ಆಟ ಆಡ್ಬೇಡ ಓದು ಅಂದಿದ್ದಕ್ಕೆ ಕಿಟಕಿಗೆ ನೇಣು ಹಾಕಿಕೊಂಡ 9 ವರ್ಷದ ಬಾಲಕಿ…!!

ಚೆನ್ನೈ ಮಾರ್ಚ್ 30: ಆಟ ಆಡ್ಬೇಡ ಓದು ಎಂದು ಅಪ್ಪ ಹೇಳಿದಕ್ಕೆ 9 ವರ್ಷ ವಯಸ್ಸಿನ ಬಾಲಕಿಯೊಬ್ಬಳು ಕಿಟಕಿಗೆ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡ ಘಟನೆ ತಮಿಳುನಾಡಿನ ತಿರುವಳ್ಳೂರು ಜಿಲ್ಲೆಯಲ್ಲಿ ನಡೆದಿದೆ. ಮೃತ ಬಾಲಕಿಯನ್ನು IV ತರಗತಿಯ ವಿದ್ಯಾರ್ಥಿನಿ ಪ್ರತೀಕ್ಷಾ ಎಂದು ಗುರುತಿಸಲಾಗಿದ್ದು, ಈಕ ಸಾಮಾಜಿಕ ಜಾಲತಾಣಗಳಲ್ಲಿ ರೀಲ್‌ಗಳನ್ನು ತಯಾರಿಸುವ ಮೂಲಕ ತನ್ನ ನೆರೆಹೊರೆಯಲ್ಲಿ ರೀಲ್ಸ್ ಕ್ವೀನ್ ಎಂದು ಹೆಸರುವಾಸಿಯಾಗಿದ್ದಳು.

ಮಂಗಳವಾರ ರಾತ್ರಿ 8 ಗಂಟೆ ಸುಮಾರಿಗೆ ಪ್ರತೀಕ್ಷಾ ತನ್ನ ಪಕ್ಕದ ಬೀದಿಯಲ್ಲಿರುವ ತನ್ನ ಅಜ್ಜಿಯ ಮನೆಯ ಮುಂದೆ ಸ್ನೇಹಿತರೊಂದಿಗೆ ಆಟವಾಡುತ್ತಿದ್ದಾಗ ಆಕೆಯ ತಂದೆ ಕೃಷ್ಣಮೂರ್ತಿ ಅವರು ಆಟ ಆಡಿದ್ದು ಸಾಕು ಮನೆಗೆ ಹಿಂತಿರುಗಿ ಓದುವಂತೆ ಕೇಳಿಕೊಂಡರು. ನಂತರ ಪೋಷಕರು ಮಗುವಿಗೆ ಮನೆಯ ಕೀಲಿಗಳನ್ನು ನೀಡಿದರು ಮತ್ತು ಕೆಲವು ಮನೆಗೆ ಅಗತ್ಯವಾದ ವಸ್ತುಗಳನ್ನು ಖರೀದಿಸಲು ಹೋದರು.

ಒಂದು ಗಂಟೆಯ ನಂತರ ಹಿಂತಿರುಗಿ ನೋಡಿದಾಗ ಮನೆಯ ಒಳಗಿನಿಂದ ಬೀಗ ಹಾಕಿರುವುದು ಕಂಡು ಬಂತು. ಪದೇ ಪದೇ ಬಾಗಿಲು ಬಡಿದರೂ ಅಥವಾ ಆಕೆಯ ಪೋಷಕರು ಬಾಗಿಲು ತೆರೆಯಲು ಜೋರಾಗಿ ಕರೆ ಮಾಡಿದರೂ ಪ್ರತೀಕ್ಷಾ ಪ್ರತಿಕ್ರಿಯಿಸಲಿಲ್ಲ. ಆಕೆಯ ತಂದೆ ಬಾಗಿಲು ಒಡೆದು ಒಳಪ್ರವೇಶಿಸಿದಾಗ ಪ್ರತೀಕ್ಷಾ ಕಿಟಕಿಯ ಗ್ರಿಲ್‌ ಗೆ ಟವೆಲ್‌ನಿಂದ ನೇಣು ಬಿಗಿದುಕೊಂಡಿರುವುದು ಕಂಡುಬಂದಿದೆ. ಕೂಡಲೇ ದಂಪತಿಗಳು ತಮ್ಮ ಮಗಳನ್ನು ಆಸ್ಪತ್ರೆಗೆ ಕರೆದೊಯ್ದರು ಆದರೆ ಅಷ್ಟರಲ್ಲೇ ಪ್ರತೀಕ್ಷಾ ಸಾವನಪ್ಪಿದ್ದಳು.