ರೀಲ್ಸ್ ಮಾಡಲು ಐಪೋನ್ ಬೇಕು ಎಂದು ಐಪೋನ್ ಹೊಂದಿದ್ದ ವ್ಯಕ್ತಿಯನ್ನು ಕೊಲೆ ಮಾಡಿದ ಹುಡುಗರು

ಉತ್ತರ ಪ್ರದೇಶ ಜೂನ್ 28: ಒಳ್ಳೆ ಕ್ವಾಲಿಟಿಯ ರೀಲ್ಸ್ ವಿಡಿಯೋ ಮಾಡಲು ಐಪೋನ್ ಅಗತ್ಯ ಎಂದು ಇಬ್ಬರು ಅಪ್ರಾಪ್ತ ಹುಡುಗರು ಐಪೋನ್ ಹೊಂದಿದ್ದ ವ್ಯಕ್ತಿಯ ಕತ್ತು ಸೀಳಿ ಭೀಕರವಾಗಿ ಕೊಲೆ ಮಾಡಿರುವ ಪ್ರಕರಣ ಉತ್ತರ ಪ್ರದೇಶದ ಬಹ್ರೇಚ್​ನಲ್ಲಿ ವರದಿಯಾಗಿದೆ. ಈ ಪ್ರಕರಣ ಸಂಬಂಧ ಇಬ್ಬರು ಅಪ್ರಾಪ್ತರನ್ನು ಸೆರೆಹಿಡಿಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕೊಲೆಯಾದ ವ್ಯಕ್ತಿಯನ್ನು ಶಬದ್​ (19) ಎಂದು ಗುರುತಿಸಲಾಗಿದೆ. ಈತ ಬೆಂಗಳೂರಿನಲ್ಲಿ ನೆಲೆಸಿದ್ದ ಈತ ಸಂಬಂಧಿ ಮದುವೆ ಹಿನ್ನೆಲೆ ಪೂರ್ವಜರ ಗ್ರಾಮವಾದ ಬಹ್ರೇಚ್​ನ ನಾಗೌರ್​ಗೆ ಭೇಟಿ ನೀಡಿದ್ದ ಸಂದರ್ಭ ಈ ಘಟನೆ ನಡೆದಿದೆ.

ಜೂನ್​ 21ರಂದು ಶಬದ್​ ಮೃತದೇಹ ಗ್ರಾಮದ ಹೊರಗಿನ ಹೊರಗಿನ ಬಾವಿ ಹತ್ತಿರ ಪತ್ತೆಯಾಗಿತ್ತು. ಈ ವೇಳೆ ಆತನ ಕುತ್ತಿಗೆ ಸೀಳಿದ್ದು, ತಲೆಯನ್ನು ಜಜ್ಜಿರುವುದು ಕಂಡು ಬಂದಿತ್ತು. ಈ ಪ್ರಕರಣದ ತನಿಖೆ ನಡೆಸಿದಾಗ 14 ಮತ್ತು 16 ವರ್ಷದ ಅಪ್ರಾಪ್ತರು ಕೊಲೆಯಲ್ಲಿ ಭಾಗಿಯಾಗಿರುವುದು ಗೊತ್ತಾಗಿದೆ. ಈ ಸಂಬಂಧ ಇಬ್ಬರನ್ನು ಬಂಧಿಸಲಾಗಿದೆ ಎಂದು ಎಎಸ್​ಪಿ ರಾಮಾನಂದ್​ ಪ್ರಸಾದ್​ ಕುಶ್ವಾಹ ತಿಳಿಸಿದ್ದಾರೆ.

ಜೂನ್​ 20ರಂದು ಶಬದ್​ ಬಳಿ ಐಫೋನ್​ ಇರುವುದನ್ನು ಕಂಡಿದ್ದ ಅಪ್ರಾಪ್ತರು, ಆತನಿಗೆ ರೀಲ್ಸ್​ ಮಾಡೋಣ ಎಂದು ರಾತ್ರಿ ಗ್ರಾಮದಲ್ಲಿ ನಿಗದಿ ಪಡಿಸಿದ ಸ್ಥಳಕ್ಕೆ ಆಗಮಿಸುವಂತೆ ತಿಳಿಸಿದ್ದರು. ಅದರಂತೆ ಸಂತ್ರಸ್ತ ಆಗಮಿಸಿದಾಗ ಆತನ ಮೇಲೆ ಹಲ್ಲೆ ನಡೆಸಿದ ಅಪ್ರಾಪ್ತರು ಚಾಕುವಿನಿಂದ ಆತನ ಕತ್ತು ಸೀಳಿದ್ದು, ತಲೆಯನ್ನು ಇಟ್ಟಿಗೆಯಿಂದ ಜಜ್ಜಿದ್ದಾರೆ ಎಂದು ಪೊಲೀಸರು ಮಾಹಿತಿ ನೀಡಿದರು. ಆರೋಪಿಗಳಿಂದ ಐಫೋನ್​ ಹಾಗೂ ಕೊಲೆಗೆ ಬಳಕೆ ಮಾಡಲಾದ ಚಾಕುವನ್ನು ವಶಕ್ಕೆ ಪಡೆಯಲಾಗಿದೆ.

ಈ ಪ್ರಕರಣ ಸಂಬಂಧ ಇಬ್ಬರು ಅಪ್ರಾಪ್ತರು ಮತ್ತು ಅವರಿಗೆ ಸಹಾಯ ಮಾಡಿದ ಕುಟುಂಬದ ಇಬ್ಬರು ಸದಸ್ಯರನ್ನು ಬಿಎನ್​ಎಸ್​ ಸೆಕ್ಷನ್​ 103 (1) (ಕೊಲೆ) ಮತ್ತು 238 (ಸಾಕ್ಷ್ಯನಾಶ)ದ ಅಡಿ ಪ್ರಕರಣ ದಾಖಲಾಗಿದೆ.
ಮೃತ ದೇಹ ಪತ್ತೆಯಾಗುತ್ತಿದ್ದಂತೆ ಆರೋಪಿಗಳು ಮತ್ತು ಅವರ ಕುಟುಂಬಸ್ಥರು ಮನೆ ತೊರೆಯಲು ಮುಂದಾಗಿದ್ದರು. ಈ ವೇಳೆ ಅಪ್ರಾಪ್ತರನ್ನು ಸೆರೆ ಹಿಡಿಯಲಾಗಿದೆ. ಬಂಧಿತರಲ್ಲಿ ಒಬ್ಬನಾಗಿರುವ ಅಪ್ರಾಪ್ತನ ಸಂಬಂಧಿ ಕೊಲೆ ಮಾಡಿದ ಶಸ್ತ್ರಾಸ್ತ್ರ ಅಡಗಿಸಿಡಲು ಸಹಾಯ ಮಾಡಿದ್ದು, ಆತನನ್ನು ಬಂಧಿಸಲಾಗಿದ್ದು, ಮತ್ತೊಬ್ಬನ ಹುಡುಕಾಟಕ್ಕೆ ಬಲೆ ಬೀಸಿದ್ದಾರೆ. ಅಪ್ರಾಪ್ತ ಆರೋಪಿಗಳನ್ನು ಗೊಂಡಾದಲ್ಲಿರುವ ಬಾಲಾಪರಾಧಿ ಕೇಂದ್ರಕ್ಕೆ ಕಳುಹಿಸಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.