ಮಂಗಳೂರಿನಿಂದ ದೆಹಲಿಗೆ ಏರ್‌ಇಂಡಿಯಾ ಎಕ್ಸ್‌ಪ್ರೆಸ್‌ ನಿಂದ ಡೈರೆಕ್ಟ್ ಪ್ಲೈಟ್

ಮಂಗಳೂರು ಫೆಬ್ರವರಿ 02: ಮಂಗಳೂರಿನಿಂದ ದೆಹಲಿಗೆ ನೇರ ವಿಮಾನಯಾನ ಶನಿವಾರದಿಂದ ಆರಂಭಗೊಂಡಿದೆ. ವಿಮಾನ ಐಎಕ್ಸ್‌ 1552 ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಬೆಳಗ್ಗೆ 6.40ಕ್ಕೆ ಹೊರಟು 9.35ಕ್ಕೆ ದಿಲ್ಲಿ ಏರ್‌ಪೋರ್ಟಲ್ಲಿ ಇಳಿಯಿತು. ಜೊತೆ ವಿಮಾನವಾದ ಐಎಕ್ಸ್‌ 2768 ದಿಲ್ಲಿಯಿಂದ ಬೆಳಗ್ಗೆ 6.40ಕ್ಕೆ ಹೊರಟು ಮಂಗಳೂರಿನಲ್ಲಿ 9.35ಕ್ಕೆ ಇಳಿದಿದೆ.

ಮಂಗಳೂರು – ದಿಲ್ಲಿ ವಿಮಾನದಲ್ಲಿ 167 ಮಂದಿ ಹಾಗೂ ದಿಲ್ಲಿ-ಮಂಗಳೂರು ವಿಮಾನದಲ್ಲಿ 144 ಪ್ರಯಾಣಿಕರಿದ್ದರು. ವಿಮಾನ ಪ್ರತಿದಿನ ಸಂಚರಿಸಲಿದೆ. ಹೊಸ ವಿಮಾನಕ್ಕೆ ಮಂಗಳೂರು ವಿಮಾನ ನಿಲ್ದಾಣದ ಅಗ್ನಿಶಾಮಕ ವಿಭಾಗದಿಂದ ಜಲಫಿರಂಗಿ ವಂದನೆ ಸಲ್ಲಿಸಿ ಗೌರವ ಸೂಚಿಸಲಾಯಿತು.

ಇದುವರೆಗೆ ಮಂಗಳೂರು ಮುಂಬಯಿ ಮಧ್ಯೆ ಕಾರ್ಯಾಚರಿಸುತ್ತಿದ್ದ ಏರ್‌ ಇಂಡಿಯಾ ಕಂಪೆನಿಯ ಏಕೈಕ ವಿಮಾನ ಜನವರಿ 31ಕ್ಕೆ ತನ್ನ ಸೇವೆ ಸ್ಥಗಿತಗೊಳಿಸಿದೆ. ಕೊನೆಯ ವಿಮಾನ ಶುಕ್ರವಾರ ತೆರಳಿದೆ.
ಲಭ್ಯ ಮಾಹಿತಿ ಪ್ರಕಾರ ಮಂಗಳೂರು-ಮುಂಬಯಿ ಮಧ್ಯೆ ಇನ್ನು ಏರ್‌ ಇಂಡಿಯಾ ಬದಲಿಗೆ ಏರ್‌ ಇಂಡಿಯಾ ಎಕ್ಸ್‌ಪ್ರೆಸ್‌ ಕಾರ್ಯಾಚರಿಸಲಿದೆ. ಏರ್‌ ಇಂಡಿಯಾ ಇನ್ನು ಮೆಟ್ರೋ ಪಟ್ಟಣಗಳ ಮಧ್ಯೆ ಹಾಗೂ ಅಂತಾರಾಷ್ಟ್ರೀಯ ದೂರ ಮಾರ್ಗಗಳ ಮಧ್ಯೆ ಮಾತ್ರವೇ ಸಂಚರಿಸಲಿದೆ.