ನವದೆಹಲಿ,ಮಾರ್ಚ್ 24: ಪಶ್ಚಿಮ ಏಷ್ಯಾದಲ್ಲಿ ಇರಾನ್ ಮತ್ತು ಇಸ್ರೇಲ್ ನಡುವೆ ಯುದ್ಧದ ಭೀತಿ ಆವರಿಸಿರುವ ಬೆನ್ನಲ್ಲೇ, ಭಾರತವು ತನ್ನ ಇಂಧನ ಭದ್ರತೆಯ ದೃಷ್ಟಿಯಿಂದ ಅತ್ಯಂತ ನಿರ್ಣಾಯಕ ಯಶಸ್ಸು ಸಾಧಿಸಿದೆ. ವಿಶ್ವದ ಅತ್ಯಂತ ಅಪಾಯಕಾರಿ ತೈಲ ಮಾರ್ಗವೆಂದೇ ಬಿಂಬಿತವಾಗಿರುವ ಹೊರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಸಿಲುಕಿಕೊಂಡಿದ್ದ ಭಾರತದ ಎರಡು ಬೃಹತ್ ಎಲ್ಪಿಜಿ ಟ್ಯಾಂಕರ್ಗಳು, ಯಶಸ್ವಿಯಾಗಿ ಜಲಸಂಧಿಯನ್ನು ದಾಟಿ ಭಾರತದತ್ತ ಮುಖ ಮಾಡಿವೆ .
ಯುದ್ಧದ ಭೀತಿಯಿಂದಾಗಿ ಜಗತ್ತಿನ ಬಹುತೇಕ ಹಡಗುಗಳು ತಮ್ಮ ಲೊಕೇಶನ್ ಸಿಗ್ನಲ್ಗಳನ್ನು ಆಫ್ ಮಾಡಿ (Dark Mode) ಗುಪ್ತವಾಗಿ ಸಂಚರಿಸುತ್ತಿವೆ. ಆದರೆ, ಭಾರತೀಯ ಹಡಗುಗಳಾದ ‘ಜಗ್ ವಸಂತ್’ (Jag Vasant) ಮತ್ತು ‘ಪೈನ್ ಗ್ಯಾಸ್’ (Pine Gas) ಮಾತ್ರ ತಮ್ಮ ಗುರುತನ್ನು ಸ್ಪಷ್ಟವಾಗಿ ಪ್ರದರ್ಶಿಸಿವೆ. ಈ ಹಡಗುಗಳು ತಮ್ಮ ಮೇಲೆ “Indian Ship” ಎಂದು ದೊಡ್ಡ ಅಕ್ಷರಗಳಲ್ಲಿ ಬರೆದುಕೊಂಡು, ಸಿಗ್ನಲ್ಗಳನ್ನು ಆನ್ ಮಾಡಿಯೇ ಸಾಗಿವೆ. ಇದು ಭಾರತ ಮತ್ತು ಇರಾನ್ ನಡುವಿನ ಗಾಢವಾದ ರಾಜತಾಂತ್ರಿಕ ಸಂಬಂಧ ಹಾಗೂ ಭಾರತದ ಆತ್ಮವಿಶ್ವಾಸವನ್ನು ಜಗತ್ತಿಗೆ ಸಾರಿದೆ.
ಈ ಎರಡು ಹಡಗುಗಳು ಒಟ್ಟು 92,612 ಟನ್ ಎಲ್ಪಿಜಿ (ಅಡುಗೆ ಅನಿಲ) ಹೊತ್ತು ತರುತ್ತಿವೆ. ಈ ಪ್ರಮಾಣವು ಭಾರತದ ಇಡೀ ದಿನದ ಅಡುಗೆ ಅನಿಲ ಬಳಕೆಗೆ ಸಮಾನವಾಗಿದೆ. ಕಳೆದ ಕೆಲವು ದಿನಗಳಿಂದ ಹಡಗು ಸಂಚಾರ ಸ್ಥಗಿತಗೊಂಡಿದ್ದರಿಂದ ದೇಶದಲ್ಲಿ ಉಂಟಾಗಿದ್ದ ಅಡುಗೆ ಅನಿಲ ಕೊರತೆಯ ಆತಂಕವು, ಈ ಬೆಳವಣಿಗೆಯಿಂದಾಗಿ ಸದ್ಯಕ್ಕೆ ದೂರವಾಗಿದೆ. ಈ ಹಡಗುಗಳು ಮಾರ್ಚ್ 26 ರಿಂದ 28ರ ನಡುವೆ ಭಾರತದ ಬಂದರುಗಳನ್ನು ತಲುಪುವ ನಿರೀಕ್ಷೆಯಿದೆ.
ವರದಿಯ ಪ್ರಕಾರ, ಈ ಹಡಗುಗಳು ಇರಾನ್ ಕರಾವಳಿಗೆ ಅತ್ಯಂತ ಹತ್ತಿರವಿರುವ ಲಾರಕ್ ಮತ್ತು ಖೇಶ್ಮ್ ದ್ವೀಪಗಳ ಕಿರಿದಾದ ಮಾರ್ಗದ ಮೂಲಕ ಸಾಗಿವೆ. ಸಾಮಾನ್ಯವಾಗಿ ಈ ಮಾರ್ಗವು ಅತ್ಯಂತ ಸವಾಲಿನಿಂದ ಕೂಡಿದೆ ಎಂದು ಪರಿಗಣಿಸಲಾಗುತ್ತದೆ. ಆದರೆ, ಭಾರತೀಯ ನೌಕಾಪಡೆಯು ‘ಆಪರೇಷನ್ ಸಂಕಲ್ಪ್’ ಅಡಿಯಲ್ಲಿ ಒಮಾನ್ ಕೊಲ್ಲಿಯಲ್ಲಿ ಈ ಟ್ಯಾಂಕರ್ಗಳಿಗೆ ನಿರಂತರವಾಗಿ ಕಾವಲು ನೀಡುವ ಮೂಲಕ, ಯಾವುದೇ ಅಹಿತಕರ ಘಟನೆ ನಡೆಯದಂತೆ ಸುರಕ್ಷತೆ ಒದಗಿಸಿದೆ.