ಭುವನೇಶ್ವರ ಮೇ 07: ಜೇನುತುಪ್ಪ ಸಂಗ್ರಹಿಸಲು ಹೋಗಿ ಬಂಡೆಯ ಕಿರಿದಾದ ಬಿರುಕಿನೊಳಗೆ ತಲೆ ಸಿಲುಕಿಸಿಕೊಂಡು ಆರು ಗಂಟೆಗಳ ಕಾಲ ಸಾವಿನೊಂದಿಗೆ ಹೋರಾಡುತ್ತಿದ್ದ 14 ವರ್ಷದ ಬಾಲಕನನ್ನು ಒಡಿಶಾ ಅಗ್ನಿಶಾಮಕ ದಳದ ಸಿಬ್ಬಂದಿ ರೋಚಕವಾಗಿ ರಕ್ಷಿಸಿದ್ದಾರೆ. ಜೇನುನೊಣಗಳ ಹಿಂಡು ಮತ್ತು ಬೃಹತ್ ಹೆಬ್ಬಾವಿನ ಬೆದರಿಕೆಯ ನಡುವೆಯೂ ನಡೆದ ಈ ಕಾರ್ಯಾಚರಣೆ ದೇಶಾದ್ಯಂತ ಗಮನ ಸೆಳೆದಿದೆ.
ನಯಾಗಢ ಜಿಲ್ಲೆಯ ಕಣಿಪಾದ ಕಾಡಿನಲ್ಲಿರುವ ಚೋಕಖೋಲಾ ಬೆಟ್ಟದ ಮೇಲೆ ಬಾಲಕನು ತನ್ನ ಚಿಕ್ಕಪ್ಪ ರಾಮ್ ಪ್ರಧಾನ್ ಜೊತೆ ಜೇನುತುಪ್ಪ ಸಂಗ್ರಹಿಸಲು ಹೋಗಿದ್ದನು. ಬಂಡೆಯ ಬಿರುಕಿನೊಳಗೆ ಆಳವಾಗಿರುವ ಜೇನುಗೂಡನ್ನು ತಲುಪಲು ಪ್ರಯತ್ನಿಸುವಾಗ ಬಾಲಕನ ತಲೆ ಕಿರಿದಾದ ರಂಧ್ರದಲ್ಲಿ ಭದ್ರವಾಗಿ ಸಿಲುಕಿಕೊಂಡಿತು. ನೆಲಮಟ್ಟದಿಂದ ಸುಮಾರು 250 ಅಡಿ ಎತ್ತರದಲ್ಲಿ ಈ ಘಟನೆ ನಡೆದಿದ್ದು, ಬಾಲಕ ಚಲಿಸಲೂ ಸಾಧ್ಯವಾಗದೆ ಸಿಕ್ಕಿಬಿದ್ದಿದ್ದನು.
ಬಾಲಕ ಕೇವಲ ಬಂಡೆಯಲ್ಲಿ ಸಿಲುಕಿರಲಿಲ್ಲ, ಆತನ ತಲೆಯ ಮೇಲೆ ಸಾವಿರಾರು ಕಾಡು ಜೇನುನೊಣಗಳು ಸುಳಿದಾಡುತ್ತಿದ್ದವು. ಇದರ ನಡುವೆ ಸುಮಾರು ಆರು ಅಡಿ ಉದ್ದದ ಹೆಬ್ಬಾವೊಂದು ಬಾಲಕನ ಸಮೀಪಕ್ಕೆ ಸರಿದು ಬಂದಿದ್ದು ರಕ್ಷಣಾ ತಂಡವನ್ನು ಬೆಚ್ಚಿಬೀಳಿಸಿತ್ತು. ಬಾಲಕನ ಪ್ರಾಣಕ್ಕೆ ಹತ್ತಿರದಲ್ಲಿದ್ದ ಈ ಎರಡೂ ಜೀವಿಗಳು ಅಗ್ನಿಶಾಮಕ ಸಿಬ್ಬಂದಿಗೂ ದೊಡ್ಡ ಸವಾಲಾಗಿದ್ದವು.
ಸುದ್ದಿ ತಿಳಿದ ಕೂಡಲೇ ಭುವನೇಶ್ವರ, ನಯಾಗಢ ಮತ್ತು ಓಡಗಾಂವ್ನಿಂದ 45 ಮಂದಿ ಅಗ್ನಿಶಾಮಕ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿದರು. “ನ್ಯೂಮ್ಯಾಟಿಕ್ ಲಿಫ್ಟಿಂಗ್ ಬ್ಯಾಗ್ಗಳು”, “ರಾಕ್ ಕಟ್ಟರ್ಗಳು” ಮತ್ತು “ಹೈಡ್ರಾಲಿಕ್ ಜ್ಯಾಕ್ಗಳ”ಂತಹ ಅತ್ಯಾಧುನಿಕ ಉಪಕರಣಗಳನ್ನು ಬೆಟ್ಟದ ತುದಿಗೆ ಹೊತ್ತೊಯ್ಯಲಾಯಿತು. ಆರು ಗಂಟೆಗಳ ನಿರಂತರ ಕಾರ್ಯಾಚರಣೆಯ ನಂತರ ಸಂಜೆ 6 ಗಂಟೆಯ ಸುಮಾರಿಗೆ ಬಾಲಕನನ್ನು ಸುರಕ್ಷಿತವಾಗಿ ಹೊರತೆಗೆಯಲಾಯಿತು.
ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದ ಅಗ್ನಿಶಾಮಕ ಸೇವೆಗಳ ಡಿಜಿಪಿ ಸುಧಾಂಶು ಸಾರಂಗಿ ತಂಡದ ಸಾಹಸವನ್ನು ಶ್ಲಾಘಿಸಿದ್ದಾರೆ. ಅಪಾಯದ ನಡುವೆಯೂ ಯಶಸ್ವಿ ಕಾರ್ಯಾಚರಣೆ ನಡೆಸಿದ ತಂಡಕ್ಕೆ ಐಜಿಪಿ ಉಮಾ ಶಂಕರ್ ದಾಶ್ 25,000 ರೂ.ಗಳ ಬಹುಮಾನ ಘೋಷಿಸಿದ್ದಾರೆ. ಸದ್ಯ ಬಾಲಕ ಓಡಗಾಂವ್ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.