ಮಂಗಳೂರು: ಆಕಸ್ಮಿಕ ಬೆಂಕಿಗೆ-ಸುಟ್ಟು ಭಸ್ಮವಾದ ಮೊಬೈಲ್ ಟವರ್‌

ಮಂಗಳೂರು, ಮೇ 14: ಮೊಬೈಲ್ ಟವರ್ ವೊಂದರಲ್ಲಿ ಏಕಾ-ಏಕಿ ಬೆಂಕಿ ಕಾಣಿಸಿಕೊಂಡು ಬಳಿಕ ಮೊಬೈಲ್  ಟವರ್ ಸಂಪೂರ್ಣವಾಗಿ ಸುಟ್ಟು ಭಸ್ಮವಾದ ಘಟನೆ  ಮಂಗಳೂರು  ನಗರದ ಬಂದರು ಪ್ರದೇಶದಲ್ಲಿ ಇಂದು ಸಂಭವಿಸಿದೆ.

ಇಲ್ಲಿನ ಸೌತ್ ವಾರ್ಫ್ ರೋಡ್ ನ ಬಳಿ ಇರುವ ಕಟ್ಟಡದಲ್ಲಿ ಈ ದುರ್ಘಟನೆ ನಡೆದಿದೆ. ಖಾಸಗಿ ಸ್ಥಳಲ್ಲಿರುವ  ಬಹುಮಹಡಿ  ಕಟ್ಟಡ ವೊಂದರ ಎರಡನೇ  ಮಹಡಿಯಲ್ಲಿ ಬಿ.ಎಸ್.ಎನ್.ಎಲ್ ಹಾಗೂ ಜೀಯೊ ಮೊಬೈಲ್ ಟವರ್ ಗಳಿದ್ದು ಮಧ್ಯಾಹ್ನ ಎರಡುವರೆ ಗಂಟೆ ವೇಳೆಗೆ ಬಿ.ಎಸ್.ಎನ್.ಎಲ್ ಟವರ್‌ ನಲ್ಲಿ ದಿಢೀರನೆ ಬೆಂಕಿ ಕಾಣಿಸಿ ಕೊಂಡಿದೆ.

ಈ ಬಗ್ಗೆ ಸ್ಥಳೀಯರು ಕೂಡಲೇ ಅಗ್ನಿಶಾಮಕದಳಕ್ಕೆ ಮಾಹಿತಿ ನೀಡಿದ್ದಾರೆ. ಮಾಹಿತಿ ಪಡೆದು ಸ್ಥಳಕ್ಕೆ ತೆರಳಿದ ಅಗ್ನಿಶಾಮದಳದ ಸಿಬಂದಿ  ಬೆಂಕಿ ನಂದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಅದರೆ ಅಷ್ಟರಲ್ಲಿ ಬಿಎಸ್‌ ಎನ್‌ ಎಲ್‌ ಟವರ್ ಸಂಪೂರ್ಣವಾಗಿ  ಸುಟ್ಟು ಭಸ್ಮವಾಗಿದೆ.

ಈ ಘಟನೆಯಿಂದ ಲಕ್ಷಾಂತರ  ರೂಪಾಯಿ ನಷ್ಟ ಸಂಭವಿಸಿದೆ ಎನ್ನಲಾಗಿದೆ. ಘಟನೆಗೆ  ಸ್ಪಷ್ಟವಾದ ಕಾರಣ ತಿಳಿದು ಬಂದಿಲ್ಲ. ವಿದ್ಯುತ್ ಶಾರ್ಟ್ ಸಕ್ಯೂಟ್ ನಿಂದ ಅವಘಡ ಸಂಭವಿಸಿರ ಬಹುದು  ಎಂದು ಶಂಕಿಸಲಾಗಿದೆ.