ಬೆಂಗಳೂರು: ಕಿರುಚಿತ್ರಗಳ ಮೂಲಕ ಮನೆಮಾತಾಗಿರುವ ನಟಿ ಪಾಯಲ್ ಚೆಂಗಪ್ಪ ಅವರು ಇತ್ತೀಚೆಗೆ ತಮ್ಮ ಉಡುಪಿನ ವಿಚಾರವಾಗಿ ಕೇಳಿಬಂದ ಟ್ರೋಲ್ಗಳಿಗೆ ಖಡಕ್ ಉತ್ತರ ನೀಡಿದ್ದಾರೆ. “ನನ್ನನ್ನು ಕೆಳಕ್ಕೆ ಎಳೆಯಬೇಕು ಎಂಬ ಉದ್ದೇಶದಿಂದಲೇ ಇಂತಹ ಫೇಕ್ ಅಕೌಂಟ್ಗಳಿಂದ ಕಾಮೆಂಟ್ಗಳು ಬರುತ್ತಿವೆ, ಇದಕ್ಕೆ ನಾನು ತಲೆಕೆಡಿಸಿಕೊಳ್ಳಲ್ಲ” ಎಂದು ಅವರು ಹೇಳಿದ್ದಾರೆ.
ತಮ್ಮ ಥೈಲ್ಯಾಂಡ್ ಪ್ರವಾಸದ ಫೋಟೋಗಳ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಪಾಯಲ್, “ಅದೊಂದು ನಾರ್ಮಲ್ ಬ್ಯಾಕ್ಲೆಸ್ ಟಾಪ್ ಆಗಿತ್ತು ಅಷ್ಟೆ. ಅದು ಬಿಕಿನಿಯೂ ಅಲ್ಲ, ಸ್ವಿಮ್ ಸೂಟ್ ಕೂಡ ಅಲ್ಲ. ವೆಕೇಶನ್ಗೆ ಹೋದಾಗ ಮಾಡರ್ನ್ ಡ್ರೆಸ್ ಹಾಕಿದ್ರೆ ಸಡನ್ ಆಗಿ ಸಂಸ್ಕೃತಿಯ ಬಗ್ಗೆ ಮಾತನಾಡುವವರು ಹುಟ್ಟಿಕೊಳ್ಳುತ್ತಾರೆ. ನಾನು ಕೊಡಗಿನವಳು, ಮೊದಲ ಸಿನಿಮಾದ ವೇಳೆ ನಮ್ಮ ಸಂಪ್ರದಾಯದಂತೆ ಕೊಡವ ಶೈಲಿಯ ಸೀರೆ ಉಟ್ಟು ಬಂದಾಗ ಯಾರೂ ಇಷ್ಟೊಂದು ಕಾಮೆಂಟ್ ಮಾಡಿರಲಿಲ್ಲ. ಆದರೆ ಮಾಡರ್ನ್ ಡ್ರೆಸ್ ಹಾಕಿದಾಗ ಮಾತ್ರ ಕಾಮೆಂಟ್ ಮಾಡುವುದು ಎಷ್ಟು ಸರಿ?” ಎಂದು ಪ್ರಶ್ನಿಸಿದ್ದಾರೆ.
ವಿಡಿಯೋ ಚಿತ್ರೀಕರಣದ ಬಗ್ಗೆ ಮಾತನಾಡಿದ ಅವರು, “ವಿಡಿಯೋ ತೆಗೆಯುವಾಗ ನಾವು ಧರಿಸಿರುವ ಉಡುಪಿಗಿಂತಲೂ ಕ್ಯಾಮರಾ ಆಂಗಲ್ ಮುಖ್ಯವಾಗುತ್ತದೆ. ನಾನು ಧರಿಸಿದ್ದ ಕೆಂಪು ಬಣ್ಣದ ಡ್ರೆಸ್ ವಿಚಾರದಲ್ಲೂ ಆಗಿದ್ದು ಅದೇ” ಎಂದು ತಮ್ಮ ಮೇಲಿನ ಆರೋಪಗಳನ್ನು ತಳ್ಳಿಹಾಕಿದ್ದಾರೆ.
ಎಂಜಿನಿಯರಿಂಗ್ ಪದವೀಧರೆಯಾಗಿರುವ ಪಾಯಲ್ ಅವರಿಗೆ ಮನೆಯವರ ಸಂಪೂರ್ಣ ಬೆಂಬಲವಿದೆ. ‘ಅಮೃತಾಂಜನ್’ ಕಿರುಚಿತ್ರದ ಮೂಲಕ ನಟನೆ ಆರಂಭಿಸಿದ ಇವರು, ‘ಟೊಮ್ಯಾಟೋ ಮುಂಡೆ’ ಎಂಬ ವಿಭಿನ್ನ ಹೆಸರಿನಿಂದ ಬಹಳ ಜನಪ್ರಿಯರಾಗಿದ್ದರು. ಸದ್ಯ ಇವರ ನಟನೆಯ ಹೊಸ ಕಿರುಚಿತ್ರ ‘ಜೆರಾಕ್ಸ್’ (Xerox) ಇಂದಿನಿಂದ (ಏಪ್ರಿಲ್ 24) ‘ಜೀ5’ ಒಟಿಟಿ ವೇದಿಕೆಯಲ್ಲಿ ಸ್ಟ್ರೀಮಿಂಗ್ ಆರಂಭಿಸಿದೆ.