FILM
ಅಕ್ಷಯ್ ಕುಮಾರ್ ಆನೆ ಲದ್ದಿ ಟೀ, ಗೋಮೂತ್ರ ಸೇವನೆಯ ರಹಸ್ಯವನ್ನೂ ಬಿಚ್ಚಿಟ್ರು!
ಮುಂಬೈ: ಬಾಲಿವುಡ್ ಚಿತ್ರನಟ ಅಕ್ಷಯ್ ಕುಮಾರ್ ಒಂದಿಲ್ಲೊಂದು ಹೊಸ ವಿಷಯಕ್ಕೆ ಸುದ್ದಿಯಾಗ್ತಾರೆ , ಈ ಬಾರಿ ಆನೆ ಲದ್ದಿ ಟೀ ಸೇವಿಸ್ತಾ ಇದ್ದ ಅಕ್ಷಯ್ ಕುಮಾರ್ ಗೋಮೂತ್ರ ಸೇವನೆಯ ರಹಸ್ಯವನ್ನೂ ಇನ್ಸ್ಟಾಗ್ರಾಂ ಚಾಟ್ ಮೂಲಕ ಬೇರ್ ಗ್ರಿಲ್ ಜತೆಗೆ ಹಂಚಿಕೊಂಡಿದ್ದಾರೆ. ದ ವೈಲ್ಡ್ ವಿತ್ ಬೇರ್ ಗ್ರಿಲ್ಸ್ ಕಾರ್ಯಕ್ರಮಕ್ಕೆ ಸಂಬಂಧಿಸಿ ಬೇರ್ ಗ್ರಿಲ್ಸ್ ಮತ್ತು ಹುಮಾ ಖುರೇಶಿ ಜತೆಗೆ ಇನ್ಸ್ಟಾಗ್ರಾಂ ಚಾಟ್ ಮಾಡಿದ್ದ ಅಕ್ಷಯ್ ಕುಮಾರ್ ಈ ರಹಸ್ಯವನ್ನು ಬಿಚ್ಚಿಟ್ಟಿದ್ದಾರೆ.
ದ ವೈಲ್ಡ್ ವಿತ್ ಬೇರ್ ಗ್ರಿಲ್ಸ್ ಕಾರ್ಯಕ್ರಮದಲ್ಲಿ ಕೆಲವು ಡೇರ್ ಡೆವಿಲ್ ಸ್ಟಂಟ್ ಮಾಡಿ ತೋರಿಸುವ ಅಕ್ಷಯ್ ಕುಮಾರ್, ಆನೆ ಲದ್ದಿ ಟೀ ಕುಡಿಯುತ್ತಿರುವ ದೃಶ್ಯವಿದೆ. ಹುಮಾ ಖುರೇಶಿ ಮತ್ತು ಅನೇಕರು ಇದನ್ನು ನೋಡಿ ಹುಬ್ಬೇರಿಸಿದ್ದಾರೆ. ಆನೆ ಲದ್ದಿ ಟೀ ಕುಡಿಯೋಕಾಗತ್ತಾ ಅನ್ನೋ ಪ್ರಶ್ನೆಯನ್ನು ಇನ್ಸ್ಟಾಗ್ರಾಂ ಚಾಟ್ ಸಂದರ್ಭದಲ್ಲಿ ಕೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಅಕ್ಷಯ್ ಕುಮಾರ್, ಆಯುರ್ವೇದ ಕಾರಣಕ್ಕಾಗಿ ನಿತ್ಯವೂ ನಾನು ಗೋಮೂತ್ರ ಸೇವಿಸುತ್ತಿದ್ದೇನೆ. ಹಾಗಾಗಿ ಆನೆ ಲದ್ದಿ ಟೀ ಕುಡಿಯೋದೇನೂ ಕಷ್ಟವಲ್ಲ ಎಂದು ಹೇಳಿ ಗಮನಸೆಳೆದಿದ್ದಾರೆ.
ದ ವೈಲ್ಡ್ ವಿತ್ ಬೇರ್ ಗ್ರಿಲ್ಸ್ ಕಾರ್ಯಕ್ರಮವು ಡಿಸ್ಕವರಿ ಪ್ಲಸ್ ಆ್ಯಪ್ನಲ್ಲಿ ಸೆಪ್ಟೆಂಬರ್ 11 ರಂದು ಮತ್ತು ಡಿಸ್ಕವರಿ ಚಾನೆಲ್ನಲ್ಲಿ ಸೆಪ್ಟೆಂಬರ್ 14 ರಂದು ರಾತ್ರಿ 8 ಗಂಟೆಗೆ ಪ್ರಸಾರವಾಗಲಿದೆ.
