ದುಬೈ/ವಾಷಿಂಗ್ಟನ್ ಮಾರ್ಚ್ 30: ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಕಾರ್ಮೋಡ ಮತ್ತಷ್ಟು ದಟ್ಟವಾಗಿದ್ದು, ಇರಾನ್ ನಡೆಸಿದ ಭೀಕರ ಕ್ಷಿಪಣಿ ದಾಳಿಗೆ ಅಮೆರಿಕದ ಅತ್ಯಾಧುನಿಕ ಹಾಗೂ ಅತ್ಯಂತ ದುಬಾರಿ ಕಣ್ಗಾವಲು ವಿಮಾನವೊಂದು ಪತನಗೊಂಡಿದೆ. ಸುಮಾರು 2,800 ಕೋಟಿ ರೂಪಾಯಿ (ಅಂದಾಜು 330 ಮಿಲಿಯನ್ ಡಾಲರ್) ಮೌಲ್ಯದ, ‘ಆಕಾಶದ ಕಣ್ಣು’ ಎಂದೇ ಖ್ಯಾತಿಯಾಗಿದ್ದ E-3 ಸೆಂಟ್ರಿ (AWACS) ವಿಮಾನವು ಇರಾನ್ನ ನಿಖರ ದಾಳಿಗೆ ತುತ್ತಾಗಿ ಎರಡು ಹೋಳಾಗಿದೆ ಎಂದು ಅಂತರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ಸೌದಿ ಅರೇಬಿಯಾದ ‘ಪ್ರಿನ್ಸ್ ಸುಲ್ತಾನ್’ ವಾಯುನೆಲೆಯ ಮೇಲೆ ಇರಾನ್ನ ರೆವಲ್ಯೂಷನರಿ ಗಾರ್ಡ್ಸ್ (IRGC) ಏಕಕಾಲದಲ್ಲಿ ಬ್ಯಾಲಿಸ್ಟಿಕ್ ಕ್ಷಿಪಣಿ ಮತ್ತು ‘ಕಾಮಿಕಾಜೆ’ (ಆತ್ಮಹತ್ಯಾ) ಡ್ರೋನ್ಗಳ ಮೂಲಕ ದಾಳಿ ನಡೆಸಿವೆ. ಈ ವೇಳೆ ನೆಲೆಯಲ್ಲಿದ್ದ ಅಮೆರಿಕದ ಅತ್ಯಾಧುನಿಕ ಕಣ್ಗಾವಲು ವಿಮಾನಕ್ಕೆ ಕ್ಷಿಪಣಿ ನೇರವಾಗಿ ಬಡಿದಿದೆ. ದಾಳಿಯ ತೀವ್ರತೆಗೆ ವಿಮಾನವು ಸ್ಥಳದಲ್ಲೇ ಎರಡು ಭಾಗವಾಗಿದ್ದು, ಸಂಪೂರ್ಣವಾಗಿ ಜಖಂಗೊಂಡಿದೆ. ಈ ಸಂಘರ್ಷದಲ್ಲಿ ಅಮೆರಿಕದ 10ಕ್ಕೂ ಹೆಚ್ಚು ಯೋಧರು ಗಾಯಗೊಂಡಿದ್ದಾರೆ ಎಂದು ಪ್ರಾಥಮಿಕ ವರದಿಗಳು ತಿಳಿಸಿವೆ.
ಧ್ವಂಸಗೊಂಡಿರುವ E-3 ಸೆಂಟ್ರಿ ವಿಮಾನವು ಅಮೆರಿಕದ ವಾಯುಪಡೆಯ ಬೆನ್ನೆಲುಬಾಗಿತ್ತು.ಇದು ಶತ್ರು ರಾಷ್ಟ್ರಗಳ ಚಲನವಲನಗಳನ್ನು ನೂರಾರು ಕಿಲೋಮೀಟರ್ ದೂರದಿಂದಲೇ ಪತ್ತೆಹಚ್ಚುವ ಸಾಮರ್ಥ್ಯ ಹೊಂದಿತ್ತು. ಯುದ್ಧ ಭೂಮಿಯಲ್ಲಿ ಇತರ ವಿಮಾನಗಳಿಗೆ ಮಾರ್ಗದರ್ಶನ ನೀಡುವ ‘ಬ್ಯಾಟಲ್ ಮ್ಯಾನೇಜ್ಮೆಂಟ್’ ಕೇಂದ್ರದಂತೆ ಇದು ಕಾರ್ಯನಿರ್ವಹಿಸುತ್ತಿತ್ತು. ಒಂದು ವಿಮಾನದ ನಿರ್ವಹಣೆ ಮತ್ತು ತಂತ್ರಜ್ಞಾನದ ಒಟ್ಟು ವೆಚ್ಚ ಭಾರತೀಯ ರೂಪಾಯಿಗಳಲ್ಲಿ ಸುಮಾರು 2,800 ಕೋಟಿಗಳಿಗೂ ಅಧಿಕವಾಗಿದೆ. ಈ ಘಟನೆಯ ಬೆನ್ನಲ್ಲೇ ಕುವೈತ್ ಏರ್ಪೋರ್ಟ್ ಸೇರಿದಂತೆ ಸುತ್ತಮುತ್ತಲಿನ ಅಮೆರಿಕದ ಸೇನಾ ನೆಲೆಗಳಲ್ಲಿ ಹೈ-ಅಲರ್ಟ್ ಘೋಷಿಸಲಾಗಿದೆ.