ವಾಷಿಂಗ್ಟನ್ ಎಪ್ರಿಲ್ 13: ಇರಾನ್ ಮೇಲಿನ ಅಮೆರಿಕದ ದಾಳಿ ಮತ್ತು ಯುದ್ಧದ ನೀತಿಯನ್ನು ಖಂಡಿಸಿದ್ದ ಪೋಪ್ ಲಿಯೋ ವಿರುದ್ಧ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಾಗ್ದಾಳಿ ನಡೆಸಿದ್ದಾರೆ. ಪೋಪ್ ಒಬ್ಬ “ಉದಾರವಾದಿ” ವ್ಯಕ್ತಿಯಾಗಿದ್ದು, ಅವರಿಗೆ ಅಪರಾಧಗಳನ್ನು ತಡೆಯುವಲ್ಲಿ ನಂಬಿಕೆಯಿಲ್ಲ ಮತ್ತು ವಿದೇಶಾಂಗ ನೀತಿಯ ಜ್ಞಾನವಿಲ್ಲ ಎಂದು ಟ್ರಂಪ್ ಟೀಕಿಸಿದ್ದಾರೆ.
ಇರಾನ್ನ ನಾಗರಿಕತೆಯನ್ನು ನಾಶಮಾಡುವುದಾಗಿ ಟ್ರಂಪ್ ನೀಡಿರುವ ಬೆದರಿಕೆ ಸ್ವೀಕಾರಾರ್ಹವಲ್ಲ ಎಂದು ಪೋಪ್ ಲಿಯೋ ಇತ್ತೀಚೆಗೆ ಆಕ್ಷೇಪ ವ್ಯಕ್ತಪಡಿಸಿದ್ದರು. “ಅಧಿಕಾರ ಪ್ರದರ್ಶನ ಸಾಕು, ಯುದ್ಧ ನಿಲ್ಲಲಿ” ಎಂದು ಕರೆ ನೀಡಿದ್ದ ಪೋಪ್, ಟ್ರಂಪ್ ಆಡಳಿತದ ಕಠಿಣ ವಲಸೆ ನೀತಿಗಳಿಂದ ಲಕ್ಷಾಂತರ ಜನರು ಸಂಕಷ್ಟಕ್ಕೆ ಸಿಲುಕಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದರು.
ಪೋಪ್ ಅವರ ಟೀಕೆಗೆ ತಮ್ಮ ‘ಟ್ರುಥ್ ಸೋಶಿಯಲ್’ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿರುವ ಟ್ರಂಪ್, “ನಾನು ಪೋಪ್ ಅವರ ಅಭಿಮಾನಿಯಲ್ಲ. ಅವರು ಕೇವಲ ಧಾರ್ಮಿಕ ಕಾರ್ಯಕ್ಕೆ ಸೀಮಿತವಾದರೆ ಸಾಕು. ಅಪರಾಧಗಳ ಕುರಿತು ಮೃದು ಧೋರಣೆ ಹೊಂದಿರುವ ಅವರಿಗೆ ರಾಜತಾಂತ್ರಿಕತೆಯ ಬಗ್ಗೆ ಏನೂ ತಿಳಿದಿಲ್ಲ” ಎಂದು ಕಿಡಿಕಾರಿದ್ದಾರೆ. ಫೆಬ್ರವರಿ 28ರ ದಾಳಿಯ ನಂತರ ಇರಾನ್ನಲ್ಲಿ ಎರಡು ವಾರಗಳ ಕದನ ವಿರಾಮ ಜಾರಿಯಲ್ಲಿದ್ದರೂ, ಉಭಯ ನಾಯಕರ ನಡುವಿನ ಈ ಸಂಘರ್ಷ ಹೊಸ ತಿರುವು ಪಡೆದಿದೆ..”