ಬೆಂಗಳೂರು: ಜೀವನದಲ್ಲಿ ಎದುರಾದ ಅಪಹಾಸ್ಯ, ನೆಗೆಟಿವಿಟಿ ಮತ್ತು ವಂಚನೆಗಳ ನಡುವೆ ನಲುಗಿದ್ದ ಸೋನು ಶ್ರೀನಿವಾಸ್ ಗೌಡ, ಇದೀಗ ತಮ್ಮ ಮೊದಲ ಪ್ರೇಮಿ ರಾಜೇಶ್ ಅವರ ಅಗಲಿಕೆಯ ನೋವಿನಲ್ಲಿ ಮುಳುಗಿದ್ದಾರೆ. ರಾಜೇಶ್ ಮೃತಪಟ್ಟು ಇಂದಿಗೆ 11 ದಿನಗಳಾಗಿದ್ದು, ಆ ನೆನಪಿನಲ್ಲಿ ಸೋನು ಭಾವುಕ ಸಂದೇಶವೊಂದನ್ನು ಹಂಚಿಕೊಂಡಿದ್ದಾರೆ.
ಜೀವನದಲ್ಲಿ ನಡೆದ ವಿಡಿಯೋ ಲೀಕ್ ಘಟನೆಯಿಂದ ನೊಂದಿದ್ದ ಸೋನು ಅವರಿಗೆ ಮನೆಯವರೇ ಬೆನ್ನೆಲುಬಾಗಿ ನಿಂತಿದ್ದರಂತೆ. “ನೆಗೆಟಿವ್ ಇರೋದನ್ನೆಲ್ಲಾ ಪಾಸಿಟಿವ್ ಮಾಡಿಕೋ, ನೀನೇನು ಅಂತ ಜಗತ್ತಿಗೆ ಪ್ರೂವ್ ಮಾಡು” ಎಂದು ಅಮ್ಮ, ಅಕ್ಕ ಮತ್ತು ತಮ್ಮ ಹೇಳಿದ್ದಕ್ಕೆ ‘ಬಿಗ್ ಬಾಸ್’ ಒಪ್ಪಿಕೊಂಡೆ ಎಂದು ಸೋನು ಸ್ಮರಿಸಿದ್ದಾರೆ. ಬಿಗ್ ಬಾಸ್ ಮನೆಯಲ್ಲಿ ತಮಗೆ ಸಿಕ್ಕ ರಾಕೇಶ್ ಅಡಿಗ ಅವರಲ್ಲಿ ತಾವು ರಾಜೇಶ್ ಅವರನ್ನೇ ಕಂಡಿದ್ದಾಗಿ ಅವರು ಹೇಳಿದ್ದಾರೆ.
ರಾಜೇಶ್ ಜೊತೆಗಿನ ಎರಡು ವರ್ಷಗಳ ಪ್ರೀತಿಯ ಸಂಬಂಧ ಮುರಿಯಲು ಅವರ ಮಾಜಿ ಗೆಳತಿಯೇ ಕಾರಣ ಎಂದು ಸೋನು ಕಿಡಿಕಾರಿದ್ದಾರೆ. “ನಮ್ಮಿಬ್ಬರ ಮಧ್ಯೆ ಆಕೆ ಬರದಿದ್ದರೆ ನಾವು ಇಂದಿಗೂ ಚೆನ್ನಾಗಿ ಇರುತ್ತಿದ್ದೆವು. ಒಬ್ಬರ ಜೀವನ ಹಾಳು ಮಾಡಿದ ಅವಳು ಎಷ್ಟು ದಿನ ಸುಖವಾಗಿ ಇರುತ್ತಾಳೆ ಎಂದು ನಾನೂ ನೋಡುತ್ತೇನೆ” ಎಂದು ಆಕ್ರೋಶ ಹೊರಹಾಕಿದ್ದಾರೆ. ಮೊದಲ ಪ್ರೀತಿಯ ಬಿರುಕಿನ ನಂತರ ಇನ್ಸ್ಟಾಗ್ರಾಮ್ ಪ್ರೇಮದಲ್ಲಿ ತಾವು ಮೋಸ ಹೋಗಿದ್ದನ್ನು ಅವರು ನೆನಪಿಸಿಕೊಂಡಿದ್ದಾರೆ.
ರಾಜೇಶ್ ಅಗಲಿದ್ದರೂ ಅವರು ತಮ್ಮ ಜೊತೆಯಲ್ಲೇ ಇದ್ದಾರೆ ಎಂದು ಸೋನು ಭಾವಿಸಿದ್ದಾರೆ. “ರಾಜೇಶ್ ಸತ್ತು ಇಂದಿಗೆ 11 ದಿನ. ಅವರು ಸತ್ತಿದ್ದಾರೆ ಎಂದು ನನಗೆ ಅನಿಸುವುದಿಲ್ಲ. ಹಾಗಾಗಿಯೇ ಅವರ ಫೋಟೋ ಫ್ರೇಮ್ ಮಾಡಿಸಿ ಮನೆಯ ಗೋಡೆಗೆ ಹಾಕಿದ್ದೇನೆ. ಅದಕ್ಕೆ ಹಾರ ಹಾಕಿ ಪೂಜೆ ಮಾಡಲ್ಲ, ಯಾಕೆಂದರೆ ಅವರು ನನ್ನ ಜೊತೆಗೇ ಇದ್ದಾರೆ,” ಎಂದು ಕಣ್ಣೀರಿಟ್ಟಿದ್ದಾರೆ.
ಜೀವನದಲ್ಲಿ ಸರಣಿ ಆಘಾತಗಳನ್ನು ಎದುರಿಸಿರುವ ಸೋನು ಗೌಡ ಅವರಿಗೆ ಈಗ ಮದುವೆಯ ಬಗ್ಗೆ ಆಸಕ್ತಿಯೇ ಇಲ್ಲವಂತೆ. “ನನಗೆ ಮದುವೆ ಆಗಲು ಇಷ್ಟವಿಲ್ಲ” ಎಂದು ಅವರು ತಮ್ಮ ಯೂಟ್ಯೂಬ್ ವ್ಲಾಗ್ನಲ್ಲಿ ಸ್ಪಷ್ಟಪಡಿಸಿದ್ದಾರೆ.