ಮೋದಿ ಭದ್ರತೆಗೆ ನಿಯೋಜನೆಗೊಂಡ ಮಹಿಳಾ ಎಸ್ ಪಿಜಿ ಕಮಾಂಡೋ

ಮೋದಿ ಭದ್ರತೆಗೆ ನಿಯೋಜನೆಗೊಂಡ ಮಹಿಳಾ ಎಸ್ ಪಿಜಿ ಕಮಾಂಡೋ

ಮಂಗಳೂರು ಮೇ 5: ಕರ್ನಾಟಕ ವಿಧಾನಸಭಾ ಚುನಾವಣೆ ಹಿನ್ನಲೆಯಲ್ಲಿ ಮಂಗಳೂರಿನಲ್ಲಿ ಬಿಜೆಪಿ ಬೃಹತ್ ಚುನಾವಣಾ ಪ್ರಚಾರ ಸಭೆಯನ್ನು ಏರ್ಪಡಿಸಿತ್ತು. ಮಂಗಳೂರಿನ ಕೇಂದ್ರ ಮೈದಾನದಲ್ಲಿ ನಡೆದ ಬೃಹತ್ ರಾಲಿಯಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಭಾಗವಹಿಸಿದ್ದರು. ಪ್ರಧಾನಿ ನರೇಂದ್ರ ಮೋದಿ ಅವರ ವಿಶೇಷ ಭದ್ರತಾ ಪಡೆಯ ಮಹಿಳಾ ಕಮಾಂಡೋ ಒಬ್ಬರು ಇಡೀ ಸಮಾವೇಶದಲ್ಲಿ ಗಮನ ಸೆಳೆದರು.

ಪ್ರಧಾನಿ ನರೇಂದ್ರ ಮೋದಿ ಆಗಮನದ ಹಿನ್ನಲೆಯಲ್ಲಿ ಜಿಲ್ಲೆಯಾದ್ಯಂತ ಬಿಗಿ ಪೊಲೀಸ್ ಬಂದೋಬಸ್ತ್ ಏರ್ಪಡಿಸಲಾಗಿತ್ತು. ವಿಶೇಷ ಭದ್ರತಾ ಪಡೆಯ ನೇತೃತ್ವದಲ್ಲಿ ನಗರದಾದ್ಯಂತ ಬಿಗಿ ಬಂದೋಬಸ್ತ್ ಕಲ್ಪಿಸಲಾಗಿತ್ತು. ಸಂಜೆ 6 ಗಂಟೆಗೆ ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಬಂದಿಳಿದ ನರೇಂದ್ರ ಮೋದಿ ನಂತರ ರಸ್ತೆ ಮಾರ್ಗವಾಗಿ ಕೇಂದ್ರ ಮೈದಾನಕ್ಕೆ ಬಂದರು.

ಪ್ರಧಾನಿ ನರೇಂದ್ರ ಮೋದಿ ಅವರ ಭದ್ರತೆಯ ಹೊಣೆ ಹೊತ್ತಿರುವ ವಿಶೇಷ ಭದ್ರತಾ ಪಡೆಯ (ಎಸ್ ಪಿಜಿ )ಯ ಮಹಿಳಾ ಕಮಾಂಡೊ ಒಬ್ಬರು ಬಿಜೆಪಿ ರಾಲಿಯಲ್ಲಿ ಗಮನ ಸೆಳೆದರು. ಗಂಭೀರವಾಗಿ ಅತ್ಯಾಧುನಿಕ ಅಸಾಲ್ಟ್ ರೈಫಲ್ ಹಿಡಿದು ಸಭಾಂಗಣದ ಕೆಳ ಭಾಗದಲ್ಲಿ ನಿಂತಿರುವ ಅವರ ಪೋಟೋ ಈಗ ವೈರಲ್ ಆಗಿದೆ.

ಪ್ರಧಾನಮಂತ್ರಿಯೊಬ್ಬರಿಗೆ ಮಹಿಳಾ ಎಸ್ ಪಿಜಿ ಕಮಾಂಡೊ ಒಬ್ಬರು ಭದ್ರತೆಗೆ ನಿಯೋಜನೆಗೊಂಡಿರುವುದು ಜನರ ಗಮನ ಸೆಳೆಯಿತು. ಈ ಕುರಿತು ಸಾರ್ವಜನಿಕ ವಲಯದಲ್ಲಿ ಭಾರಿ ಪ್ರಶಂಸೆ ವ್ಯಕ್ತವಾಗಿದೆ. ಪ್ರಧಾನಿಯೊಬ್ಬರ ರಕ್ಷಣಾ ಕವಚವಾಗಿ ಮಹಿಳಾ ಕಮಾಂಡೋ ನಿಯೋಜನೆ ಮಹಿಳೆಯರ ಸಾಮರ್ಥ್ಯಕ್ಕೆ ಹಿಡಿದ ಕೈ ಗನ್ನಡಿಯಾಗಿದೆ ಎಂಬ ಮಾತುಗಳು ಕೇಳಿ ಬರುತ್ತಿದೆ.