LATEST NEWS
ದ ಸೀರಿಯಲ್ ಡೇಟರ್: 335 ಮಹಿಳೆಯರ ಜೊತೆ ಡೇಟ್ ಮಾಡಿರುವ ಇವನ ಟಾರ್ಗೆಟ್ ಎಷ್ಟು ಗೊತ್ತಾ?
ನವದೆಹಲಿ, ಅಗಸ್ಟ್ 16: ದ ಡೇಟಿಂಗ್ ಕಿಂಗ್, ದ 365-ಡೇಟ್ಸ್ಮ್ಯಾನ್, ಸೀರಿಯಲ್ ಡೇಟರ್ ಎಂದೆಲ್ಲ ಕರೆಸಿಕೊಳ್ಳುವ ಈತ ಇದುವರೆಗೆ ಬರೋಬ್ಬರಿ 335 ಮಹಿಳೆಯರ ಜತೆ ಡೇಟಿಂಗ್ ಮಾಡಿದ್ದಾನೆ. ಮಾತ್ರವಲ್ಲ, ಇಂತಿಷ್ಟೇ ಮಹಿಳೆಯರ ಜತೆ ಡೇಟಿಂಗ್ ಮಾಡಬೇಕು ಎಂಬ ಟಾರ್ಗೆಟ್ ಕೂಡ ಇಟ್ಟುಕೊಂಡಿದ್ದಾನೆ.
ವೃತ್ತಿಯಿಂದ ಡ್ಯಾನ್ಸರ್, ನಟ ಎರಡೂ ಆಗಿರುವ ಈತ ಸದ್ಯ ಫುಲ್ಟೈಮ್ ಆಗಿ ಡೇಟಿಂಗ್ನಲ್ಲಿದ್ದಾನೆ. ಅಂದಹಾಗೆ ಈತ ಚೆನ್ನೈಯವನು, ಹೆಸರು ಸುಂದರ್ ರಾಮು. ಈತನ ಈ ಡೇಟಿಂಗ್ ಶುರುವಾಗಿದ್ದು 2015ರಲ್ಲಿ, ಅಂದಿನಿಂದ ಇಲ್ಲಿಯವರೆಗೂ ಹಲವಾರು ಮಹಿಳೆಯರೊಂದಿಗೆ ಡೇಟಿಂಗ್ ನಡೆಸಿದ್ದಾನೆ. ಒಟ್ಟಿನಲ್ಲಿ 365 ಮಂದಿ ಮಹಿಳೆಯರ ಜತೆ ಡೇಟಿಂಗ್ ಮಾಡಬೇಕು ಎಂಬುದು ಈತನ ಗುರಿ.
ಮಹಿಳೆಯರ ಹಕ್ಕುಗಳ ಕುರಿತು ಜಾಗೃತಿ ಮೂಡಿಸುವುದು, ಲಿಂಗತಾರತಮ್ಯ ತೊಲಗಿಸುವುದು ನನ್ನ ಈ ಡೇಟಿಂಗ್ ಉದ್ದೇಶ ಎಂಬ ಸಮಜಾಯಿಷಿ ಈತನದು. ಮನೆಯಲ್ಲಿ, ಶಾಲೆಯಲ್ಲಿ ನನಗೆ ಗಂಡು-ಹೆಣ್ಣು ಎಂಬ ಭೇದವೇ ಗೊತ್ತಿರಲಿಲ್ಲ, ಚೆನ್ನಾಗಿ ಬೆರೆತು ಬೆಳೆದಿದ್ದೆ. ಆದರೆ ಒಮ್ಮೆ ಹೊರಜಗತ್ತಿಗೆ ಪ್ರವೇಶಿಸಿದ ಮೇಲೆ ಲಿಂಗತಾರತಮ್ಯದ ತೀವ್ರತೆ ಅರಿವಾಯಿತು, ಅದೇ ನನ್ನನ್ನು ಇದಕ್ಕೆ ಪ್ರೇರೇಪಿಸಿತು ಎಂಬುದು ಡೇಟಿಂಗ್ಗೆ ರಾಮು ಕೊಡುವ ಸಬೂಬು.
2015ರ ಜನವರಿ 1ರಂದು ಡೇಟಿಂಗ್ಗೆ ಆಹ್ವಾನಿಸಿ ಫೇಸ್ಬುಕ್ನಲ್ಲಿ ಸ್ಟೇಟಸ್ ಹಾಕುವ ಮೂಲಕ ಇದಕ್ಕೆ ಚಾಲನೆ ಕೊಟ್ಟೆ. ಡೇಟಿಂಗ್ ಬರುವವರು ಒಂದು ಸ್ಥಳ ನಿಗದಿ ಮಾಡಿ ಆಹಾರಕ್ಕೆ ಪೇ ಮಾಡಬೇಕು ಅಥವಾ ಸ್ವತಃ ತಯಾರಿಸಿ ಕೊಡಬೇಕು. ಹೀಗೆ ಉಳಿಸಿದ ಹಣವನ್ನು ನಾನು ಟ್ರಸ್ಟ್ಗಳಿಗೆ ನೀಡುತ್ತಿದ್ದೇನೆ. ಆರಂಭದಲ್ಲಿ ಗೊತ್ತಿರುವ ವಲಯದಲ್ಲೇ ಡೇಟಿಂಗ್ ನಡೆಯುತ್ತಿತ್ತು. ಒಮ್ಮೆ ಡೇಟಿಂಗ್ ಕಿಂಗ್, ಸೀರಿಯಲ್ ಡೇಟರ್ ಎಂದೆಲ್ಲ ಪ್ರಚಾರ ಸಿಗುತ್ತಿದ್ದಂತೆ ಡೇಟಿಂಗ್ ಅವಕಾಶ ಹೆಚ್ಚಾಯಿತು.
ಕಳೆದ ಐದೂವರೆ ವರ್ಷಗಳಿಂದ ಡೇಟಿಂಗ್ನಲ್ಲಿ ತೊಡಗಿರುವ ಸುಂದರ್, ಇದುವರೆಗೆ ಅಮೆರಿಕ, ಶ್ರೀಲಂಕಾ, ಸ್ಪೇನ್, ಫ್ರಾನ್ಸ್, ಥಾಯ್ಲೆಂಡ್, ವಿಯೆಟ್ನಾಂ ಮುಂತಾದ ದೇಶಗಳ ಮಹಿಳೆಯರೊಂದಿಗೆ ಡೇಟಿಂಗ್ ನಡೆಸಿದ್ದಾನೆ. ನಾನು ಹಲವಾರು ಮಹಿಳೆಯರ ಜೊತೆ ಉಚಿತವಾಗಿ ಊಟ ಮಾಡಿದ್ದೇನೆ. ಈಗ ಅದು ಜೀವನದುದ್ದಕ್ಕೂ ನಡೆಯುವಂತೆ ಕಾಣುತ್ತಿದೆ ಎಂದಿದ್ದಾನೆ ಈ ಭೂಪ.
You must be logged in to post a comment Login