ಚುನಾವಣೆ ಸಂದರ್ಭದ ಅಪಪ್ರಚಾರ ತಡೆಯುವ ಶಕ್ತಿ ಕಾರ್ಯಕರ್ತರಿಗೆ ಇದೆ – ಸುನಿಲ್ ಕುಮಾರ್

ಉಡುಪಿ ಡಿಸೆಂಬರ್ 03: ಚುನಾವಣೆ ಹತ್ತಿರ ಬರುತ್ತಿದ್ದಂತೆ ಕಾರ್ಕಳದಲ್ಲಿ ನನ್ನ ಬಗ್ಗೆ ಅಪಪ್ರಚಾರ ನಡೆಯುತ್ತಿದ್ದು, ಅವರೆಲ್ಲ ಮಳೆಗಾಲದಲ್ಲಿ ಹುಟ್ಟಿಕೊಳ್ಳುವ ಅಣಬೆಗಳ ರೀತಿ ಎಂದು ಸಚಿವ ಸುನಿಲ್ ಕುಮಾರ್ ವಾಗ್ದಾಳಿ ನಡೆಸಿದ್ದಾರೆ.

ಈ ಬಾರಿ ಚುನಾವಣೆಗೆ ಸುನಿಲ್ ಕುಮಾರ್ ಬೆಂಗಳೂರಿನಿಂದ ಸ್ಪರ್ಧಿಸುತ್ತಾರೆ ಎಂಬ ಸುದ್ದಿಗೆ ಆಕ್ರೋಶ ವ್ಯಕ್ತಪಡಿಸಿದ ಅವರು ಕಾರ್ಕಳದಿಂದ ನಾನು ಸ್ಪರ್ಧಿಸುವ ಬಗ್ಗೆ ಅಪಪ್ರಚಾರ ನಡೆಸಲಾಗುತ್ತಿದೆ. ಯಾರೋ ನಾಲ್ಕೈದು ಜನ ಮಾತನಾಡುತ್ತಾರೆ ಅಂದ್ರೆ ಸಾವಿರಾರು ಜನ ಕಾರ್ಯಕರ್ತರಿಗೆ ಅದನ್ನು ತಡೆಯುವ ಶಕ್ತಿ ಇದೆ. ಅಪಪ್ರಚಾರದ ಬಾಯಿಗಳನ್ನು ತಡೆಯುವ ಶಕ್ತಿ ಇದೆ, 2004 ರಲ್ಲಿ ಚುನಾವಣೆಗೆ ನಿಂತಾಗ ಸುನಿಲ್ ಕುಮಾರ್ ಹತ್ರ 100 ಲಾರಿ ಇದೆ ಅಂದ್ರು, ನನ್ನ ಜಾತಿ ಯಾವುದು ಗೊಂದಲ ಇದೆ ಅಂದಿದ್ದರು. ನಗರದ ಜಿಎಸ್‌ಬಿ ಸಮುದಾಯ ನನ್ನ ವಿರೋಧವಿದೆ ಅಂದರು. ಸುನಿಲ್ ಕುಮಾರ್ ಗೆ ಬಂಟ ಸಮುದಾಯ ವಿರೋಧವಿದೆ ಎಂದು ಸುದ್ದಿ ಹಬ್ಬಿಸಿದರು. ಸುನಿಲ್ ಕುಮಾರ್ ಗೆ ಬಿಲ್ಲವರು ಓಟು ಹಾಕಲ್ಲ ಅಂದಿದ್ದರು, ಆದರೆ ಕಾರ್ಯಕರ್ತರು ನನ್ನ ಗೆಲ್ಲಿಸಿದರು.

ಈಗ ಮತ್ತೆ ಚುನಾವಣಾ ವರ್ಷ ಆರಂಭವಾಗಿದ್ದು, ಇದೀಗ ನಾನು ಕಾರ್ಕಳದಲ್ಲಿ ಸ್ಪರ್ಧಿಸಲ್ಲ ಬೆಂಗಳೂರಿನಲ್ಲಿ ಚುನಾವಣೆಗೆ ನಿಲ್ತೇನೆ ಎಂದು ಸುದ್ದಿ ಹಬ್ಬಿಸುತ್ತಿದ್ದಾರೆ. ಸುನಿಲ್ ಕುಮಾರ್ ಗೆ ಕಾರ್ಕಳದಲ್ಲೇ ರಾಜಕೀಯ ಜನ್ಮ, ಸುನಿಲ್ ಕುಮಾರ್ ಗೆ ಕಾರ್ಕಳದಲ್ಲೇ ಮರಣ, ಮಿಂಚಿನ ಹುಳದ ರೂಪದಲ್ಲಿ ಕೆಲವರು ಬರುತ್ತಾರೆ, ಮಳೆಗಾಲದಲ್ಲಿ ಅಣಬೆಗಳ ತರ ಹುಟ್ಟಿಕೊಳ್ಳುತ್ತಾರೆ. ಮಳೆ ಇಲ್ಲದಾಗ ಇವರಿಗೆ ಅಸ್ತಿತ್ವವೇ ಇರುವುದಿಲ್ಲ ಎಂದರು.