ಮಂಗಳೂರು ಮಾರ್ಚ್, 22 : ಅಮೆರಿಕ, ಇಸ್ರೇಲ್ ಹಾಗೂ ಇರಾನ್ ನಡುವಿನ ಉದ್ವಿಗ್ನ ಪರಿಸ್ಥಿತಿಯ ನಡುವೆಯೇ ನವಮಂಗಳೂರು ಬಂದರಿಗೆ (NMPA) ರಷ್ಯಾದಿಂದ ಬೃಹತ್ ಪ್ರಮಾಣದ ಕಚ್ಚಾತೈಲ ಹಾಗೂ ಅಮೆರಿಕದಿಂದ ಎಲ್ಪಿಜಿ ಹೊತ್ತ ಹಡಗುಗಳು ಯಶಸ್ವಿಯಾಗಿ ಆಗಮಿಸಿವೆ.
ದಿಕ್ಕು ಬದಲಿಸಿದ ‘ಅಕ್ವಾ ಟೈಟನ್’: ರಷ್ಯಾದ ಪ್ರಿಮೊರ್ಸ್ಕ್ನಿಂದ 96 ಸಾವಿರ ಮೆಟ್ರಿಕ್ ಟನ್ ‘ಉರಾಲ್’ ಕಚ್ಚಾತೈಲ ಹೊತ್ತ ‘ಅಕ್ವಾ ಟೈಟನ್’ ಹಡಗು ಶನಿವಾರ ತಡರಾತ್ರಿ ಮಂಗಳೂರು ಬಂದರು ತಲುಪಿದೆ. ಮೂಲತಃ ಚೀನಾದ ರಿಝಾವೊ ಬಂದರಿನತ್ತ ಹೊರಟಿದ್ದ ಈ ನೌಕೆಯು, ಜಾಗತಿಕ ಬದಲಾದ ವಿದ್ಯಮಾನಗಳ ಹಿನ್ನೆಲೆಯಲ್ಲಿ ದಿಕ್ಕು ಬದಲಿಸಿ ಮಂಗಳೂರಿಗೆ ಬಂದಿದೆ. ಈ ತೈಲವನ್ನು ಎಂಆರ್ಪಿಎಲ್ (MRPL) ಸಂಸ್ಕರಣಾ ಘಟಕಕ್ಕೆ ಪೂರೈಸಲಾಗುತ್ತಿದೆ.
ಅಮೆರಿಕದಿಂದ ಎಲ್ಪಿಜಿ: ಇತ್ತ ಅಮೆರಿಕದ ಟೆಕ್ಸಾಸ್ನಿಂದ 16 ಸಾವಿರ ಮೆಟ್ರಿಕ್ ಟನ್ ಎಲ್ಪಿಜಿ ಹೊತ್ತ ‘Pyxis Pioneer’ ಕಾರ್ಗೋ ನೌಕೆಯು ಭಾನುವಾರ ಬೆಳಿಗ್ಗೆ ಬಂದರು ಪ್ರವೇಶಿಸಿದೆ. ಈ ಅನಿಲವನ್ನು ಮಂಗಳೂರಿನ ಎಜಿಸ್ (Aegis) ಸಂಗ್ರಹಣಾ ಘಟಕಕ್ಕೆ ಹಸ್ತಾಂತರಿಸುವ ಪ್ರಕ್ರಿಯೆ ಆರಂಭವಾಗಿದೆ. ಯುದ್ಧದ ಭೀತಿಯ ನಡುವೆಯೂ ಇಂಧನ ಪೂರೈಕೆಯಲ್ಲಿ ವ್ಯತ್ಯಯವಾಗದಂತೆ ಈ ಹಡಗುಗಳ ಆಗಮನ ಸಹಕಾರಿಯಾಗಿದೆ ಎಂದು ಬಂದರು ಪ್ರಾಧಿಕಾರದ ಅಧಿಕಾರಿಗಳು ತಿಳಿಸಿದ್ದಾರೆ.