ನನ್ನ ತಲೆ ಕಡಿದವರಿಗೆ 10 ಲಕ್ಷ ಘೋಷಣೆ ಇದ್ದರೂ ಎಸ್ಕಾರ್ಟ್ ಭದ್ರತೆ ನೀಡದ ಪೊಲೀಸರು – ಪ್ರಮೋದ್ ಮುತಾಲಿಕ್

ಉಡುಪಿ ಅಕ್ಟೋಬರ್ 06: ನನ್ನ ತಲೆ ಕಡಿದವರಿಗೆ 10 ಲಕ್ಷ ನೀಡುವುದಾಗಿ ಉಡುಪಿ ಜಿಲ್ಲೆಯಿಂದಲೇ ಕೊಲೆ ಬೆದರಿಕೆ ಬಂದರೂ ಕೂಡ ಜಿಲ್ಲೆಯ ಪೊಲೀಸರು 5 ದಿನ ನನಗೆ ಎಸ್ಕಾರ್ಟ್ ಭದ್ರತೆ ನೀಡಿಲ್ಲ ಎಂದು ಶ್ರೀರಾಮ ಸೇನೆ ಸಂಸ್ಥಾಪಕ ಪ್ರಮೋದ್ ಮುತಾಲಿಕ್ ಬೇಸರ ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ಮಾತನಾಡಿದ ಅವರು ಉಡುಪಿ ಜಿಲ್ಲೆಯಲ್ಲಿ ಪ್ರವಾಸದ ಸಂದರ್ಭ ನನಗೆ ಪೋಲಿಸ್ ಎಸ್ಕಾರ್ಟ್ ಬೇಕಾಗಿತ್ತು, ಮತ್ತು ಅದನ್ನು ನೀಡುವುದು ಪೋಲಿಸ್ ಇಲಾಖೆಯ ಕರ್ತವ್ಯವಾಗಿತ್ತು,ಆದರೆ ಕೊಲೆ ಬೆದರಿಕೆ ಹಾಕಿದ ಜಿಲ್ಲೆಯಲ್ಲೇ ನನ್ನನ್ನು ನಿರ್ಲಕ್ಷ್ಯಿಸಿದ್ದಾರೆ ಎಂದರು. ಇದೊಂದು ರಾಜಕೀಯ ಕುತಂತ್ರಗಾರಿಕೆ ಎಂದು ಅನಿಸುತ್ತದೆ. ಈ ರೀತಿ ಮಾಡಿದರೆ ಜನರೇ ನಿಮಗೆ ಉಗಿಯುತ್ತಾರೆ. ಹಿಂದುತ್ವಕ್ಕಾಗಿ ಕೆಲಸ ಮಾಡಿದವರಿಗೆ ರಕ್ಷಣೆ ಕೊಟ್ಟಿಲ್ಲ ಅಂದರೆ ನೀವು ಯಾವ ಮಟ್ಟಕ್ಕೆ ಇಳಿದಿದ್ದೀರಿ ಅನ್ನೋದು ಗೊತ್ತಾಗುತ್ತದೆ.

ನೀವು ನನಗೆ ತೊಂದರೆ ಕೊಡುವುದು ಬಿಟ್ಟು ಬೇರೆ ಯೋಚನೆ ಮಾಡಿ ಎಂದರು. ಈ ಕೆಲಸವನ್ನು ರಾಕ್ಷಸಿ ಪ್ರವೃತ್ತಿಯ ಕಾಂಗ್ರೇಸ್ ನವರು ಮಾಡುತ್ತಿದ್ದರು, ಇದೀಗ ನೀವು ಮಾಡುತ್ತಿದ್ದೀರಿ ಎಂದು ರಾಜ್ಯಸರಕಾರದ ಆಕ್ರೋಶ ವ್ಯಕ್ತಪಡಿಸಿದ ಮುತಾಲಿಕ, ನೀವು ಹೀಗೆ ಮಾಡಿದರೆ ಹಿಂದುತ್ವಕ್ಕೆ ತೊಂದರೆಯಾಗುತ್ತದೆ, ನೀವು ತೊಂದರೆ ಕೊಟ್ಟಷ್ಟು ನಾನು ಮತ್ತೆ ಮತ್ತೆ ಪುಟಿದು ಎದ್ದು ಬರುತ್ತೇನೆ ಎಂದರು.