LATEST NEWS
ಟ್ರಾಫಿಕ್ ಪೊಲೀಸ್ ಪುಟ್ಟರಾಮ ಅವರ ಸಾಮಾಜಿಕ ಕಾಳಜಿಗೆ ನಗರ ಪೊಲೀಸ್ ಕಮಿಷನರ್‌ ಪಿ.ಎಸ್. ಹರ್ಷಾ ಅವರಿಂದ ಸನ್ಮಾನ ಅಭಿನಂದನೆ
ಟ್ರಾಫಿಕ್ ಪೊಲೀಸ್ ಪುಟ್ಟರಾಮ ಅವರ ಸಾಮಾಜಿಕ ಕಾಳಜಿಗೆ ನಗರ ಪೊಲೀಸ್ ಕಮಿಷನರ್‌ ಪಿ.ಎಸ್. ಹರ್ಷಾ ಅವರಿಂದ ಸನ್ಮಾನ ಅಭಿನಂದನೆ
ಮಂಗಳೂರು ನವೆಂಬರ್ 4: ವಾಹನ ಸವಾರರಿಗೆ ಕಂಟಕವಾಗಿದ್ದ ನಗರದ ಬಂಟ್ಸ್‌ಹಾಸ್ಟೆಲ್‌ ಸರ್ಕಲ್‌ ಸಮೀಪ ರಸ್ತೆಯಂಚಿನಲ್ಲಿದ್ದ ಗುಂಡಿಯೊಂದನ್ನು ಮುಚ್ಚಿ ಸಾರ್ವಜನಿಕರ ಪ್ರಶಂಸೆಗಳಿಸಿದ್ದ ಸಂಚಾರಿ ಪೊಲೀಸ್ ಸಿಬ್ಬಂದಿ ಪುಟ್ಟರಾಮ ಅವರನ್ನು ಮಂಗಳೂರು ಪೊಲೀಸ್ ಆಯುಕ್ತ ಪಿ.ಎಸ್ ಹರ್ಷ ಅವರು ಇಂದು ಸನ್ಮಾನಿಸಿದರು.
ಕಳೆದ ಶನಿವಾರ ಬಂಟ್ಸ್ ಹಾಸ್ಟೆಲ್ ವೃತ್ತದಲ್ಲಿ ಕರ್ತವ್ಯದಲ್ಲಿದ್ದ ಸಂಚಾರ ಪೊಲೀಸ್ ಸಿಬ್ಬಂದಿ ಪುಟ್ಟರಾಮ ಅವರ ರಸ್ತೆಯ ಗುಂಡಿಯಿಂದಾಗಿ ವಾಹನ ಸವಾರರು ಪಡುತ್ತಿರುವ ಕಷ್ಟ ನೋಡಲಾಗದೇ ಕೊನೆಗೆ ತಾವೇ ಲಾರಿ ಚಾಲಕರೋಬ್ಬರ ಮನವೊಲಿಸಿ ರಸ್ತೆ ಗುಂಡಿಗೆ ಮಣ್ಣು ತುಂಬಿಸಿ ರಸ್ತೆ ಸರಿಪಡಿಸಿದ್ದರು. ಇದನ್ನು ಸಾರ್ವಜನಿಕರೊಬ್ಬರು ವಿಡಿಯೋ ಮಾಡಿದ್ದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು.
ಮಂಗಳೂರು ಪೊಲೀಸ್ ಆಯುಕ್ತ ಹರ್ಷ ಅವರು ಪುಟ್ಟರಾಮ ಅವರನ್ನು ನನ್ನ ಈ ದಿನ ಹೀರೋ ಎಂದು ಅಭಿನಂದಿಸಿದ್ದರು. ಅಲ್ಲದೆ ಇಂದು ಕಚೇರಿಗೆ ಕರೆಸಿಕೊಂಡು ಆಯುಕ್ತ ಪಿ.ಎಸ್ ಹರ್ಷ ಅವರು ಪುಟ್ಟರಾಮ ಅವರನ್ನು ಸನ್ಮಾನ ಮಾಡಿ ಅಭಿನಂದನಾ ಪತ್ರವನ್ನು ನೀಡಿದ್ದಾರೆ.
ಮಂಗಳೂರಿನ ಬಹುತೇಕ ರಸ್ತೆಗಳು ಹಾಳಾಗಿದ್ದು ರಸ್ತೆಗಳಲ್ಲಿ ವಾಹನ ಸಂಚಾರ ಕಷ್ಟಕರವಾಗಿದೆ. ರಸ್ತೆ ಸರಿಪಡಿಸಬೇಕಾದ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ಚುನಾವಣೆಯ ಗುಂಗಿನಲ್ಲಿದ್ದು, ಕೊನೆಗೆ ರಸ್ತೆ ಸರಿಪಡಿಸಲು ಸಂಚಾರಿ ಪೊಲೀಸ್ ಸಿಬ್ಬಂದಿಯೇ ಬರಬೇಕಾದ ಪರಿಸ್ಥಿತಿ ಬಂದೊದಗಿದೆ. ತಾವು ಮಾಡಬೇಕಾದ ಕಾರ್ಯವನ್ನು ಒಬ್ಬ ಪೊಲೀಸ್ ಸಿಬ್ಬಂದಿ ಮಾಡಿ ಸಾರ್ವಜನಿಕರಿಂದ ಪ್ರಶಂಸೆ ಪಡೆದ ಪುಟ್ಟರಾಮ ಅವರನ್ನು ಅಭಿನಂದಿಸಲು ಜನಪ್ರತಿನಿಧಿಗಳಿಗೆ ಸಮಯವಿಲ್ಲದ್ದು ವಿಪರ್ಯಾಸವೇ ಸರಿ.
