ತಿರುಪ್ಪೂರು (ತಮಿಳುನಾಡು) ಜೂನ್ 30: ವೈದ್ಯಕೀಯ ವಿಜ್ಞಾನದ ಮುನ್ನಡೆ ಹಾಗೂ ಸರ್ಕಾರದ ನೂರಾರು ಜಾಗೃತಿ ಕಾರ್ಯಕ್ರಮಗಳ ಹೊರತಾಗಿಯೂ, ಇಂಟರ್ನೆಟ್ ಲೋಕದ ಪರಿಶೀಲಿಸದ ತಪ್ಪು ಮಾಹಿತಿಗಳನ್ನು ನಂಬಿ ಗರ್ಭಿಣಿಯೊಬ್ಬರು ಪ್ರಾಣ ಕಳೆದುಕೊಂಡಿರುವ ದಾರುಣ ಘಟನೆ ತಮಿಳುನಾಡಿನ ತಿರುಪ್ಪೂರು ಜಿಲ್ಲೆಯಲ್ಲಿ ನಡೆದಿದೆ. ಆಸ್ಪತ್ರೆಯ ಪ್ರಸವ ಆರೈಕೆಯ ಬದಲು ಯೂಟ್ಯೂಬ್ ವೀಡಿಯೋಗಳನ್ನು ನೋಡಿ ಮನೆಯಲ್ಲೇ “ನೈಸರ್ಗಿಕ ಹೆರಿಗೆ” ಮಾಡಿಕೊಳ್ಳಲು ಯತ್ನಿಸಿದ ಶಶಿಕಲಾ (32) ಎಂಬ ಮಹಿಳೆ ತೀವ್ರ ರಕ್ತಸ್ರಾವದಿಂದ ಕೊನೆಯುಸಿರೆಳೆದಿದ್ದಾರೆ.
ಮನೆಯಲ್ಲೇ ಜನ್ಮ ತಳೆದ ನವಜಾತ ಶಿಶು ಆರೋಗ್ಯವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಮೃತರ ಪತಿ ಕೋಲಂತೈಸಾಮಿ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಪೊಲೀಸ್ ಮೂಲಗಳ ಪ್ರಕಾರ, ಮೃತ ಶಶಿಕಲಾ ಅವರಿಗೆ ಮೊದಲ ಹೆರಿಗೆಯ ಸಂದರ್ಭದಲ್ಲಿ ಸಿಸೇರಿಯನ್ (ಸಿ-ಸೆಕ್ಷನ್) ಮಾಡಲಾಗಿತ್ತು. ಅಂದಿನಿಂದ ಅವರಿಗೆ ಅಲೋಪತಿ ವೈದ್ಯಕೀಯ ಪದ್ಧತಿಯ ಬಗ್ಗೆ ಅಸಮಾಧಾನವಿತ್ತು ಎನ್ನಲಾಗಿದೆ. ಮತ್ತೊಮ್ಮೆ ಸಿಸೇರಿಯನ್ ಆಗುವುದನ್ನು ತಪ್ಪಿಸಲು ಹಾಗೂ ಸಹಜ ಹೆರಿಗೆಯನ್ನು ಖಚಿತಪಡಿಸಿಕೊಳ್ಳಲು ಕುಟುಂಬಸ್ಥರು ಯೂಟ್ಯೂಬ್ನಲ್ಲಿದ್ದ ಅರೆಬರೆ ಮಾಹಿತಿಗಳ ಮೊರೆ ಹೋಗಿದ್ದರು. ಇದೇ ಕಾರಣಕ್ಕಾಗಿ ಸರ್ಕಾರದ ಆರೋಗ್ಯ ಇಲಾಖೆಯ ತಂಡಗಳು ನಿಯತಕಾಲಿಕವಾಗಿ ನೀಡುತ್ತಿದ್ದ ಉಚಿತ ಪ್ರಸವಪೂರ್ವ ತಪಾಸಣೆ ಹಾಗೂ ಲಸಿಕೆಗಳ ಸಲಹೆಯನ್ನೂ ಕುಟುಂಬಸ್ಥರು ಸಂಪೂರ್ಣವಾಗಿ ನಿರ್ಲಕ್ಷಿಸಿದ್ದರು.
ಮನೆಯಲ್ಲೇ ಹೆರಿಗೆಯಾದ ತಕ್ಷಣ ಶಶಿಕಲಾ ಅವರಿಗೆ Placenta ಬೇರ್ಪಡುವಿಕೆಯಲ್ಲಿ ತೀವ್ರ ತೊಂದರೆ ಎದುರಾಗಿ, ಅತಿಯಾದ ರಕ್ತಸ್ರಾವ ಆರಂಭವಾಗಿದೆ. ಪರಿಸ್ಥಿತಿ ಕೈಮೀರುತ್ತಿರುವುದನ್ನು ಕಂಡು ತಕ್ಷಣ ಅವರನ್ನು ಪೆರುಂಡುರೈನ ಸರ್ಕಾರಿ ಈರೋಡ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಗೆ ಹಾಗೂ ನಂತರ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಅತಿಯಾದ ರಕ್ತದ ನಷ್ಟದಿಂದಾಗಿ ಚಿಕಿತ್ಸೆ ಫಲಕಾರಿಯಾಗದೆ ಅವರು ಸಾವನ್ನಪ್ಪಿದ್ದಾರೆ. ಆನ್ಲೈನ್ನ ಪರಿಶೀಲಿಸದ ವೈದ್ಯಕೀಯ ಸಲಹೆಯ ಪಾತ್ರ ಹಾಗೂ ಹೆರಿಗೆಯ ಸಮಯದಲ್ಲಿ ಯಾವುದೇ ಅನಧಿಕೃತ ನಕಲಿ ವೈದ್ಯರು ಭಾಗಿಯಾಗಿದ್ದಾರೆಯೇ ಎಂಬ ಬಗ್ಗೆ ಪೊಲೀಸರು ತನಿಖೆ ತೀವ್ರಗೊಳಿಸಿದ್ದಾರೆ. ಇತ್ತ ಆರೋಗ್ಯ ಇಲಾಖೆಯೂ ಸಮಾನಾಂತರ ತನಿಖೆ ಆರಂಭಿಸಿದೆ.