ಫರೂಕಾಬಾದ್, ಏಪ್ರಿಲ್ 04: ಮನೆಯ ಆವರಣದೊಳಗೆ ವಾಹನವನ್ನು ಪಾರ್ಕಿಂಗ್ ಮಾಡುವ ವೇಳೆ ಮೊಮ್ಮಗ ಮಾಡಿದ ಸಣ್ಣ ತಪ್ಪಿಗೆ 70 ವರ್ಷದ ವೃದ್ಧೆಯೊಬ್ಬರು ದಾರುಣವಾಗಿ ಬಲಿಯಾದ ಘಟನೆ ಉತ್ತರ ಪ್ರದೇಶದ ಫರೂಕಾಬಾದ್ ಜಿಲ್ಲೆಯ ಮಸೈನಿ ಪ್ರದೇಶದಲ್ಲಿ ಗುರುವಾರ ರಾತ್ರಿ ನಡೆದಿದೆ.
ಏಪ್ರಿಲ್ 2ರಂದು ರಾತ್ರಿ ಸುಮಾರು 8:30ರ ಸುಮಾರಿಗೆ ಈ ಘಟನೆ ಸಂಭವಿಸಿದೆ. ಮೃತ ಸರಲಾ ಕಟಿಯಾರ್ ಅವರು ತಮ್ಮ ಮನೆಯ ಗೇಟ್ ಹಾಕಲು ಬಂದಿದ್ದರು. ಇದೇ ವೇಳೆ ಅವರ ಮೊಮ್ಮಗ ತನ್ನ ಮಹೀಂದ್ರಾ ಥಾರ್ ವಾಹನವನ್ನು ಪಾರ್ಕಿಂಗ್ ಮಾಡಿ ಹ್ಯಾಂಡ್ ಬ್ರೇಕ್ ಹಾಕದೆ ಕೆಳಗೆ ಇಳಿದಿದ್ದಾನೆ. ಈ ವೇಳೆ ಥಾರ್ ಕಾರು ಹಿಂದಕ್ಕೆ ಚಲಿಸಿದ್ದು, ಗೇಟ್ ಬಳಿ ನಿಂತಿದ್ದ ಸರಲಾ ಅವರು ವೇಗವಾಗಿ ಬಂದ ವಾಹನ ಮತ್ತು ಗೋಡೆಯ ನಡುವೆ ಸಿಲುಕಿ ತೀವ್ರವಾಗಿ ಜಜ್ಜಲ್ಪಟ್ಟಿದ್ದಾರೆ.
ಈ ಘಟನೆಯ ಸಂಪೂರ್ಣ ದೃಶ್ಯಾವಳಿಗಳು ಮನೆಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ವಾಹನದ ಅಡಿಯಲ್ಲಿ ಸಿಲುಕಿದ ವೃದ್ಧೆ ಪ್ರಾಣಭಯದಿಂದ ಕಿರುಚಿದರೂ, ವಾಹನವು ಗೋಡೆಗೆ ಅಪ್ಪಳಿಸಿದ ರಭಸಕ್ಕೆ ಅವರು ಗಂಭೀರವಾಗಿ ಗಾಯಗೊಂಡು ಸ್ಥಳದಲ್ಲೇ ಕುಸಿದು ಬಿದ್ದಿದ್ದಾರೆ. ತಕ್ಷಣವೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಕೊನೆಯುಸಿರೆಳೆದಿದ್ದಾರೆ.