ಜೇಬಿನಲ್ಲಿದ್ದ ಮೊಬೈಲ್ ಫೋನ್ ಸ್ಪೋಟ, ಶಾಲಾ ಮುಖ್ಯೋಪಾಧ್ಯಾಯ ಮೃತ್ಯು..!

ನಾಗ್ಪುರ  : ಜೇಬಿನಲ್ಲಿದ್ದ ಮೊಬೈಲ್ ಫೋನ್ ಸ್ಫೋಟಗೊಂಡು ಶಾಲಾ ಮುಖ್ಯೋಪಾಧ್ಯಾಯರೊಬ್ಬರು ಮೃತಪಟ್ಟಿರುವ ಘಟನೆ ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಡೆದಿದೆ.

ಮೃತರನ್ನು ಮಹಾರಾಷ್ಟ್ರದ ಅರ್ಜುನಿ ಮೊರ್ಗಾಂವ್ ತಾಲ್ಲೂಕಿನ ಜಿಲ್ಲಾ ಪರಿಷತ್ ಶಾಲೆಯ ಮುಖ್ಯೋಪಾಧ್ಯಾಯ ಸುರೇಶ್ ಸಂಗ್ರಾಮ್ (54) ಎಂದು ಗುರುತಿಸಲಾಗಿದೆ. ಘಟನೆಯಲ್ಲಿ ಅವರ ಸಂಬಂಧಿಕರೊಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಸುರೇಶ್ ಸಂಗ್ರಾಮ್ ಮತ್ತು ಅವರ ಸೋದರಸಂಬಂಧಿ ನಾಥು ಗಾಯಕ್ವಾಡ್ (65) ಅವರು ಬಾಂದ್ರಾ ಜಿಲ್ಲೆಯ ಸಕೋಲಿಯಲ್ಲಿ ನಡೆದ ಮದುವೆಯಲ್ಲಿ ಭಾಗವಹಿಸಲು ಬೈಕಿನಲ್ಲಿ ತೆರಳುತ್ತಿದ್ದಾಗ ಈ ದುರಂತ ಘಟನೆ ನಡೆದಿದೆ. ಅವರು ತಮ್ಮ ಊರಾದ ಶಿರೆಗಾಂವ್ಬಂದ್ ತೋಲಾದಿಂದ ಹೊರಟ ಕೂಡಲೇ, ಅವರ ಶರ್ಟ್ನ ಜೇಬಿನಲ್ಲಿದ್ದ ಫೋನ್ ಇದ್ದಕ್ಕಿದ್ದಂತೆ ಸ್ಫೋಟಗೊಂಡಿತು. ಸಂಗ್ರಾಮ್ ಅವರ ಎದೆಯ ಎಡಭಾಗ ಮತ್ತು ಎಡಗೈಗೆ ಗಂಭೀರ ಸುಟ್ಟ ಗಾಯಗಳಾಗಿ ಪ್ಲಾಸ್ಟಿಕ್ ಕವರ್ ಕರಗಿ ಅವನ ಎಡಗೈಗೆ ಅಂಟಿಕೊಂಡಿತು. ಸ್ಪೋಟ ನಿಯಂತ್ರಣ ಕಳೆದುಕೊಂಡ ನಂತರ ಬೈಕ್ ಪಲ್ಟಿಯಾದಾಗ ನಾಥು ಗಾಯಗೊಂಡಿದ್ದರು. ಇಬ್ಬರನ್ನು ಸಕೋಲಿಯ ಸರ್ಕಾರಿ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಸುರೇಶ್ ಸಂಗ್ರಾಮ್ ತೀವ್ರವಾಗಿ ಗಾಯಗೊಂಡಿದ್ದರಿಂದ ಮೃತಪಟ್ಟಿದ್ದಾರೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.