ಧಾರವಾಡ, ಏಪ್ರಿಲ್ 02: ಬಿಸಿ ನೀರು ಕಾಯಿಸುವ ವೇಳೆ ಹಿಟರ್ ಕಾಯಿಲ್ ಕರೆಂಟ್ ಶಾಕ್ ಗೆ ಮಹಿಳೆಯೊಬ್ಬರು ಸಾವನಪ್ಪಿದ ಘಟನೆ ಧಾರವಾಡ ತಾಲೂಕಿನ ದೇವರ ಹುಬ್ಬಳ್ಳಿ ಗ್ರಾಮದಲ್ಲಿ ಗುರುವಾರ ಸಂಭವಿಸಿದೆ.
ಗ್ರಾಮದ ನಿವಾಸಿ ನಿವೇದಿತಾ ನಾಯ್ಕರ್ (24) ಮೃತಪಟ್ಟ ದುರ್ದೈವಿ. ಮೃತರು ಪತಿ ಹಾಗೂ ಇಬ್ಬರು ಪುಟ್ಟ ಮಕ್ಕಳನ್ನು ಅಗಲಿದ್ದಾರೆ. ನಿವೇದಿತಾ ಅವರು ಸ್ನಾನಕ್ಕಾಗಿ ಬಾತ್ರೂಮ್ನಲ್ಲಿ ಪ್ಲಾಸ್ಟಿಕ್ ಬಕೆಟ್ಗೆ ಎಲೆಕ್ಟ್ರಿಕ್ ಕಾಯಿಲ್ (Heater Coil) ಹಾಕಿ ನೀರು ಕಾಯಿಸಲು ಇಟ್ಟಿದ್ದರು. ನೀರು ಕಾಯಿದಿದೆಯೇ ಎಂದು ಪರೀಕ್ಷಿಸಲು ಹೋದಾಗ ಅಥವಾ ಆಕಸ್ಮಿಕವಾಗಿ ಬಕೆಟ್ ಸ್ಪರ್ಶಿಸಿದಾಗ ತೀವ್ರವಾಗಿ ವಿದ್ಯುತ್ ಪ್ರವಹಿಸಿ ಮೃತಪಟ್ಟಿದ್ದರು ಎಂದು ತಿಳಿದುಬಂದಿದೆ. ವಿಷಯ ತಿಳಿಯುತ್ತಿದ್ದಂತೆಯೇ ಸ್ಥಳಕ್ಕೆ ಭೇಟಿ ನೀಡಿದ ಪೊಲೀಸರು ಪರಿಶೀಲನೆ ನಡೆಸಿದ್ದಾರೆ. ಈ ಸಂಬಂಧ ಧಾರವಾಡ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.