ಮದುಮಗಳಿಗೆ ಕೊರೊನಾ – ಕೋವಿಡ್ ಸೆಂಟರಿನಲ್ಲೇ ಪಿಪಿಇ ಕಿಟ್ ಧರಿಸಿ ಮದುವೆ

ಜೈಪುರ: ಕೊರೊನಾ ಸಾಂಕ್ರಾಮಿಕ ಕಾಯಿಲೆಯಿಂದಾಗಿ ದೇಶದಲ್ಲಿ ಬಹುತೇಕ ಶುಭ ಸಮಾರಂಭಗಳಿಗೆ ಕತ್ತರಿ ಬಿದ್ದಿದೆ. ಅಲ್ಲದೆ ಕೆಲವು ಸಭೆ ಸಮಾರಂಭಗಳು ಬಂಧು ಬಾಧವರಿಲ್ಲದೆ ನಡೆಸಬೇಕಾದ ಪರಿಸ್ಥಿತಿ ಬಂದಿದೆ. ಇದೇ ರೀತಿ ಮದುವೆ ಒಂದು ಜೈಪುರದಲ್ಲಿ ನಡೆದಿದ್ದು, ಕೋವಿಡ್ ಸೆಂಟರಿನಲ್ಲೇ ಪಿಪಿಯ ಕಿಟ್ ಧರಿಸಿ ಜೋಡಿಯೊಂದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದೆ.

ರಾಜಸ್ಥಾನದ ಬಾರ ಎಂಬಲ್ಲಿ ಭಾನುವಾರ ಈ ಮದುವೆ ನಡೆದಿದೆ. ಮದುವೆ ದಿನದಂದೇ ವಧು ಕೊರೊನಾ ಟೆಸ್ಟ್ ಗೆ ಒಳಗಾದಾಗ ಆಕೆಯಲ್ಲಿ ಕೊರೊನಾ ಪಾಸಿಟಿವ್ ಕಾಣಿಸಿಕೊಂಡಿತ್ತು. ಈ ಹಿನ್ನೆಲೆಯಲ್ಲಿ ವಧು-ವರರು ಪಿಪಿಇ ಕಿಟ್ ಧರಿಸಿ ಸಪ್ತಪದಿ ತುಳಿದಿದ್ದಾರೆ.

ಮದುವೆಯ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ. ವೀಡಿಯೋದಲ್ಲಿ ಅರ್ಚಕ ಮತ್ತು ಓರ್ವ ವ್ಯಕ್ತಿ ಮಾತ್ರ ಇರುವುದನ್ನು ಕಾಣಬಹುದಾಗಿದೆ. ಕಾರ್ಯಕ್ರಮದಲ್ಲಿ ಕೊರೊನಾ ನಿಯಮವನ್ನು ಪಾಲಿಸಲಾಗಿದೆ. ಅಗ್ನಿ ಕುಂಡದ ಮುಂದೆ ವಧು-ವರರು ಪಿಪಿಇ ಕಿಟ್ ಧರಿಸಿ ಕುಳಿತಿದ್ದಾರೆ. ಅರ್ಚಕರು ಮಂತ್ರ ಹೇಳುವುದನ್ನು ಕೂಡ ನಾವು ವೀಡಿಯೋದಲ್ಲಿ ಕಾಣಬಹುದಾಗಿದೆ.

ಸದ್ಯ ವೈರಲ್ ಆಗುತ್ತಿರುವ ವೀಡಿಯೋಗೆ ಸಾಕಷ್ಟು ಕಾಮೆಂಟ್ ಗಳು ಹಾಗೂ ಲೈಕ್ಸ್ ಗಳು ಬಂದಿವೆ. ಕಾಮೆಂಟ್ ಸೆಕ್ಷನ್ ನಲ್ಲಿ ಜನ ಹಲವಾರು ಮೀಮ್ಸ್ ಗಳನ್ನು ಮಾಡಿ ಹಾಕುತ್ತಿದ್ದಾರೆ.