ‘ನನಗೂ ಡ್ರಗ್ಸ್‌ ದಂಧೆಗೂ ಯಾವುದೇ ಸಂಬಂಧ ಇಲ್ಲ, ಆದ್ದರಿಂದ ಅದರ ಬಗ್ಗೆ ನಾನು ಯಾವುದೇ ರೀತಿಯ ಪ್ರತಿಕ್ರಿಯೆ ನೀಡುವುದಿಲ್ಲ’ ಎಂದು ಅವರು ಹೇಳಿದರು. ಇದೇ ವೇಳೆ ಪ್ರಶಾಂತ್ ಸಂಬರಗಿ ಅವರು ಸಂಜನಾ ಮೇಲೆ ಮಾಡಿದ ಕೆಲವು ಆರೋಪಗಳ ಬಗ್ಗೆಯೂ ಆ ಪ್ರಕಟಣೆಯಲ್ಲಿ ಸಂಜನಾ ಪ್ರಸ್ತಾಪಿಸಿದ್ದರು. ‘ಬೀದಿ ನಾಯಿಗಳು ಬೊಗಳಿದಾಗ ಅವುಗಳನ್ನು ನಿರ್ಲಕ್ಷಿಸಬೇಕು ಎಂದು ನನ್ನ ತಂದೆ-ತಾಯಿ ನನಗೆ ಕಲಿಸಿಕೊಟ್ಟಿದ್ದಾರೆ’ ಎಂಬುದು ಸಂಜನಾ ಖಡಕ್‌ ಪ್ರತಿಕ್ರಿಯೆ ಆಗಿತ್ತು. ನಂತರ ಇದೇ ಪ್ರಶಾಂತ್ ಸಂಬರಗಿಯ ವಿಚಾರವಾಗಿ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡುವ ವೇಳೆ ಸಂಜನಾ ಅತ್ತು ಕರೆದು ಕಣ್ಣೀರು ಹಾಕಿ ರಂಪಾಟ ಮಾಡಿದ್ದರು.
