ಭಾರತೀಯ ಚಿತ್ರರಂಗದ ‘ನ್ಯಾಷನಲ್ ಕ್ರಶ್’ ರಶ್ಮಿಕಾ ಮಂದಣ್ಣ ಅವರು ಜಾಗತಿಕ ಮಟ್ಟದಲ್ಲಿ ಮತ್ತೊಂದು ಅಪರೂಪದ ಮೈಲಿಗಲ್ಲು ಸ್ಥಾಪಿಸಿದ್ದಾರೆ. ಜಪಾನ್ನ ಟೋಕಿಯೊದಲ್ಲಿ ನಡೆಯಲಿರುವ ಪ್ರತಿಷ್ಠಿತ ‘ಕ್ರಂಚೈರೋಲ್ ಅನಿಮೆ ಪ್ರಶಸ್ತಿ-2026’ (Crunchyroll Anime Awards) ಸಮಾರಂಭದಲ್ಲಿ ಸತತ ಎರಡನೇ ಬಾರಿಗೆ ಭಾಗವಹಿಸುವ ಮೂಲಕ ಈ ಗೌರವಕ್ಕೆ ಪಾತ್ರರಾದ ಮೊದಲ ಭಾರತೀಯ ಚಿತ್ರನಟಿ ಎಂಬ ಐತಿಹಾಸಿಕ ದಾಖಲೆ ಬರೆದಿದ್ದಾರೆ.
ಅನಿಮೇಟೆಡ್ ಸಿನಿಮಾ ಮತ್ತು ವೆಬ್ ಸರಣಿಗಳ ಸಾಧಕರಿಗಾಗಿ ನೀಡಲಾಗುವ ಈ ಪ್ರಶಸ್ತಿಗಳ 10ನೇ ಆವೃತ್ತಿಯು ಮೇ 23, 2026 ರಂದು ಟೋಕಿಯೊದ ಗ್ರ್ಯಾಂಡ್ ಪ್ರಿನ್ಸ್ ಹೋಟೆಲ್ ಶಿನ್ ತಕನಾವಾದಲ್ಲಿ ಜರುಗಲಿದೆ. ಈ ವೇದಿಕೆಯಲ್ಲಿ ರಶ್ಮಿಕಾ ಅವರು ಹಾಲಿವುಡ್ ನಟ ವಿನ್ಸ್ಟನ್ ಡ್ಯೂಕ್ ಮತ್ತು ಜಪಾನಿನ ತಾರೆ ಅಸುಕಾ ಸೈಟೊ ಅವರಂತಹ ಜಾಗತಿಕ ಸೆಲೆಬ್ರಿಟಿಗಳೊಂದಿಗೆ ಸೇರಿ ವಿಜೇತರಿಗೆ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ. ರಶ್ಮಿಕಾ ಅವರ ಅನಿಮೆ ಪ್ರೇಮ ಮತ್ತು ಜನಪ್ರಿಯತೆಯನ್ನು ಗುರುತಿಸಿರುವ ಕ್ರಂಚೈರೋಲ್ ಸಂಸ್ಥೆಯು ಅವರನ್ನು ಅಧಿಕೃತವಾಗಿ “ಇಂಡಿಯಾಸ್ ಸ್ವೀಟ್ ಹಾರ್ಟ್” ಎಂದು ಕರೆದಿದೆ. ‘ಪುಷ್ಪ’ ಚಿತ್ರದ ಶ್ರೀವಲ್ಲಿ ಪಾತ್ರದ ಮೂಲಕ ಜಪಾನ್ನಲ್ಲಿ ಅಪಾರ ಅಭಿಮಾನಿಗಳನ್ನು ಗಳಿಸಿರುವ ರಶ್ಮಿಕಾ, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತೀಯ ಚಿತ್ರರಂಗದ ಬ್ರ್ಯಾಂಡ್ ಅಂಬಾಸಿಡರ್ ಆಗಿ ಹೊರಹೊಮ್ಮಿದ್ದಾರೆ. ಪ್ರಸ್ತುತ ಈ ಪ್ರಶಸ್ತಿಗಳಿಗಾಗಿ ಅಭಿಮಾನಿಗಳ ಮತದಾನ ಪ್ರಕ್ರಿಯೆ ಚಾಲ್ತಿಯಲ್ಲಿದ್ದು, ಏಪ್ರಿಲ್ 15 ರವರೆಗೆ ಮತ ಚಲಾಯಿಸಲು ಅವಕಾಶವಿದೆ.
ಇತ್ತೀಚೆಗಷ್ಟೇ ನಟ ವಿಜಯ್ ದೇವರಕೊಂಡ ಅವರೊಂದಿಗೆ ವಿವಾಹವಾಗಿ ‘ತೆಲುಗು ಸೊಸೆ’ ಎನಿಸಿಕೊಂಡಿರುವ ರಶ್ಮಿಕಾ, ವೃತ್ತಿ ಬದುಕಿನಲ್ಲೂ ಅತ್ಯುತ್ತಮ ಫಾರ್ಮ್ನಲ್ಲಿದ್ದಾರೆ. ಇತ್ತೀಚೆಗಷ್ಟೇ ‘ಗದ್ದರ್ ಚಲನಚಿತ್ರ ಪ್ರಶಸ್ತಿ’ಯಲ್ಲಿ ಅತ್ಯುತ್ತಮ ನಟಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿರುವ ಇವರು, ಸದ್ಯ ‘ಪುಷ್ಪ 2’, ‘ಕುಬೇರ’, ‘ಗರ್ಲ್ಫ್ರೆಂಡ್’ ಮತ್ತು ‘ಮೈಸಾ’ ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ.