ದಾಖಲೆಯ 5ನೇ ಪರ್ಯಾಯ ತೃಪ್ತಿ ನೀಡಿಲ್ಲ ಆದರೂ ಸಂತೋಷವಿದೆ – ಪೇಜಾವರ ವಿಶ್ವೇಶ ತೀರ್ಥ ಸ್ವಾಮಿಜಿ

ದಾಖಲೆಯ 5ನೇ ಪರ್ಯಾಯ ತೃಪ್ತಿ ನೀಡಿಲ್ಲ ಆದರೂ ಸಂತೋಷವಿದೆ – ಪೇಜಾವರ ವಿಶ್ವೇಶ ತೀರ್ಥ ಸ್ವಾಮಿಜಿ

ಉಡುಪಿ ಜನವರಿ 16: ಪೇಜಾವರ ಶ್ರೀಗಳ ದಾಖಲೆಯ 5ನೇ ಪರ್ಯಾಯ ಜನವರಿ 18 ರಂದು ಕೊನೆಗೊಳ್ಳಲಿದೆ. ಈ ಹಿನ್ನಲೆಯಲ್ಲಿ ಇಂದು ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಪೇಜಾವರ ಶ್ರೀಗಳು ಪರ್ಯಾಯ ಸಂದರ್ಭದಲ್ಲಿ ಆರೋಗ್ಯ ಸ್ವಲ್ಪ ಕೈಕೊಟ್ಟಿತ್ತು, ಆದರೂ ಯಾವುದೇ ತೊಂದರೆಯಾಗಿಲ್ಲ ಎಂದು ತಿಳಿಸಿದರು. ಭಗವಂತನ ಅನುಗ್ರಹದಿಂದ ಪರ್ಯಾಯ ಯಶಸ್ವಿಯಾಗಿದೆ ಎಂದು ಪೇಜಾವರ ಶ್ರೀಗಳು ಹೇಳಿದರು.

ಪರ್ಯಾಯ ಸಂದರ್ಭದಲ್ಲಿ ಸಂಕಲ್ಪ ಮಾಡಿದ ಅನೇಕ ಕಾರ್ಯಗಳು ಸಂಪೂರ್ಣ ಆಗಿದೆ. ಆದರೂ ಕೆಲವೊಂದು ಕೆಲಸಗಳು ಬಾಕಿಯಾಗಿದೆ ಎಂದು ಹೇಳಿದರು. ಶ್ರೀ ಕೃಷ್ಣ ಮಠಕ್ಕೆ ಹೆಚ್ಚಿನ ಜಾಗ ಪಡೆದುಕೊಳ್ಳುವ ಯೋಜನೆ ಕೈಗೂಡಿಲ್ಲ ಎಂದು ತಿಳಿಸಿದರು.

ತನ್ನ ದಾಖಲೆಯ 5ನೇ ಪರ್ಯಾಯ ತೃಪ್ತಿ ಅಂತಾ ಇಲ್ಲ ಆದ್ರೆ ಸಂತೋಷವಿದೆ ಎಂದು ತಿಳಿಸಿದ ಅವರು ಪರ್ಯಾಯ ಮುಗಿದ ನಂತರ ಮುಂದೆ ಹೆಚ್ಚಿನ ಸಂಚಾರ ನಡೆಸಲು ಸಾಧ್ಯವಿಲ್ಲ, ವಯಸ್ಸು ಹಾಗೂ ಆರೋಗ್ಯದ ತೊಂದರೆ ಇರುವುದರಿಂದ ಹೆಚ್ಚಿನ ಸಂಚಾರ ಮಾಡಲು ಕಷ್ಟವಾಗಲಿದೆ ಎಂದು ಪೇಜಾವರ ಶ್ರೀಗಳು ತಿಳಿಸಿದರು. ಪರ್ಯಾಯ ನಂತರವೂ ಶಾಸ್ತ್ರ ಸಂರಕ್ಷಣೆ, ವೈದ್ಯಕೀಯ ಸೇವೆ, ಶೈಕ್ಷಣಿಕ ಸೇವೆ ಮುಂದುವರಿಯಲಿದೆ ಎಂದು ತಿಳಿಸಿದರು.

ಜನವರಿ 18 ರಂದು ಸರ್ವಜ್ಞ ಪೀಠ ಏರುವ ಪಲಿಮಾರು ಶ್ರೀಗಳ ಪರ್ಯಾಯಕ್ಕೆ ನನ್ನ ಸಂಪೂರ್ಣ ಸಹಕಾರವಿದೆ, ಪಲಿಮಾರು ಪರ್ಯಾಯ ಚೆನ್ನಾಗಿ ನಡೆಯಲಿ ಉಡುಪಿಯಲ್ಲಿ ಪೇಜಾವರ ಶ್ರೀಗಳು ಆಶೀರ್ವದಿಸಿದರು.