ಪುತ್ತೂರು ಮಾರ್ಚ್ 09: ರಾಜ್ಯ ಸರಕಾರ ಪುತ್ತೂರಿನಲ್ಲಿ ನಿರ್ಮಿಸಲು ಉದ್ಧೇಶಿಸಿರುವ 300 ಬೆಡ್ಗಳ ಸರಕಾರಿ ಮೆಡಿಕಲ್ ಆಸ್ಪತ್ರೆಯನ್ನು ಸದ್ಯ ಆಸ್ಪತ್ರೆ ಕಾರ್ಯಾಚರಿಸುತ್ತಿರುವ ಜಾಗದಲ್ಲೇ ನಿರ್ಮಿಸಬೇಕೆಂದು ಪುತ್ತೂರು ಬಿಜೆಪಿ ಆಗ್ರಹಿಸಿದೆ.
ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಪಕ್ಷದ ಹಿರಿಯ ಮುಖಂಡ ರಾಜೇಶ್ ಬನ್ನೂರು, ಪುತ್ತೂರಿನಲ್ಲಿ ಮೆಡಿಕಲ್ ಕಾಲೇಜು ಆಗಬೇಕೆಂದು ನಿಕಟಪೂರ್ವ ಶಾಸಕರಾದ ಸಂಜೀವ ಮಠಂದೂರು ಆಗಿನ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದ್ದರು. ಪ್ರಸ್ತಾವನೆಗೆ ಉತ್ತರ ನೀಡಿರುವ ಇಲಾಖೆ 30 ಬೆಡ್ ಇರುವ ಆಸ್ಪತ್ರೆಗಳಲ್ಲಿ ಮಾತ್ರ ಮೆಡಿಕಲ್ ಕಾಲೇಜು ಸ್ಥಾಪನೆಗೆ ಅವಕಾಶವಿದ್ದು, 300 ಬೆಡ್ ಆಸ್ಪತ್ರೆ ನಿರ್ಮಾಣಕ್ಕೆ ಸ್ಥಳಾವಕಾಶ ನೀಡಿತ್ತು. ಈ ಹಿನ್ನೆಲೆಯಲ್ಲಿ ಸರಕಾರಿ ಆಸ್ಪತ್ರೆಯ ಅಕ್ಕಪಕ್ಕದಲ್ಲಿ ಇರುವ ಸರಕಾರ ಜಾಗವನ್ನು ಆಸ್ಪತ್ರೆಗೆ ಸೇರಿಸಿಕೊಂಡು 5.16 ಎಕರೆ ಜಾಗವನ್ನು ಆಸ್ಪತ್ರೆಯ ಹೆಸರಿನಲ್ಲಿ ದಾಖಲು ಮಾಡಿದ್ದರು.
ಆದರೆ ಈಗಿನ ಶಾಸಕರು ಆಸ್ಪತ್ರೆಯನ್ನು ಮೆಡಿಕಲ್ ಕಾಲೇಜು ಸ್ಥಾಪನೆಯಾಗುವ ನಗರದಿಂದ ದೂರ ಇರುವ ಬನ್ನೂರು ಪ್ರದೇಶದಲ್ಲಿ ಕಾಲೇಜು ನಿರ್ಮಿಸಲು ಹೊರಟಿರುವುದು ಬಡ ರೋಗಿಗಳಿಗೆ ತೊಂದರೆಯನ್ನುಂಟು ಮಾಡಲಿದೆ. ಬನ್ನೂರಿನ ಜಾಗದಲ್ಲಿ ಆಸ್ಪತ್ರೆ ನಿರ್ಮಿಸಿದರೆ ಅದರ ಲಾಭ ಅಲ್ಲಿನ ಭೂ ಮಾಲಕರಿಗೆ ಹೊರತು ರೋಗಿಗಳಿಗೆ ಅಲ್ಲ ಎಂದ ಅವರು ಮೆಡಿಕಲ್ ಕಾಲೇಜಿನ ಕಾನ್ಸೆಪ್ಟ್ ಹಿಂದೆ ತಮ್ಮ ಜಮೀನಿಗೆ ಉತ್ತಮ ಧಾರಣೆ ಬರಲಿ ಎನ್ನುವ ಹಿಡನ್ ಅಜೆಂಡಾವೂ ಇದೆ ಎಂದು ಅವರು ಆರೋಪಿಸಿದರು.