ಕೊನೆಗೂ ಕೇರಳಕ್ಕೆ ಬೈ ಬೈ ಹೇಳಿದ ಬ್ರಿಟನ್ ರಾಯಲ್ ನೇವಿಯ F-35B Fighter Jet ವಿಮಾನ

ತಿರುವನಂತಪುರಂ ಜುಲೈ 22: ಕಳೆದ ಒಂದು ತಿಂಗಳಿನಿಂದ ಕೇರಳ ತಿರುವನಂತಪುರಂ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಲಂಗರು ಹಾಕಿದ್ದ ಬ್ರಿಟನ್ ರಾಯಲ್ ನೇವಿಯ F-35B Fighter Jet ವಿಮಾನ ಕೊನೆಗೂ ದುರಸ್ತಿಯಾಗಿ ಇಂದು ತನ್ನ ದೇಶದತ್ತ ಪಯಣ ಬೆಳೆಸಿದೆ.

ವಿಶ್ವದ ದುಬಾರಿ ಯುದ್ದ ವಿಮಾನಗಳಲ್ಲಿ ಒಂದಾದ F-35B Fighter Jet ವಿಮಾನ ತನ್ನ ದೈನಂದಿನ ಹಾರಾಟದ ಸಂದರ್ಭ ಉಂಟಾದ ತಾಂತ್ರಿಕ ದೋಷದಿಂದಾಗಿ ಕೇರಳದ ತಿರುವನಂತಪುರಂ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡಿಂಗ್ ಮಾಡಿತ್ತು. ಬಳಿಕ ಅದರ ರಿಪೇರಿ ಕಾರ್ಯ ಮಾತ್ರ ತುಂಬಾ ನಿಧಾನವಾಗಿ ನಡೆದಿದ್ದು, ಕೇರಳದಲ್ಲಿ ಐದು ವಾರಗಳ ಕಾಲ ಇತ್ತು.

ಕಳೆದ ಜೂನ್ 14 ರಂದು ಬ್ರಿಟನ್ ನಿಂದ ಆಸ್ಟ್ರೇಲಿಯಾಕ್ಕೆ ಹಾರುತ್ತಿದ್ದಾಗ ಹೈಡ್ರಾಲಿಕ್ ವೈಫಲ್ಯದಿಂದಾಗಿ ಬ್ರಿಟನ್ ರಾಯಲ್ ನೇವಿಯ F-35B Fighter Jet ವಿಮಾನ ತುರ್ತು ಭೂಸ್ಪರ್ಶ ಮಾಡಿತ್ತು. ಬಳಿಕ ಶತ ಪ್ರಯತ್ನಗಳ ನಂತರವೂ ವಿಮಾನ ದುರಸ್ತಿಯಾಗಿರಲಿಲ್ಲ. ಕೊನೆಗೆ ವಿಮಾನದ ದುರಸ್ತಿಗೆ ರಾಯಲ್ ನೇವಿ ತಂಡವು ಯುಕೆಯಿಂದ ಆಗಮಿಸಿತ್ತು. ಸತತ ದುರಸ್ತಿ ಬಳಿಕ ಇದೀಗ ಯುದ್ಧ ವಿಮಾನ ಹಾರಾಟಕ್ಕೆ ಸಿದ್ಧವಾಗಿದ್ದು, ನಿನ್ನೆ ಅದಕ್ಕೆ ಟೇಕ್ ಆಫ್ ಆಗಲು ಅಧಿಕಾರಿಗಳ ತಂಡ ಹಸಿರು ನಿಶಾನೆ ತೋರಿಸಿತ್ತು. ಅಂದರಂತೆ ಇಂದು ಕೇರಳದ ತಿರುವನಂತಪುರ ವಿಮಾನ ನಿಲ್ದಾಣದಿಂದ ಬ್ರಿಟನ್ ನತ್ತ ಟೇಕ್ ಆಫ್ ಆಗಿದೆ.