ವಾಷಿಂಗ್ಟನ್ ಮಾರ್ಚ್ 07: ಅಮೇರಿಕಾದ ಮೇಲಿನ ಸಿಟ್ಟಿಗೆ ಗಲ್ಪ್ ರಾಷ್ಟ್ರಗಳ ಮೇಲೆ ದಾಳಿ ನಡೆಸುತ್ತಿದ್ದ ಇರಾನ್ ಈಗ ಸೋಲೊಪ್ಪಿಕೊಂಡಿದೆ ಮತ್ತು ತನ್ನ ನೆರೆಹೊರೆಯ ರಾಷ್ಟ್ರಗಳಿಗೆ ಶರಣಾಗಿ ಕ್ಷಮೆಯಾಚಿಸಿದೆ” ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರ ಘೋಷಿಸಿದ್ದಾರೆ.
ತಮ್ಮ ‘ಟ್ರೂತ್ ಸೋಶಿಯಲ್’ ಜಾಲತಾಣದಲ್ಲಿ ಸರಣಿ ಪೋಸ್ಟ್ಗಳನ್ನು ಹಾಕಿರುವ ಟ್ರಂಪ್, ಇರಾನ್ ಇನ್ನು ಮುಂದೆ “ಮಧ್ಯಪ್ರಾಚ್ಯದ ಗೂಂಡಾ” ಅಲ್ಲ, ಬದಲಾಗಿ “ಮಧ್ಯಪ್ರಾಚ್ಯದ ಸೋತ ರಾಷ್ಟ್ರ” ಎಂದು ಲೇವಡಿ ಮಾಡಿದ್ದಾರೆ.
ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಅವರು ನೆರೆಹೊರೆಯ ರಾಷ್ಟ್ರಗಳನ್ನು “ಸಹೋದರರು” ಎಂದು ಕರೆದ ಬೆನ್ನಲ್ಲೇ ಟ್ರಂಪ್ ಈ ಹೇಳಿಕೆ ನೀಡಿದ್ದಾರೆ. “ನೆರೆಯ ರಾಷ್ಟ್ರಗಳಿಂದ ದಾಳಿಯಾಗದ ಹೊರತು ಅವರ ಮೇಲೆ ಕ್ಷಿಪಣಿ ಹಾರಿಸಬೇಡಿ” ಎಂದು ಪೆಜೆಶ್ಕಿಯಾನ್ ತಮ್ಮ ಸಶಸ್ತ್ರ ಪಡೆಗಳಿಗೆ ಸೂಚನೆ ನೀಡಿದ್ದರು. ಇದು ದಶಕಗಳ ಕಾಲದ ಉದ್ವಿಗ್ನತೆಯನ್ನು ಕಡಿಮೆ ಮಾಡುವ ಇರಾನ್ನ ದೊಡ್ಡ ಪ್ರಯತ್ನ ಎಂದು ವಿಶ್ಲೇಷಿಸಲಾಗುತ್ತಿದೆ.
ಅಮೆರಿಕ-ಇಸ್ರೇಲ್ ದಾಳಿಗೆ ಮಣಿದ ಇರಾನ್?
ಇರಾನ್ನ ಈ ಮೃದು ಧೋರಣೆಯು ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ನಿರಂತರ ದಾಳಿಗಳ ಫಲ ಎಂದು ಟ್ರಂಪ್ ಪ್ರತಿಪಾದಿಸಿದ್ದಾರೆ. “ಇರಾನ್, ಇನ್ನು ಮುಂದೆ ಗುಂಡು ಹಾರಿಸುವುದಿಲ್ಲ ಎಂದು ಭರವಸೆ ನೀಡಿದೆ. ಸಾವಿರಾರು ವರ್ಷಗಳ ಇತಿಹಾಸದಲ್ಲಿ ಇರಾನ್ ತನ್ನ ನೆರೆಹೊರೆಯವರಿಗೆ ಸೋತಿರುವುದು ಇದೇ ಮೊದಲು” ಎಂದು ಅವರು ಬರೆದುಕೊಂಡಿದ್ದಾರೆ. ಮಧ್ಯಪ್ರಾಚ್ಯದ ದೇಶಗಳು ಈ ಬೆಳವಣಿಗೆಗಾಗಿ ತಮಗೆ ಧನ್ಯವಾದ ಅರ್ಪಿಸಿವೆ ಎಂದು ಅವರು ಈ ಸಂದರ್ಭದಲ್ಲಿ ತಿಳಿಸಿದ್ದಾರೆ.
ಮತ್ತೆ ‘ವಿನಾಶ’ದ ಎಚ್ಚರಿಕೆ:
ಇಷ್ಟಕ್ಕೇ ನಿಲ್ಲದ ಟ್ರಂಪ್, ಶನಿವಾರವೇ ಇರಾನ್ ಮೇಲೆ “ತೀವ್ರ ಹೊಡೆತ” ಬೀಳಲಿದೆ ಎಂದು ಹೊಸ ಬೆದರಿಕೆಯನ್ನು ಒಡ್ಡಿದ್ದಾರೆ. “ಇರಾನ್ನ ಕೆಟ್ಟ ನಡವಳಿಕೆಯಿಂದಾಗಿ ಸಂಪೂರ್ಣ ವಿನಾಶ ಮತ್ತು ಸಾವು ನಿಶ್ಚಿತ. ಈ ಮೊದಲು ಗುರಿಯಾಗದ ಪ್ರದೇಶಗಳ ಮೇಲೂ ಈಗ ದಾಳಿ ನಡೆಸಲಾಗುವುದು” ಎಂದು ಟ್ರಂಪ್ ಎಚ್ಚರಿಸಿದ್ದಾರೆ.