ಮಂಗಳೂರು ಮಾರ್ಚ್ 25: ಪ್ರವಾಸಿ ವಾಹನಗಳಿಗೆ ‘ಪ್ಯಾನಿಕ್ ಬಟನ್’ ಅಳವಡಿಸುವ ರಾಜ್ಯ ಸರ್ಕಾರದ ಆದೇಶದ ಹಿಂದೆ ಭಾರಿ ಅವ್ಯವಹಾರ ನಡೆದಿದ್ದು, ಇದು ಟ್ಯಾಕ್ಸಿ ಮತ್ತು ಮ್ಯಾಕ್ಸಿಕ್ಯಾಬ್ ಚಾಲಕರಿಗೆ ಮರಣಶಾಸನವಾಗಿದೆ ಎಂದು ದ.ಕ. ಜಿಲ್ಲಾ ಟ್ಯಾಕ್ಸಿ ಮತ್ತು ಮ್ಯಾಕ್ಸಿಕ್ಯಾಬ್ ಅಸೋಸಿಯೇಷನ್ ಅಧ್ಯಕ್ಷ ಆನಂದ ಕೆ. ಆರೋಪಿಸಿದ್ದಾರೆ.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಕೇರಳದಲ್ಲಿ ಈ ಸಾಧನದ ಬೆಲೆ ಕೇವಲ ₹3,000 ದಿಂದ ₹4,000 ಇದ್ದರೆ, ಕರ್ನಾಟಕದಲ್ಲಿ ಸರ್ಕಾರ ₹8,250 ನಿಗದಿಪಡಿಸಿದೆ. ಆದರೆ ಖಾಸಗಿ ಕಂಪನಿಗಳು ₹13,500 ರಿಂದ ₹16,000 ವರೆಗೆ ವಸೂಲಿ ಮಾಡುತ್ತಿವೆ. ಬಿಲ್ ನೀಡಲು ನಿರಾಕರಿಸುತ್ತಿರುವ ಈ ಕಂಪನಿಗಳ ವಿರುದ್ಧ ಸರ್ಕಾರ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ. ಇದು ಚಾಲಕರ ಸುಲಿಗೆಯಲ್ಲದೆ ಮತ್ತೇನಲ್ಲ?” ಎಂದು ಪ್ರಶ್ನಿಸಿದರು.
ಪ್ಯಾನಿಕ್ ಬಟನ್ ಒತ್ತಿದರೆ ಪೊಲೀಸ್ ಕಂಟ್ರೋಲ್ ರೂಮ್ಗೆ ಮಾಹಿತಿ ಹೋಗುವ ಯಾವುದೇ ವ್ಯವಸ್ಥೆ ರಾಜ್ಯದಲ್ಲಿ ಇನ್ನೂ ಸಿದ್ಧವಾಗಿಲ್ಲ. ವ್ಯವಸ್ಥೆಯೇ ಇಲ್ಲದಿದ್ದ ಮೇಲೆ ಸಾವಿರಾರು ರೂಪಾಯಿ ವ್ಯಯಿಸಿ ಈ ಸಾಧನ ಅಳವಡಿಸುವುದರಲ್ಲಿ ಅರ್ಥವೇನಿದೆ? ಸಾಧನ ಅಳವಡಿಸದಿದ್ದರೆ ಎಫ್.ಸಿ (FC) ನಿರಾಕರಿಸಲಾಗುತ್ತಿದೆ. ಈ ಕೂಡಲೇ ಸರ್ಕಾರ ಮಧ್ಯಪ್ರವೇಶಿಸಿ ದರ ಕಡಿತಗೊಳಿಸದಿದ್ದರೆ ರಾಜ್ಯಾದ್ಯಂತ ಅನಿರ್ದಿಷ್ಟಾವಧಿ ಮುಷ್ಕರ ನಡೆಸಲಾಗುವುದು,” ಎಂದು ಅವರು ಎಚ್ಚರಿಸಿದ್ದಾರೆ.
ಪ್ಯಾನಿಕ್ ಬಟನ್ ಸಾಧನದ ರಿಚಾರ್ಜ್ಗೆ ರಾಜ್ಯ ಸಾರಿಗೆ ಇಲಾಖೆ 1800 ರು. ನಿಗದಿಪಡಿಸಿದ್ದರೂ 3,800 ರು. ವಸೂಲಿ ಮಾಡಲಾಗುತ್ತಿದೆ. ಇದರಿಂದ ಟ್ಯಾಕ್ಸಿ ಚಾಲಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ಕುರಿತು ಹೈಕೋರ್ಟ್ ಮೆಟ್ಟಿಲೇರಿದ್ದು, ವಿಚಾರಣೆ ನಡೆಯುತ್ತಿದೆ ಎಂದು ಆನಂದ ಕೆ. ತಿಳಿಸಿದರು.