ವಾಷಿಂಗ್ಟನ್ ಎಪ್ರಿಲ್ 04: ಅಮೆರಿಕಾ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ಸ್ಫೋಟಕ ಹಂತ ತಲುಪಿದ್ದು, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಟೆಹ್ರಾನ್ ಆಡಳಿತಕ್ಕೆ ಅಂತಿಮ ಗಡುವು ನೀಡಿದ್ದಾರೆ. “ಶಾಂತಿ ಒಪ್ಪಂದ ಮಾಡಿಕೊಳ್ಳಲು ಅಥವಾ ಹಾರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸಲು ನೀಡಿದ್ದ ಸಮಯ ಮೀರುತ್ತಿದೆ. ಇನ್ನು 48 ಗಂಟೆಗಳ ನಂತರ ಇರಾನ್ ಮೇಲೆ ನರಕವೇ ಸುರಿಯಲಿದೆ” ಎಂದು ಟ್ರಂಪ್ ತಮ್ಮ ‘ಟ್ರೂತ್ ಸೋಶಿಯಲ್’ ಖಾತೆಯಲ್ಲಿ ಎಚ್ಚರಿಸಿದ್ದಾರೆ.
ಮಾರ್ಚ್ 26 ರಂದು ಇರಾನ್ ಮನವಿಯ ಮೇರೆಗೆ ಅಮೆರಿಕಾ ತನ್ನ ದಾಳಿಯನ್ನು ಹತ್ತು ದಿನಗಳ ಕಾಲ ಮುಂದೂಡಿತ್ತು. ಇರಾನ್ನ ಇಂಧನ ಮೂಲಸೌಕರ್ಯಗಳ ಮೇಲೆ ಅಮೆರಿಕಾ ನಡೆಸುತ್ತಿರುವ ಭೀಕರ ದಾಳಿಗೆ ತಡೆ ನೀಡುವಂತೆ ಟೆಹ್ರಾನ್ ಕೋರಿಕೊಂಡಿತ್ತು. ಈ ಗಡುವನ್ನು ಏಪ್ರಿಲ್ 6 ರವರೆಗೆ ವಿಸ್ತರಿಸಲು ಟ್ರಂಪ್ ಒಪ್ಪಿದ್ದರು. ಆದರೆ, ಅಮೆರಿಕಾ ಮುಂದಿಟ್ಟಿರುವ ಶಾಂತಿ ಪ್ರಸ್ತಾಪವು “ಏಕಪಕ್ಷೀಯ ಮತ್ತು ಅನ್ಯಾಯಯುತ” ಎಂದು ಕರೆದಿರುವ ಇರಾನ್, ಅದನ್ನು ತಿರಸ್ಕರಿಸಿದೆ.
ಈ ಬೆಳವಣಿಗೆಯಿಂದ ಕುಪಿತಗೊಂಡಿರುವ ಟ್ರಂಪ್, ಏಪ್ರಿಲ್ 6ರ ಗಡುವು ಮುಗಿಯುತ್ತಿದ್ದಂತೆ ಇರಾನ್ ಮೇಲೆ ಹಿಂದೆಂದೂ ಕಾಣದ ಭೀಕರ ದಾಳಿ ನಡೆಸುವ ಮುನ್ಸೂಚನೆ ನೀಡಿದ್ದಾರೆ. “ದೇವರಿಗೆ ಮಹಿಮೆ!” (Glory to God!) ಎಂದು ತಮ್ಮ ಪೋಸ್ಟ್ ಕೊನೆಗೊಳಿಸಿರುವ ಟ್ರಂಪ್, ಇರಾನ್ನ ವಿನಾಶದ ಮುನ್ಸೂಚನೆ ನೀಡಿದ್ದಾರೆ.