ಲಕ್ಷ್ಮೀ ನಿವಾಸ ಧಾರಾವಾಹಿಯಲ್ಲಿ ನೆಗೆಟಿವ್ ಶೇಡ್ನ ‘ನೀಲೂ’ ಪಾತ್ರದ ಮೂಲಕ ಪ್ರೇಕ್ಷಕರ ಗಮನ ಸೆಳೆದಿರುವ ನಟಿ ಮಾನಸಾ ಮನೋಹರ್ ಅವರು ತಾಯಿ ಆಗುವ ನಿರೀಕ್ಷೆಯಲ್ಲಿದ್ದಾರೆ. ಕಳೆದ ತಿಂಗಳು ಸಾಮಾಜಿಕ ಜಾಲತಾಣದ ಮೂಲಕ ತಾವು ಗರ್ಭಿಣಿಯಾಗಿರುವ ವಿಚಾರವನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದ ಅವರು, ಬರುವ ಮೇ ತಿಂಗಳಲ್ಲಿ ಮಗುವಿಗೆ ಜನ್ಮ ನೀಡಲಿದ್ದಾರೆ ಎಂದು ತಿಳಿಸಿದ್ದಾರೆ.
ಈ ಸಂತಸದ ಸುದ್ದಿಗೆ ಮತ್ತೊಂದು ವಿಶೇಷ ಅಂಶವೂ ಸೇರಿದೆ. ನಟಿಯ ಅತ್ತಿಗೆಯೂ ಗರ್ಭಿಣಿಯಾಗಿದ್ದು, ಇಬ್ಬರೂ ಕೆಲವೇ ವಾರಗಳ ಅಂತರದಲ್ಲಿ ಮಕ್ಕಳನ್ನು ಸ್ವಾಗತಿಸಲಿದ್ದಾರೆ. ಕುಟುಂಬದಲ್ಲಿ ಡಬಲ್ ಸಂಭ್ರಮ ಮೂಡಿದೆ. Zee Kannada ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ‘ಲಕ್ಷ್ಮೀ ನಿವಾಸ’ ಧಾರಾವಾಹಿಯಲ್ಲಿ ಮಾನಸಾ ಮನೋಹರ್ ‘ನೀಲೂ’ ಎಂಬ ಪಾತ್ರದಲ್ಲಿ ನೆಗೆಟಿವ್ ಶೇಡ್ನಲ್ಲಿ ಕಾಣಿಸಿಕೊಂಡು ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದ್ದಾರೆ. ಧಾರಾವಾಹಿಯ ಮೂಲಕ ಅವರಿಗೆ ಕಿರುತೆರೆಯಲ್ಲಿ ವಿಶೇಷ ಗುರುತೂ ದೊರೆತಿದೆ.
ಇನ್ನು ವೈಯಕ್ತಿಕ ಜೀವನದ ವಿಚಾರಕ್ಕೆ ಬಂದರೆ, 2024ರಲ್ಲಿ ಉದ್ಯಮಿ ಪ್ರೀತಂ ಚಂದ್ರ ಅವರನ್ನು ಮಾನಸಾ ಮನೋಹರ್ ವಿವಾಹವಾಗಿದ್ದರು. ಇದು ಅವರ ಎರಡನೇ ಮದುವೆಯಾಗಿದ್ದು, ಇತ್ತೀಚೆಗೆ ದಂಪತಿ ತಮ್ಮ ಮೊದಲ ವಿವಾಹ ವಾರ್ಷಿಕೋತ್ಸವವನ್ನು ಕೂಡ ಆಚರಿಸಿಕೊಂಡಿದ್ದಾರೆ.
ಗರ್ಭಿಣಿಯಾಗಿರುವ ಮಾನಸಾ ಅವರಿಗೆ ಅವಳಿ ಮಕ್ಕಳ ಮೇಲೆ ವಿಶೇಷ ಆಸೆ ಇತ್ತು ಎನ್ನಲಾಗಿದೆ. ಜನಪ್ರಚಲಿತ ನಂಬಿಕೆಯಂತೆ ಅವಳಿ ಬಾಳೆಹಣ್ಣು ತಿಂದರೆ ಅವಳಿ ಮಕ್ಕಳು ಹುಟ್ಟುತ್ತಾರೆ ಎಂಬ ಮಾತನ್ನು ಕೇಳಿ, ಅವರು ಅಂಥ ಬಾಳೆಹಣ್ಣುಗಳನ್ನು ತಿನ್ನುತ್ತಿದ್ದೆ ಎಂದು ಹಾಸ್ಯಭರಿತವಾಗಿ ಹೇಳಿಕೊಂಡಿದ್ದಾರೆ. ಆದರೆ ವೈದ್ಯಕೀಯವಾಗಿ ಅವಳಿ ಮಕ್ಕಳಾಗುವುದಕ್ಕೆ ಜಿನ್ಸ್ ಹಾಗೂ ಹಾರ್ಮೋನ್ಗಳಂತಹ ಕಾರಣಗಳು ಪ್ರಮುಖವಾಗುತ್ತವೆ ಎಂದು ಹೇಳಲಾಗುತ್ತದೆ. ಈ ಬಗ್ಗೆ ಮಾತನಾಡಿದ ನಟಿ, “ಅವಳಿ ಮಕ್ಕಳು ಆಗಿದ್ದರೆ ಈಗಲೇ ಗೊತ್ತಾಗುತ್ತಿತ್ತು. ಈ ಬಾರಿ ಒಂದೇ ಮಗು ಬರಲಿದೆ. ಮುಂದಿನ ಸಲ ನೋಡೋಣ,” ಎಂದು ನಗುತ್ತಾ ಪ್ರತಿಕ್ರಿಯಿಸಿದ್ದಾರೆ.
ಇದನ್ನೂ ಓದಿ – ಗ್ಯಾಸ್ ಪೂರೈಕೆ ವ್ಯತ್ಯಯ: ಬೆಂಗಳೂರು, ತಮಿಳುನಾಡು ಮುಂಬೈಯಲ್ಲಿ ಹೋಟೆಲ್ ಬಂದ್ ಆತಂಕ
ಇತ್ತೀಚೆಗೆ ತಮ್ಮ ಮೊದಲ ಮದುವೆಯ ಕುರಿತು ಮಾತನಾಡಿದ್ದ ಅವರು, “ಸಂಬಂಧದಲ್ಲಿ ಸಂತೋಷ ಉಳಿಯದೇ ಹೋದಾಗ, ಭಾವನಾತ್ಮಕವಾಗಿಯೂ ಮಾನಸಿಕವಾಗಿಯೂ ಒತ್ತಡ ಹೆಚ್ಚಾದಾಗ ಮದುವೆ ಮುರಿಯುತ್ತದೆ. ಆದರೆ ಪ್ರೀತಂ ಜೊತೆ ನನ್ನ ಯೋಚನೆಗಳು ಬಹುತೇಕ ಒಂದೇ ರೀತಿಯಲ್ಲಿ ಹೊಂದಿಕೆಯಾಗುತ್ತವೆ. ಅದರಿಂದ ನನಗೆ ಆತ್ಮವಿಶ್ವಾಸ ಬಂದಿದೆ,” ಎಂದು ಹೇಳಿದ್ದಾರೆ.