ಹೊಸದೆಹಲಿ, ಏಪ್ರಿಲ್ 02, 2026: ಪಶ್ಚಿಮ ಏಷ್ಯಾದಲ್ಲಿ ಮುಂದುವರಿಯುತ್ತಿರುವ ಭೌಗೋಳಿಕ ರಾಜಕೀಯ ಉದ್ವಿಗ್ನತೆಯು ಜಾಗತಿಕ ಪೂರೈಕೆ ಸರಪಳಿಯ ಮೇಲೆ ಗಂಭೀರ ಪರಿಣಾಮ ಬೀರಿದ್ದು, ಇದರ ಬಿಸಿ ಈಗ ಭಾರತದ ಆರೋಗ್ಯ ಮತ್ತು ಗರ್ಭನಿರೋಧಕ ಮಾರುಕಟ್ಟೆಗೂ ತಟ್ಟಿದೆ. ಪ್ರಮುಖವಾಗಿ ಪೆಟ್ರೋಕೆಮಿಕಲ್ ಉತ್ಪನ್ನಗಳ ಕೊರತೆಯಿಂದಾಗಿ ಕಾಂಡೋಮ್ ಮತ್ತು ಇತರ ಲೈಂಗಿಕ ಆರೋಗ್ಯ ಉತ್ಪನ್ನಗಳ ತಯಾರಿಕಾ ವೆಚ್ಚವು ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎಂದು ಉದ್ಯಮ ಮೂಲಗಳು ಆತಂಕ ವ್ಯಕ್ತಪಡಿಸಿವೆ.
ಇರಾನ್-ಇಸ್ರೇಲ್ ಸಂಘರ್ಷದ ಹಿನ್ನೆಲೆಯಲ್ಲಿ ಕಚ್ಚಾ ತೈಲ ಮತ್ತು ಅನಿಲ ಸಂಸ್ಕರಣಾ ಘಟಕಗಳ ಮೇಲೆ ಉಂಟಾಗಿರುವ ವ್ಯತ್ಯಯವು ಈ ಬಿಕ್ಕಟ್ಟಿಗೆ ಮೂಲ ಕಾರಣವಾಗಿದೆ. ಕಾಂಡೋಮ್ ತಯಾರಿಕೆಯಲ್ಲಿ ಬಳಕೆಯಾಗುವ ಶೇ. 80ಕ್ಕೂ ಹೆಚ್ಚು ಕಚ್ಚಾ ವಸ್ತುಗಳು ಪೆಟ್ರೋಕೆಮಿಕಲ್ ಘಟಕಗಳನ್ನು ಅವಲಂಬಿಸಿವೆ. ವಿಶೇಷವಾಗಿ, ನೈಸರ್ಗಿಕ ರಬ್ಬರ್ ಲೇಟೆಕ್ಸ್ ಅನ್ನು ದ್ರವ ರೂಪದಲ್ಲಿ ಸಂರಕ್ಷಿಸಲು ಬಳಸುವ ಅಮೋನಿಯಾ ದರವು ಕಳೆದ ತಿಂಗಳಿಗೆ ಹೋಲಿಸಿದರೆ ಶೇ. 50ರಷ್ಟು ಏರಿಕೆಯಾಗಿದೆ. ಭಾರತವು ತನ್ನ ಅಮೋನಿಯಾ ಅಗತ್ಯದ ಬಹುಪಾಲು ಭಾಗವನ್ನು ಪಶ್ಚಿಮ ಏಷ್ಯಾದಿಂದಲೇ ಆಮದು ಮಾಡಿಕೊಳ್ಳುತ್ತಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಸಂಕೀರ್ಣಗೊಳಿಸಿದೆ.
ಇದರ ಜೊತೆಗೆ, ಕಾಂಡೋಮ್ಗಳಲ್ಲಿ ಬಳಸುವ ಸಿಲಿಕೋನ್ ಆಯಿಲ್ ಸಂಪೂರ್ಣವಾಗಿ ಪೆಟ್ರೋಕೆಮಿಕಲ್ ಆಧಾರಿತವಾಗಿದ್ದು, ಇದರ ಪೂರೈಕೆಯಲ್ಲಿ ಶೇ. 30ರಷ್ಟು ಕೊರತೆ ಕಂಡುಬಂದಿದೆ. ಕೆಂಪು ಸಮುದ್ರದ ಮಾರ್ಗವಾಗಿ ನಡೆಯುವ ಸರಕು ಸಾಗಣೆಯ ಮೇಲೆ ಹೌತಿ ಬಂಡುಕೋರರ ದಾಳಿ ಮತ್ತು ಸಂಘರ್ಷದ ಭೀತಿಯಿಂದಾಗಿ ಶಿಪ್ಪಿಂಗ್ ವೆಚ್ಚವು ದುಪ್ಪಟ್ಟಾಗಿರುವುದು ತಯಾರಿಕಾ ಕಂಪನಿಗಳಿಗೆ ನುಂಗಲಾರದ ತುತ್ತಾಗಿದೆ.
ದೇಶದ ಪ್ರಮುಖ ತಯಾರಿಕಾ ಕಂಪನಿಗಳಾದ HLL ಲೈಫ್ಕೇರ್, ಮ್ಯಾನ್ಕೈಂಡ್ ಫಾರ್ಮಾ ಮತ್ತು ಕ್ಯುಪಿಡ್ ಲಿಮಿಟೆಡ್ ಸೇರಿದಂತೆ ಹಲವು ಸಂಸ್ಥೆಗಳು ಉತ್ಪಾದನಾ ವೆಚ್ಚದ ತೀವ್ರ ಒತ್ತಡವನ್ನು ಎದುರಿಸುತ್ತಿವೆ. ಕಚ್ಚಾ ವಸ್ತುಗಳ ಬೆಲೆ ಏರಿಕೆಯ ಹೊರೆಯು ಅಂತಿಮವಾಗಿ ಗ್ರಾಹಕರ ಮೇಲೆ ಬೀರುವ ಸಾಧ್ಯತೆಯಿದ್ದು, ಚಿಲ್ಲರೆ ಮಾರುಕಟ್ಟೆಯಲ್ಲಿ ಗರ್ಭನಿರೋಧಕಗಳ ಬೆಲೆ ಶೇ. 20 ರಿಂದ 40 ರಷ್ಟು ಹೆಚ್ಚಾಗುವ ಮುನ್ಸೂಚನೆ ಇದೆ.