LATEST NEWS
ದಿಬ್ಬಣದ ವಾಹನವಾದ ಜೆಸಿಬಿ
ದಿಬ್ಬಣದ ವಾಹನವಾದ ಜೆಸಿಬಿ
ಪುತ್ತೂರು ಜೂನ್ 18: ಸಂತೋಷದ ಶುಭ ಘಳಿಗೆಯಲ್ಲಿ ತನಗೆ ಬದುಕು ಕಟ್ಟಿ ಕೊಟ್ಟವರನ್ನು ನೆನಪಿಸೋದು ಸಾಮಾನ್ಯವೇ. ಆದರೆ ಹೀಗೆ ನೆನಪಿಸದ ಜನರೂ ನಮ್ಮ ನಿಮ್ಮ ನಡುವೇನೇ ಇದ್ದಾರೆ. ಆದರೆ ಪುತ್ತೂರಿನ ಯುವಕನೊಬ್ಬ ತನಗೆ ಜೀವನಾಧಾರವಾದ ಜೆಸಿಬಿಯನ್ನು ತನ್ನ ಮದುವೆಯ ದಿಬ್ಬಣದ ವಾಹನವನ್ನಾಗಿ ಆಯ್ದುಕೊಂಡಿದ್ದಾರೆ.
ಕಳೆದ ಹಲವು ವರ್ಷಗಳಿಂದ ಇದೇ ಜೆಸಿಬಿಯಲ್ಲಿ ಗಳಿಸಿದ ಗಳಿಕೆಯಲ್ಲೇ ಜೀವನ ನಿರ್ವಹಿಸುತ್ತಿದ್ದ ಪುತ್ತೂರಿನ ಸಂಟ್ಯಾರು ನಿವಾಸಿ ಚೇತನ್ ಈ ರೀತಿ ಜೆಸಿಬಿಯಲ್ಲಿ ದಿಬ್ಬಣ ಹತ್ತಿದ ಯುವಕನಾಗಿದ್ದಾರೆ. ತಿಂಗಳಾಡಿ ಸಮೀಪದ ಬೋಳೋಡಿಯ ಮಮತಾ ಎನ್ನುವ ಯುವತಿಯೊಂದಿಗೆ ಇಂದು ಹಸಮಣೆಗೆ ಏರಿದ ಚೇತನ್ ಮದುವೆ ಕಾರ್ಯಕ್ರಮಗಳೆಲ್ಲಾ ಮುಗಿದ ಬಳಿಕ ಸೀದಾ ತನ್ನ ಮದುಮಗಳೊಂದಿಗೆ ಜೆಸಿಬಿ ಹತ್ತಿದ್ದಾರೆ.
ಸ್ನೇಹಿತರೆಲ್ಲಾ ಸೇರಿ ಜೆಸಿಬಿಯನ್ನು ಹೂ ಹಾಗೂ ಇತರ ಅಲಂಕಾರಿಕ ವಸ್ತುಗಳಿಂದ ಶೃಂಗರಿಸಿದ್ದರು. ಜೆಸಿಬಿಯಲ್ಲಿ ಬಂದ ವಧುವರರನ್ನು ಕಂಡು ಹೀಗೂ ಉಂಟೇ ಎಂದು ಹುಬ್ಬೇರಿಸಿದ್ದಾರೆ. ಆದರೆ ಚೇತನ್ ಗೆ ಮಾತ್ರ ಬದುಕು ಕೊಟ್ಟ ಈ ಜೆಸಿಬಿ ಯಾವುದೇ ಐಷಾರಾಮಿ ಕಾರಿಗೆ ಕಡಿಮೆ ಎಂದು ಅನಿಸಿರಲಿಲ್ಲ.
