ಬೆಂಗಳೂರು, ಮಾರ್ಚ್ 30: ಸಾಮಾನ್ಯವಾಗಿ ಪತ್ನಿಯರೇ ಪತಿಯ ವಿರುದ್ಧ ಲೈಂಗಿಕ ದೌರ್ಜನ್ಯದ ದೂರು ನೀಡುವುದನ್ನು ಕೇಳಿದ್ದೇವೆ. ಆದರೆ ರಾಜಧಾನಿ ಬೆಂಗಳೂರಿನಲ್ಲಿ ಪತ್ನಿಯ ಲೈಂಗಿಕ ವಿಕೃತಿ ಮತ್ತು ನಿರಂತರ ಟಾರ್ಚರ್ ತಾಳಲಾರದೆ ಪತಿಯೊಬ್ಬರು ಪೊಲೀಸ್ ಠಾಣೆಯ ಮೆಟ್ಟಿಲೇರಿ ದೂರು ದಾಖಲಿಸಿರುವ ಘಟನೆ ಬೆಳಕಿಗೆ ಬಂದಿದೆ.
ಪತ್ನಿಯ ವಿಪರೀತ ಲೈಂಗಿಕ ವಾಂಛೆಯಿಂದ ಬೇಸತ್ತಿರುವ ಪತಿ, ಆಕೆಯ ವಿಕೃತ ಬೇಡಿಕೆಗಳ ಬಗ್ಗೆ ದೂರಿನಲ್ಲಿ ವಿವರಿಸಿದ್ದಾರೆ. ತಾನು ಮಾತ್ರವಲ್ಲದೆ, ತನ್ನ ಸ್ನೇಹಿತೆಯ ಜೊತೆಯೂ ದೈಹಿಕ ಸಂಬಂಧ ಹೊಂದುವಂತೆ ಪತ್ನಿ ಪತಿಯನ್ನು ಒತ್ತಾಯಿಸ್ತಿದ್ದಳು ಎಂಬ ಆಘಾತಕಾರಿ ಆರೋಪ ಕೇಳಿಬಂದಿದೆ. ಅಷ್ಟೇ ಅಲ್ಲದೆ, ಅಶ್ಲೀಲ ವೀಡಿಯೋಗಳನ್ನು ರೆಕಾರ್ಡ್ ಮಾಡಿ ಪತಿಗೆ ಕಳುಹಿಸಿ ವಿಕೃತಿ ಮೆರೆಯುತ್ತಿದ್ದಳು ಎನ್ನಲಾಗಿದೆ.
ಪತ್ನಿಯ ಕಿರುಕುಳ ಇಲ್ಲಿಗೇ ನಿಂತಿಲ್ಲ. ತನ್ನ ಸ್ನೇಹಿತೆಯರ ಜೊತೆ ಮಲಗುವ ಕೋಣೆಯ ರಹಸ್ಯಗಳನ್ನು ಅಥವಾ ‘ಸ್ವೀಟ್ ಮೆಮೋರಿ’ಗಳನ್ನು ಹಂಚಿಕೊಳ್ಳಬೇಕು ಎಂದು ಆಕೆ ಪತಿಗೆ ಪೀಡಿಸುತ್ತಿದ್ದಳು. ಇಂತಹ ವಿಕೃತ ದೈಹಿಕ ಸಂಪರ್ಕ ಮತ್ತು ವರ್ತನೆಗಳಿಗೆ ಒಪ್ಪದಿದ್ದಾಗ ಪತಿಯ ಮೇಲೆ ದೈಹಿಕ ಹಾಗೂ ಮಾನಸಿಕ ಕಿರುಕುಳ ನೀಡಲು ಆರಂಭಿಸಿದ್ದಳು ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಮದುವೆಯಾದ ನಂತರ ತನ್ನ ಹಳೆಯ ಪ್ರೇಮ ಸಂಬಂಧಗಳ ಬಗ್ಗೆ ಪತಿಯ ಬಳಿ ಪದೇ ಪದೇ ಹೇಳಿ ಕಿರಿಕಿರಿ ಉಂಟು ಮಾಡುತ್ತಿದ್ದಳು. ಅಷ್ಟೇ ಅಲ್ಲದೆ, ತಡರಾತ್ರಿ ಕುಡಿದು ಬರುವುದು, ಸ್ನೇಹಿತರ ಜೊತೆ ಅಲೆಯುವುದು ಇಂದಿನ ಕಾಲದಲ್ಲಿ ‘ಕಾಮನ್’ ಎಂದು ವಾದಿಸುತ್ತಿದ್ದ ಪತ್ನಿ, ಪತಿಯ ವಿರೋಧದ ನಡುವೆಯೂ ತನ್ನ ಹಾದಿ ಬದಲಿಸಿಕೊಂಡಿರಲಿಲ್ಲ.
ಪತ್ನಿಯ ಈ ಅಸಲಿ ಮುಖ ತಿಳಿಯುವ ಮುನ್ನವೇ ಪತಿ ಆಕೆಯನ್ನು ನಂಬಿ ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ನೀಡಿದ್ದರು. ಗಲಾಟೆ ಶುರುವಾದ ಮೇಲೆ ಆ ಒಡವೆಗಳನ್ನು ವಾಪಸ್ ನೀಡದೆ ಪತ್ನಿ ಸತಾಯಿಸುತ್ತಿದ್ದಾಳೆ. ಈ ಹಿಂದೆ ಈ ದಂಪತಿ ನಡುವಿನ ಜಗಳದ ಬಗ್ಗೆ ರಾಜಿ ಪಂಚಾಯ್ತಿ ನಡೆದಿತ್ತಾದರೂ, ಪತ್ನಿಯ ವಿಕೃತ ವರ್ತನೆ ಮುಂದುವರೆದ ಹಿನ್ನೆಲೆಯಲ್ಲಿ ಅನಿವಾರ್ಯವಾಗಿ ಪತಿ ಕಾನೂನಿನ ಮೊರೆ ಹೋಗಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಬೆಂಗಳೂರಿನ ಅಮೃತಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.