ಬೆಂಗಳೂರು, ಏಪ್ರಿಲ್ 09: ವಿದೇಶಗಳಲ್ಲಿ ಸಾವಿರಾರು ಯುವಕರ ಬಲಿಪಡೆಯುತ್ತಿರುವ ಭೀಕರ ‘ಝಾಂಬಿ ಡ್ರಗ್’ ಈಗ ಐಟಿ ಹಬ್ ಬೆಂಗಳೂರಿಗೂ ಕಾಲಿಟ್ಟಿದೆಯೇ? ಇಂತಹದೊಂದು ಗಂಭೀರ ಅನುಮಾನ ಸೋಶಿಯಲ್ ಮೀಡಿಯಾದಲ್ಲಿ ಶುರುವಾಗಿದೆ. ಕೇವಲ ಎರಡು ದಿನಗಳ ಹಿಂದೆ ಚಂಡೀಗಢದಲ್ಲಿ ಬ್ಲಿಂಕಿಟ್ ಡೆಲಿವರಿ ಏಜೆಂಟ್ ಒಬ್ಬರು ರಸ್ತೆಯಲ್ಲೇ ಗಂಟೆಗಟ್ಟಲೆ ಕದಲದೆ ನಿಂತಿದ್ದ ದೃಶ್ಯ ವೈರಲ್ ಆಗಿತ್ತು. ಈಗ ಅಂತಹದ್ದೇ ದೃಶ್ಯ ಬೆಂಗಳೂರಿನಲ್ಲೂ ಕಂಡುಬಂದಿದೆ.
ಬೆಂಗಳೂರಿನ ಬಾಗಲೂರು ಸಮೀಪದ ನಿಟ್ಟೆ ಕಾಲೇಜು ರಸ್ತೆಯಲ್ಲಿ ವ್ಯಕ್ತಿಯೊಬ್ಬರು ರಸ್ತೆ ಬದಿಯಲ್ಲಿ ವಿಚಿತ್ರವಾಗಿ, ಯಾವುದೇ ಚಲನೆಯಿಲ್ಲದೆ ನಿಂತಿರುವ ವಿಡಿಯೋವೊಂದು ಎಕ್ಸ್ (ಟ್ವಿಟರ್) ನಲ್ಲಿ ಸದ್ದು ಮಾಡುತ್ತಿದೆ. ‘sanatan_kannada’ ಎಂಬ ಹ್ಯಾಂಡಲ್ನಿಂದ ಈ ವಿಡಿಯೋ ಹಂಚಿಕೊಳ್ಳಲಾಗಿದ್ದು, ಝಾಂಬಿ ಡ್ರಗ್ ಬೆಂಗಳೂರಿಗೆ ಎಂಟ್ರಿ ಕೊಟ್ಟಿದೆ. ಪೋಷಕರು ಮತ್ತು ಪೊಲೀಸರು ಎಚ್ಚೆತ್ತುಕೊಳ್ಳಿ ಎಂದು ಎಚ್ಚರಿಕೆ ನೀಡಲಾಗಿದೆ. ಇನ್ನು, ವಿಡಿಯೋದಲ್ಲಿರುವ ವ್ಯಕ್ತಿ ಅರೆಪ್ರಜ್ಞಾವಸ್ಥೆಯಲ್ಲಿರುವಂತೆ ಕಂಡುಬಂದಿದೆ.
ಏನಿದು ಝಾಂಬಿ ಡ್ರಗ್ (Xylazine)?
ಕ್ಸೈಲಾಜಿನ್ ಎಂಬುದು ವಾಸ್ತವವಾಗಿ ಮನುಷ್ಯರಿಗಾಗಿ ತಯಾರಿಸಿದ ಔಷಧವಲ್ಲ. ಇದನ್ನು ಕುದುರೆ ಮತ್ತು ದನಕರುಗಳಂತಹ ಪ್ರಾಣಿಗಳಿಗೆ ಅರಿವಳಿಕೆ (Sedative) ನೀಡಲು ಬಳಸಲಾಗುತ್ತದೆ. ಈ ಮಾದಕ ವಸ್ತುವನ್ನು ಮನುಷ್ಯರು ಸೇವಿಸಿದರೆ ಅಥವಾ ಇತರ ಡ್ರಗ್ಸ್ಗಳೊಂದಿಗೆ ಬೆರೆಸಿ ತೆಗೆದುಕೊಂಡರೆ ಅವರು ತಮ್ಮ ದೇಹದ ಮೇಲಿನ ನಿಯಂತ್ರಣ ಕಳೆದುಕೊಳ್ಳುತ್ತಾರೆ. ಗಂಟೆಗಟ್ಟಲೆ ಒಂದೇ ಕಡೆ ಪ್ರತಿಮೆಯಂತೆ ನಿಲ್ಲುವುದು ಅಥವಾ ಪ್ರಜ್ಞಾಹೀನ ಸ್ಥಿತಿಯಲ್ಲಿರುವುದು ಇದರ ಲಕ್ಷಣ. ಇದನ್ನು ಸೇವಿಸಿದವರು ನೋಡಲು ಜೀವಂತ ಶವಗಳಂತೆ (Zombies) ಕಾಣುವುದರಿಂದ ಇದಕ್ಕೆ ‘ಝಾಂಬಿ ಡ್ರಗ್’ ಎಂದು ಕರೆಯಲಾಗುತ್ತದೆ.
ಈ ವಿಡಿಯೋ ಹಂಚಿಕೊಂಡಿರುವ ನೆಟ್ಟಿಗರು ಬೆಂಗಳೂರು ಈಗ ಉಡ್ತಾ ಬೆಂಗಳೂರು ಆಗುತ್ತಿದೆ. ಪರಿಸ್ಥಿತಿ ಕೈಮೀರುವ ಮುನ್ನ ಪೊಲೀಸರು ಎಚ್ಚೆತ್ತುಕೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ. ಶಾಲಾ-ಕಾಲೇಜುಗಳ ಸುತ್ತಮುತ್ತ ಇಂತಹ ಮಾದಕ ವಸ್ತುಗಳ ಜಾಲ ಹರಡಿರುವ ಸಾಧ್ಯತೆ ಇದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ಈ ವಿಡಿಯೋದ ಸತ್ಯಾಸತ್ಯತೆ ಅಥವಾ ವಿಡಿಯೋದಲ್ಲಿರುವ ವ್ಯಕ್ತಿ ನಿಜವಾಗಿಯೂ ಡ್ರಗ್ಸ್ ಸೇವಿಸಿದ್ದಾರೆಯೇ ಎಂಬುದರ ಬಗ್ಗೆ ಬೆಂಗಳೂರು ಪೊಲೀಸರಿಂದ ಅಥವಾ ಆರೋಗ್ಯ ಇಲಾಖೆಯಿಂದ ಯಾವುದೇ ಅಧಿಕೃತ ಸ್ಪಷ್ಟನೆ ಬಂದಿಲ್ಲ. ಆದರೆ, ಚಂಡೀಗಢ ಮತ್ತು ದೆಹಲಿಯಂತಹ ನಗರಗಳಲ್ಲಿ ಇಂತಹ ಪ್ರಕರಣಗಳು ವರದಿಯಾಗುತ್ತಿರುವುದು ಭಾರತಕ್ಕೆ ಈ ಭೀಕರ ಡ್ರಗ್ ಕಾಲಿಟ್ಟಿರುವ ಮುನ್ಸೂಚನೆ ನೀಡುತ್ತಿದೆ.
ದುನಿಯಾ ವಿಜಯ್ ಆತಂಕ..
ವಿಡಿಯೋ ನೋಡಿದ ದುನಿಯಾ ವಿಜಯ್ ಆತಂಕ ವ್ಯಕ್ತಪಡಿಸಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಕಳವಳ ವ್ಯಕ್ತಪಡಿಸಿರುವ ದುನಿಯಾ ವಿಜಯ್, ನಮಸ್ಕಾರ ನೀವು ಭೀಮಾ ಸಿನಿಮಾ ನೋಡಿರ್ತೀರಿ. ಅದರಲ್ಲಿ ಗಾಂಜಾ ಬಗ್ಗೆ ಮಾತನ್ನಾಡಿದ್ವಿ. ಇದೀಗ ಬೆಂಗಳೂರಿಗೆ ಹೊಸದೊಂದು ಡ್ರಗ್ ಬೆಂಗಳೂರಿಗೆ ಬಂದಿದೆ ಎಂಬ ಸುದ್ದಿ ಇದೆ. ಅದು ಝಾಂಬಿ ಅಂತ. ಇದರಿಂದ ಯುವಕರು ಹುಷಾರಾಗಿರಬೇಕು. ಪೋಷಕರು ಕೂಡ ನಿಮ್ಮ ಮಕ್ಕಳ ಬಗ್ಗೆ ಎಚ್ಚೆತ್ತುಕೊಂಡಿರಿ. ಬೆಂಗಳೂರಿನದ್ದು ಎನ್ನಲಾಗಿರುವ ವಿಡಿಯೋ ಬಗ್ಗೆ ಪೊಲೀಸರು ತನಿಖೆ ನಡೆಸಿ ಮಾಹಿತಿ ನೀಡಬೇಕು ಎಂದು ಕೋರಿಕೊಂಡಿದ್ದಾರೆ.