ಗೋಮಾಂಸ ಸಾಗಾಟ ಕೇಸಿನಲ್ಲಿ ಮಾಜಿ ಬಜರಂಗಿ ಅರೆಸ್ಟ್

ಕಾರ್ಕಳ ಡಿಸೆಂಬರ್ 14: ಅಕ್ರಮವಾಗಿ ದನಗಳನ್ನು ಕದ್ದು ಅದರ ಮಾಂಸ ಮಾರಾಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾರ್ಕಳ ನಗರ ಠಾಣಾ ಪೊಲೀಸರು ಮಾಜಿ ಬಜರಂಗದಳದ ಮುಖಂಡರೊಬ್ಬರನ್ನು ಬಂಧಿಸಿದ್ದಾರೆ. ಬಂಧಿತನನ್ನು ಬಜರಂಗದಳ ಕಾರ್ಕಳ ನಗರ ಘಟಕದ ಮಾಜಿ ಸಂಚಾಲಕ ಅನಿಲ್ ಪ್ರಭು ಎಂದು ಗುರುತಿಸಲಾಗಿದೆ.

ಈತ ಕಸಾಯಿಖಾನೆ ನಡೆಸುತ್ತಿದ್ದ ಮಹಮ್ಮದ್ ಯಾಸೀನ್ ಎಂಬಾತನಿಗೆ ದನ ಕಳ್ಳತನ ಸಂದರ್ಭದಲ್ಲಿ ಸಹಕರಿಸುತ್ತಿದ್ದ ಎಂದು ಆರೋಪಿಸಲಾಗಿದೆ.  ಕಳೆದ ನವೆಂಬರ್ ತಿಂಗಳಲ್ಲಿ ಬೈಕ್ ನಲ್ಲಿ ದನದ ಮಾಂಸ ಸಾಗಾಟ ನಡೆಸುತ್ತಿದ್ದ ಸಂದರ್ಭ ಪೊಲೀಸರು ಯಾಸೀನ್ ನನ್ನು ಬಂಧಿಸಿದ್ದರು. ವಿಚಾರಣೆ ವೇಳೆ ಯಾಸೀನ್ ಅನಿಲ್ ಪ್ರಭು ಅವರ ಹೆಸರನ್ನು ಹೇಳಿದ್ದ. ರಸ್ತೆ ಬದಿಯ ಬಿಡಾಡಿ ದನಗಳನ್ನು ಕದ್ದು ಸಾಗಿಸಲು ಅನಿಲ್ ಪ್ರಭು ಸಹಕರಿಸುತ್ತಿದ್ದ ಅಲ್ಲದೆ ಕಸಾಯಿಖಾನೆಗಳಿಗೆ ರಕ್ಷಣೆ ನೀಡಿ ಬಂದ ದುಡ್ಡಿನಲ್ಲಿ ಪಾಲು ಪಡೆಯುತ್ತಿದ್ದ ಎಂದು ಯಾಸೀನ್ ಪೊಲೀಸರ ಮುಂದೆ ತಿಳಿಸಿದ್ದಾನೆ. ಈ ಹಿನ್ನಲೆ ಕಾರ್ಕಳದ ತೆಳ್ಳಾರಿನಲ್ಲಿ ಅನಿಲ್ ಪ್ರಭು ನ್ನು ಪೊಲೀಸರು ಬಂಧಿಸಿದ್ದಾರೆ.

ಈ ನಡುವೆ ಅನಿಲ್ ಪ್ರಭು ಬಂಧನವಾಗುತ್ತಿದ್ದಂತೆ ಬಜರಂಗದಳದ ಮುಖಂಡರು ಅನಿಲ್ ಪ್ರಭು ವಿಗೂ ನಮ್ಮ ಸಂಘಟನೆಗೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಿಕೆ ನೀಡಿದ್ದಾರೆ.