ಬೈರುತ್ (ಲೆಬನಾನ್), ಮಾರ್ಚ್ 20: ದಕ್ಷಿಣ ಲೆಬನಾನ್ನಲ್ಲಿ ನಡೆಯುತ್ತಿರುವ ಸಂಘರ್ಷದ ನಡುವೆ ಲೈವ್ ವರದಿಗಾರಿಕೆ ಮಾಡುತ್ತಿದ್ದ ಇಬ್ಬರು ಪತ್ರಕರ್ತರು ಕ್ಷಿಪಣಿ ಸ್ಫೋಟದಿಂದ ಕೂದಲೆಳೆಯ ಅಂತರದಲ್ಲಿ ಪಾರಾದ ಘಟನೆ ನಡೆದಿದೆ. ನೇರ ಪ್ರಸಾರದ ವೇಳೆ ಕೇವಲ 10 ಮೀಟರ್ ದೂರದಲ್ಲಿ ಕ್ಷಿಪಣಿಯೊಂದು ಅಪ್ಪಳಿಸಿದ್ದು, ಭೀಕರ ದೃಶ್ಯ ಕ್ಯಾಮರಾದಲ್ಲಿ ಸೆರೆಯಾಗಿದೆ.
ರಷ್ಯಾದ ‘RT’ (Russia Today) ಮಾಧ್ಯಮ ಸಂಸ್ಥೆಯ ಲೆಬನಾನ್ ಬ್ಯೂರೋ ಮುಖ್ಯಸ್ಥ ಸ್ಟೀವ್ ಸ್ಲೆನಿ ಹಾಗೂ ಕ್ಯಾಮರಾಮನ್ ಅಲಿ ರಿದಾ ಅವರು ದಕ್ಷಿಣ ಲೆಬನಾನ್ನ ಅಲ್-ಖಸ್ಮಿಯಾ ಸೇತುವೆ ಸಮೀಪ ವರದಿ ನೀಡುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ದಿಢೀರನೆ ಸಂಭವಿಸಿದ ಸ್ಫೋಟದಿಂದ ಭಾರಿ ಪ್ರಮಾಣದಲ್ಲಿ ಧೂಳು, ಹೊಗೆ ಹಾಗೂ ಅವಶೇಷಗಳು ಗಾಳಿಯಲ್ಲಿ ಹರಡಿಕೊಂಡಿದ್ದು, ಇಬ್ಬರೂ ನೆಲಕ್ಕುರುಳಿದ್ದಾರೆ.
ಸ್ಫೋಟದ ಪರಿಣಾಮ ಗಾಜಿನ ಚೂರುಗಳು ತಗುಲಿ ಇಬ್ಬರು ಪತ್ರಕರ್ತರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ತಕ್ಷಣ ಅವರನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ಮೂಲಗಳು ತಿಳಿಸಿವೆ.