ಬೆಂಗಳೂರು: ಬಿಗ್ಬಾಸ್ ಕನ್ನಡ ಸೀಸನ್ 12ರಲ್ಲಿ ಒಬ್ಬರನ್ನೊಬ್ಬರು ಕಂಡರೆ ಆಗದಂತೆ ಕಿತ್ತಾಡುತ್ತಿದ್ದ ಕರಾವಳಿ ಬೆಡಗಿ ರಕ್ಷಿತಾ ಶೆಟ್ಟಿ ಮತ್ತು ಧ್ರುವಂತ್ ಈಗ ತಮ್ಮ ಎಲ್ಲಾ ಭಿನ್ನಾಭಿಪ್ರಾಯಗಳನ್ನು ಮರೆತು ಒಂದಾಗಿದ್ದಾರೆ. ಇತ್ತೀಚೆಗೆ ರಕ್ಷಿತಾ ಅವರ ಮನೆಗೆ ಧ್ರುವಂತ್ ಭೇಟಿ ನೀಡಿದ್ದು, ಇಬ್ಬರೂ ಜೊತೆಯಾಗಿ ಕಾಲ ಕಳೆದ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಮನೆಯಲ್ಲಿ ಮಿಸ್ ಮಾಡಿಕೊಂಡ ರಕ್ಷಿತಾ: ಇನ್ಸ್ಟಾಗ್ರಾಮ್ನಲ್ಲಿ ವಿಡಿಯೋ ಹಂಚಿಕೊಂಡಿರುವ ರಕ್ಷಿತಾ ಶೆಟ್ಟಿ, “ಧ್ರುವಂತ್ ಅಣ್ಣ ಅವರನ್ನು ನೋಡಿ ತುಂಬಾ ಖುಷಿಯಾಯಿತು. ಬಿಗ್ಬಾಸ್ ಮನೆಯಲ್ಲಿ ದಿನದ 24 ಗಂಟೆ ಜೊತೆಯಾಗಿದ್ದಾಗ ಸಣ್ಣಪುಟ್ಟ ವಿಚಾರಕ್ಕೂ ಕಿತ್ತಾಡುತ್ತಿದ್ದೆವು. ಆದರೆ ಮನೆಯಿಂದ ಹೊರಬಂದ ನಂತರ ಅವರನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತಿದ್ದೆ” ಎಂದು ಭಾವುಕರಾಗಿ ನುಡಿದಿದ್ದಾರೆ. ಈ ಮೂಲಕ ಮನೆಯೊಳಗಿನ ಕೋಪ-ತಾಪಗಳು ಕೇವಲ ಆಟಕ್ಕೆ ಸೀಮಿತವಾಗಿತ್ತು ಎಂಬ ಸಂದೇಶ ನೀಡಿದ್ದಾರೆ.
ಅಪ್ಪೆ ಸಾರಿನ ಭೋಜನ: ರಕ್ಷಿತಾ ಹಂಚಿಕೊಂಡಿರುವ ವಿಡಿಯೋದಲ್ಲಿ ಧ್ರುವಂತ್ ಅವರು ಊಟ ಮಾಡುತ್ತಿರುವುದನ್ನು ಕಾಣಬಹುದು. “ಮೊದಲ ಬಾರಿಗೆ ಧ್ರುವಂತ್ ಅಣ್ಣನ ಜೊತೆ ಅಪ್ಪೆ ಸಾರು ಕುಡಿತಾ ಇದ್ದೇನೆ” ಎಂದು ರಕ್ಷಿತಾ ಕ್ಯಾಪ್ಷನ್ ನೀಡಿದ್ದಾರೆ. ಕರಾವಳಿ ಶೈಲಿಯ ಅಪ್ಪೆ ಸಾರಿನ ಆತಿಥ್ಯ ಸವಿಯುತ್ತಾ ಇಬ್ಬರೂ ಹಳೆಯ ನೆನಪುಗಳನ್ನು ಮೆಲುಕು ಹಾಕಿದ್ದಾರೆ.
ಸೀಕ್ರೆಟ್ ರೂಮ್ ಸ್ನೇಹ: ಬಿಗ್ ಬಾಸ್ ಮನೆಯ ಸೀಕ್ರೆಟ್ ರೂಮ್ನಲ್ಲಿ ಕೆಲ ದಿನಗಳ ಕಾಲ ಇಬ್ಬರೂ ಒಟ್ಟಿಗೆ ಇದ್ದರು. ಅಲ್ಲಿಂದ ಹೊರಬಂದ ಮೇಲೆ ಇಬ್ಬರ ಆಟದ ವೈಖರಿ ಬದಲಾಗಿತ್ತು. ಫಿನಾಲೆ ವಾರದ ಮಧ್ಯೆ ನಡೆದ ಎಲಿಮಿನೇಷನ್ನಲ್ಲಿ ಧ್ರುವಂತ್ ಹೊರಬಂದಿದ್ದರೆ, ರಕ್ಷಿತಾ ಶೆಟ್ಟಿ ರನ್ನರ್ ಅಪ್ ಆಗಿ ಹೊರಹೊಮ್ಮಿದ್ದರು.
ಮನೆಯಿಂದ ಹೊರಬಂದ ಮೇಲೆ ರಕ್ಷಿತಾ ಅವರು ಮಾಳು ಮತ್ತು ರಘು ಅವರನ್ನೂ ಭೇಟಿಯಾಗಿ ಸುದ್ದಿಯಾಗಿದ್ದರು. ಸದ್ಯ ಧ್ರುವಂತ್ ಜೊತೆಗಿನ ಇವರ ಈ ‘ಅಣ್ಣ-ತಂಗಿ’ ಬಾಂಧವ್ಯ ಕಂಡು ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.