LATEST NEWS
ಗೋಡೆ ಮತ್ತು ಲಿಪ್ಟ್ ನ ಗ್ಯಾಪ್ ನಲ್ಲಿ ಸಿಲುಕಿ ಗಂಭೀರ ಗಾಯಗೊಂಡಿದ್ದ ಬಾಲಕ ಸಾವು
ಹೈದಾರಾಬಾದ್ ಫೆಬ್ರವರಿ 23: ಭೀಕರ ದುರಂತವೊಂದರಲ್ಲಿ ಪುಟ್ಟ ಬಾಲಕನೊಬ್ಬ ಅಪಾರ್ಟ್ ಮೆಂಟ್ ನ ಲಿಪ್ಟ್ ಮತ್ತು ಗೋಡೆ ನಡುವೆ ಸಿಲುಕಿ ಸಾವನಪ್ಪಿದ ಘಟನೆ ಮಸಾಬ್ ಟ್ಯಾಂಕ್ ಪ್ರದೇಶದಲ್ಲಿರುವ ಅಪಾರ್ಟ್‌ಮೆಂಟ್ ನಲ್ಲಿ ಶುಕ್ರವಾರ ಈ ಘಟನೆ ನಡೆದಿದೆ.
ಬಾಲಕನೊಬ್ಬ ತನ್ನ ಅಜ್ಜನ ಜೊತೆ ಅಪಾರ್ಟ್ ಮೆಂಟ್ ನಲ್ಲಿ ಸಂಬಂಧಿಕರೊಬ್ಬರನ್ನು ಭೇಟಿಯಾಗಲು ಬಂದಿದ್ದ ಸಂದರ್ಭ ಬಾಲಕ ಲಿಪ್ಟ್ ಒಳಗೆ ಹೋಗುವ ವೇಳೆ ಲಿಫ್ಟ್ ನ ಗ್ರಿಲ್ ಬಾಗಿಲು ಮುಚ್ಚುವ ಮೊದಲೇ ಲಿಫ್ಟ್ ಮೇಲೆ ಏರಲು ಪ್ರಾರಂಭಿಸಿತು. ಈ ವೇಳೆ ಬಾಲಕ ಹೊರಬರಲು ಪ್ರಯತ್ನಿಸಿದಾಗ ಲಿಫ್ಟ್ ಬಾಗಿಲು ಮತ್ತು ಗೋಡೆಯ ನಡುವೆ ಸಿಲುಕಿಕೊಂಡನು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿದೆ.
ಲಿಫ್ಟ್ ಬಾಗಿಲು ಮತ್ತು ಗೋಡೆಯ ನಡುವಿನ ಅಂತರಕ್ಕೆ ಜಾರಿಬಿದ್ದಿದ್ದ ಬಾಲಕ ಎರಡು ಗಂಟೆಗಳಿಗೂ ಹೆಚ್ಚು ಕಾಲ ಮೊದಲ ಮಹಡಿಯ ಬಳಿ ಸಿಲುಕಿಕೊಂಡಿದ್ದನು.
ಹೈದರಾಬಾದ್ ವಿಪತ್ತು ಪ್ರತಿಕ್ರಿಯೆ ಮತ್ತು ಆಸ್ತಿ ಸಂರಕ್ಷಣಾ ಸಂಸ್ಥೆ(ಹೈಡ್ರಾ) ಹಾಗೂ ಅಗ್ನಿಶಾಮಕ ಇಲಾಖೆಯ ಸಿಬ್ಬಂದಿ ಗ್ಯಾಸ್ ಕಟ್ಟರ್‌ಗಳನ್ನು ಬಳಸಿ ಲಿಫ್ಟ್ ಫ್ರೇಮ್ ಮತ್ತು ನೆಲದ ಸ್ಲ್ಯಾಬ್ ಅನ್ನು ಕತ್ತರಿಸಿ ಬಾಲಕನನ್ನು ರಕ್ಷಿಸಿ, ತಕ್ಷಣ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಬಾಲಕ ಚಿಕಿತ್ಸೆ ಫಲಕಾರಿಯಾಗದೆ ಇಂದು ಸಾವನ್ನಪ್ಪಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
