ನವದೆಹಲಿ ಎಪ್ರಿಲ್ 21 : ಧಾರ್ಮಿಕ ನಂಬಿಕೆ ಮತ್ತು ಸಂವಿಧಾನದ ಮೂಲಭೂತ ಹಕ್ಕುಗಳ ನಡುವಿನ ಸಂಘರ್ಷಕ್ಕೆ ಸಂಬಂಧಿಸಿದ ಶಬರಿಮಲೆ ಅರ್ಜಿಗಳ ವಿಚಾರಣೆ ನಡೆಸುತ್ತಿರುವ ಸುಪ್ರೀಂ ಕೋರ್ಟ್, “ಸೃಷ್ಟಿಕರ್ತ ಮತ್ತು ಸೃಷ್ಟಿಯ ನಡುವೆ ಯಾವುದೇ ವ್ಯತ್ಯಾಸವಿಲ್ಲದಿರುವಾಗ, ನಿರ್ದಿಷ್ಟ ಕಾರಣಗಳಿಂದ ದೇವಸ್ಥಾನ ಪ್ರವೇಶ ಅಥವಾ ದೇವರನ್ನು ಮುಟ್ಟದಂತೆ ತಡೆಯಲ್ಪಟ್ಟವರನ್ನು ಸಂವಿಧಾನ ರಕ್ಷಿಸುವುದಿಲ್ಲವೇ?” ಎಂದು ಪ್ರಶ್ನಿಸಿದೆ.
ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ಒಂಬತ್ತು ನ್ಯಾಯಾಧೀಶರ ಪೀಠವು ಈ ಸಂವೇದನಾಶೀಲ ಪ್ರಕರಣದ ವಿಚಾರಣೆ ನಡೆಸುತ್ತಿದೆ. ವಿಚಾರಣೆಯ ವೇಳೆ ನ್ಯಾಯಮೂರ್ತಿ ಅಹ್ಸಾನುದ್ದೀನ್ ಅಮಾನುಲ್ಲಾ ಅವರು ಭಕ್ತಿ ಮತ್ತು ನಂಬಿಕೆಯ ಸ್ವರೂಪದ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎತ್ತಿದರು. “ಒಬ್ಬ ಭಕ್ತನು ನೂರು ಪ್ರತಿಶತ ನಂಬಿಕೆ ಮತ್ತು ಶುದ್ಧ ಹೃದಯದಿಂದ ದೇವಸ್ಥಾನಕ್ಕೆ ಹೋದಾಗ, ಕೇವಲ ವಂಶಾವಳಿ ಅಥವಾ ಒಂದು ನಿರ್ದಿಷ್ಟ ಪರಿಸ್ಥಿತಿಯ ಕಾರಣಕ್ಕಾಗಿ ಆತನಿಗೆ ದೇವರನ್ನು ಮುಟ್ಟಲು ಅವಕಾಶವಿಲ್ಲ ಎನ್ನುವುದು ಸರಿಯೇ? ಇಂತಹ ಸಂದರ್ಭದಲ್ಲಿ ಸಂವಿಧಾನವು ಅವರ ರಕ್ಷಣೆಗೆ ಬರುವುದಿಲ್ಲವೇ?” ಎಂದು ಕೇಳಿದರು.
ಅಂತೆಯೇ, ನ್ಯಾಯಮೂರ್ತಿ ಪ್ರಸನ್ನ ಬಿ ವರಾಳೆ ಅವರು, “ಆಧುನಿಕ ಶಿಕ್ಷಣ ಮತ್ತು ತತ್ತ್ವಶಾಸ್ತ್ರಗಳಿಂದ ಪ್ರಭಾವಿತನಾದ ಇಂದಿನ ಭಕ್ತನು ಪುರಾತನ ಕಾಲದ ಪದ್ಧತಿಗಳನ್ನು ಪ್ರಶ್ನಿಸಬಾರದೇ? ಪ್ರಶ್ನಿಸಲು ಒಬ್ಬನು ವಿಚಾರವಾದಿಯೇ ಆಗಿರಬೇಕಿಲ್ಲ,” ಎಂದು ಅಭಿಪ್ರಾಯಪಟ್ಟರು.
ತಂತ್ರಿಗಳ ಪರ ಹಾಜರಾದ ಹಿರಿಯ ವಕೀಲ ವಿ. ಗಿರಿ ಅವರು, “ದೇವಸ್ಥಾನದ ಆಚರಣೆಗಳು ಧರ್ಮದ ಅವಿಭಾಜ್ಯ ಅಂಗಗಳಾಗಿವೆ. ಭಕ್ತನು ದೇವಸ್ಥಾನಕ್ಕೆ ಹೋದಾಗ ದೇವತೆಯ ಮೂಲ ಗುಣಲಕ್ಷಣಗಳನ್ನು ಒಪ್ಪಿಕೊಳ್ಳಬೇಕು. ಶಬರಿಮಲೆಯ ಅಯ್ಯಪ್ಪ ಸ್ವಾಮಿಯು ‘ನೈಷ್ಠಿಕ ಬ್ರಹ್ಮಚಾರಿ’ಯಾಗಿರುವುದರಿಂದ, ಆ ಗುಣಲಕ್ಷಣಗಳಿಗೆ ಪೂರಕವಾಗಿಯೇ ಆಚರಣೆಗಳು ನಡೆಯಬೇಕು,” ಎಂದು ವಾದಿಸಿದರು. ಪಂಗಡದ ಆಚರಣೆಗಳನ್ನು ಪ್ರಶ್ನಿಸುವುದು ನಂಬಿಕೆಯ ಮಿತಿಯನ್ನು ಮೀರಿದಂತಾಗುತ್ತದೆ ಎಂಬುದು ಅವರ ವಾದವಾಗಿತ್ತು.
ಇದೇ ವೇಳೆ ಪಂದಳಂ ರಾಜಮನೆತನ ಮತ್ತು ವಿವಿಧ ಹಿಂದೂ ಸಂಘಟನೆಗಳ ಪರ ಹಾಜರಾದ ಹಿರಿಯ ವಕೀಲ ಜೆ. ಸಾಯಿ ದೀಪಕ್ ಅವರು, “ಶತಮಾನಗಳಷ್ಟು ಹಳೆಯದಾದ ಧಾರ್ಮಿಕ ಸಂಪ್ರದಾಯಗಳ ‘ವೈಚಾರಿಕತೆ’ಯನ್ನು ಪರೀಕ್ಷಿಸಲು ನ್ಯಾಯಾಲಯಗಳನ್ನು ಹಿಂಬಾಗಿಲಾಗಿ ಬಳಸಬಾರದು,” ಎಂದು ವಾದಿಸಿದರು.
ಇದಕ್ಕೆ ಪ್ರತಿಕ್ರಿಯಿಸಿದ ಮುಖ್ಯ ನ್ಯಾಯಮೂರ್ತಿಗಳು, “ಸಾಮಾಜಿಕ ಸುಧಾರಣೆಯ ಹೆಸರಿನಲ್ಲಿ ರಾಜ್ಯವು ಧಾರ್ಮಿಕ ಆಚರಣೆಯನ್ನು ನಿಷೇಧಿಸಿದರೆ, ಅದನ್ನು ನ್ಯಾಯಾಲಯ ಪರಿಶೀಲಿಸಬಾರದು ಎನ್ನುವುದನ್ನು ಒಪ್ಪುವುದು ಕಷ್ಟ. ನ್ಯಾಯಾಂಗ ಪರಿಶೀಲನೆಯ ಅಧಿಕಾರದ ಮೇಲೆ ಇಷ್ಟೊಂದು ದಾಳಿ ಮಾಡುವ ಅಗತ್ಯವಿಲ್ಲ,” ಎಂದು ಮೌಖಿಕವಾಗಿ ತಿಳಿಸಿದರು.
ನ್ಯಾಯಮೂರ್ತಿ ಬಿ.ವಿ. ನಾಗರತ್ನ ಅವರು ವಿವಿಧ ಶಿವ ದೇವಾಲಯಗಳ ಆಗಮಗಳ ಬಗ್ಗೆ ಪ್ರಸ್ತಾಪಿಸಿ, “ಕೆಲವು ದೇವಾಲಯಗಳಲ್ಲಿ ಲಿಂಗವನ್ನು ಮುಟ್ಟಬಹುದು, ಇನ್ನು ಕೆಲವು ಕಡೆ ಮುಟ್ಟುವಂತಿಲ್ಲ. ಇದು ಆ ವ್ಯಕ್ತಿ ಯಾರು ಎಂಬುದಕ್ಕಿಂತ ಹೆಚ್ಚಾಗಿ, ಆ ದೇವಸ್ಥಾನದ ಅನುಷ್ಠಾನದ ಅವಶ್ಯಕತೆಯಾಗಿರುತ್ತದೆ. ಇದಕ್ಕೂ ಅಸ್ಪೃಶ್ಯತೆಗೂ ಸಂಬಂಧವಿಲ್ಲ,” ಎಂದು ಗಮನಿಸಿದರು.
ಈ ಪ್ರಕರಣದ ವಿಚಾರಣೆ ಮುಂದುವರಿಯಲಿದ್ದು, ಸಂಪ್ರದಾಯ ಮತ್ತು ಸಮಾನತೆಯ ನಡುವಿನ ಈ ಕಾನೂನು ಹೋರಾಟ ಇಡೀ ದೇಶದ ಗಮನ ಸೆಳೆದಿದೆ.