ಮಂಗಳೂರು ಮಾರ್ಚ್ 17: : ಶೇ. 25ರಷ್ಟು ಲಾಭಾಂಶದ ಆಮಿಷವೊಡ್ಡಿ 64 ವರ್ಷ ಪ್ರಾಯದ ವೃದ್ದರಿಂದ ಬರೋಬ್ಬರಿ ₹25,85,312 ಹಣವನ್ನು ಆನ್ಲೈನ್ ಟ್ರೇಡಿಂಗ್ ಹೆಸರಲ್ಲಿ ವಂಚಿಸಿರುವ ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ ಸಂತ್ರಸ್ತ 64 ವರ್ಷದ ವೃದ್ಧರು ಸೈಬರ್ ಕ್ರೈಂ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ಜನವರಿ 20, 2024 ರಂದು ಪಿರ್ಯಾದಿದಾರರ ಮೊಬೈಲ್ಗೆ ಅಪರಿಚಿತ ನಂಬರ್ನಿಂದ ಟ್ರೇಡಿಂಗ್ ಕುರಿತ ಸಂದೇಶ ಬಂದಿತ್ತು. ಟ್ರೇಡಿಂಗ್ನಲ್ಲಿ ಆಸಕ್ತಿ ಹೊಂದಿದ್ದ ಅವರು ಸಂವಹನ ಮುಂದುವರಿಸಿದ್ದರು. ಬಳಿಕ ಆರೋಪಿಗಳು ವೃದ್ದರನ್ನು ‘Etoro Analytical team 1332’ ಎಂಬ ವಾಟ್ಸಪ್ ಗ್ರೂಪ್ಗೆ ಸೇರಿಸಿಕೊಂಡಿದ್ದರು. ಈ ಗ್ರೂಪ್ನ ಲೀಡರ್ ಎಂದು ಹೇಳಿಕೊಂಡ ‘ಹರ್ಷೆ’ ಎಂಬ ವ್ಯಕ್ತಿ, Galaxy Digital Stock Exchange ನಲ್ಲಿ ಹಣ ಹೂಡಿಕೆ ಮಾಡುವಂತೆ ಪ್ರೇರೇಪಿಸಿದ್ದ. “ನೀವು ಹೂಡಿಕೆ ಮಾಡಿದರೆ 25% ಲಾಭ ಸಿಗುತ್ತದೆ, ಒಂದು ವೇಳೆ ನಷ್ಟವಾದರೆ ಕಂಪನಿಯೇ ಭರಿಸುತ್ತದೆ” ಎಂಬ ಆಮಿಷವೊಡ್ಡಿ ನಂಬಿಸಲಾಗಿತ್ತು. ಇದನ್ನು ನಂಬಿದ ಸಂತ್ರಸ್ತರು ಜನವರಿ 21, 2026 ರಿಂದ ಫೆಬ್ರವರಿ 12, 2026 ರ ನಡುವೆ ಹಂತ ಹಂತವಾಗಿ ವಿವಿಧ ಬ್ಯಾಂಕ್ ಖಾತೆಗಳಿಗೆ ಒಟ್ಟು ₹25,85,312 ವರ್ಗಾವಣೆ ಮಾಡಿದ್ದರು. ಕೊನೆಗೆ ಹಣವೂ ಸಿಗದೆ, ಲಾಭವೂ ಬಾರದೆ ವಂಚನೆಗೊಳಗಾಗಿರುವುದು ತಿಳಿದು ಬಂದಿದೆ.
ಸೈಬರ್ ಪೊಲೀಸರು ದೂರಿನಲ್ಲಿ ಉಲ್ಲೇಖಿಸಲಾದ ಈ ಕೆಳಗಿನ ಸಂಖ್ಯೆಗಳ ಮೇಲೆ ನಿಗಾ ಇಟ್ಟಿದ್ದಾರೆ:
+447938956179, +918282902235 (ಗ್ರೂಪ್ ಸೇರಿಸಲು ಬಳಸಿದ ಸಂಖ್ಯೆಗಳು)
+917681844542, +447735375732 (ಹರ್ಷೆ ಎಂಬಾತನ ಸಂಖ್ಯೆಗಳು)
🛑 ನೆನಪಿಡಿ:
ಅಪರಿಚಿತರು ನಿಮ್ಮನ್ನು ಟ್ರೇಡಿಂಗ್ ಗ್ರೂಪ್ಗಳಿಗೆ ಸೇರಿಸಿದರೆ ತಕ್ಷಣ ಎಕ್ಸಿಟ್ ಆಗಿ.
ಅತಿ ಹೆಚ್ಚು ಲಾಭದ ಭರವಸೆ ನೀಡುವ ಆ್ಯಪ್ಗಳು ಅಥವಾ ವೆಬ್ಸೈಟ್ಗಳು ಬಹುತೇಕ ನಕಲಿ.
ಯಾವುದೇ ಅಧಿಕೃತ ಟ್ರೇಡಿಂಗ್ ಕಂಪನಿ ವಾಟ್ಸಪ್ ಮೂಲಕ ಹಣ ವರ್ಗಾಯಿಸಲು ಕೇಳುವುದಿಲ್ಲ.
ಯಾರಾದರೂ ಇಂತಹ ವಂಚನೆಗೆ ಒಳಗಾಗಿದ್ದರೆ ತಕ್ಷಣ 1930 ಸಂಖ್ಯೆಗೆ ಕರೆ ಮಾಡಿ ಅಥವಾ www.cybercrime.gov.in ನಲ್ಲಿ ದೂರು ದಾಖಲಿಸಿ.