ವಾಷಿಂಗ್ಟನ್, ಏಪ್ರಿಲ್ 20: ಅಮೆರಿಕದ ಲೂಸಿಯಾನಾ ರಾಜ್ಯದ ಶ್ರೆವ್ಪೋರ್ಟ್ (Shreveport) ನಗರದಲ್ಲಿ ಭಾನುವಾರ ಮುಂಜಾನೆ ರಕ್ತಸಿಕ್ತ ಅಧ್ಯಾಯವೊಂದು ನಡೆದಿದೆ. ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ವ್ಯಕ್ತಿಯೊಬ್ಬ ತನ್ನ ಏಳು ಮಕ್ಕಳು ಸೇರಿದಂತೆ ಒಟ್ಟು ಎಂಟು ಮಕ್ಕಳನ್ನು ಗುಂಡಿಕ್ಕಿ ಹತ್ಯೆ ಮಾಡಿದ್ದಾನೆ. ಘಟನೆಯಲ್ಲಿ ಇಬ್ಬರು ಮಹಿಳೆಯರು ತೀವ್ರವಾಗಿ ಗಾಯಗೊಂಡಿದ್ದು, ಕೊಲೆಗಾರನನ್ನು ಪೊಲೀಸರು ಎನ್ಕೌಂಟರ್ನಲ್ಲಿ ಹೊಡೆದುರುಳಿಸಿದ್ದಾರೆ.
ಶ್ರೆವ್ಪೋರ್ಟ್ನ ಹ್ಯಾರಿಸನ್ ಸ್ಟ್ರೀಟ್ ಮತ್ತು ಸಿಡಾರ್ ಗ್ರೋವ್ ಬಡಾವಣೆಯ ಒಟ್ಟು ನಾಲ್ಕು ವಿವಿಧ ಸ್ಥಳಗಳಲ್ಲಿ ಈ ಸರಣಿ ಗುಂಡಿನ ದಾಳಿ ನಡೆದಿದೆ. ಶೂಟರ್ನನ್ನು 31 ವರ್ಷದ ಶಮರ್ ಎಲ್ಕಿನ್ಸ್ (Shamar Elkins) ಎಂದು ಗುರುತಿಸಲಾಗಿದೆ. ಭಾನುವಾರ ಮುಂಜಾನೆ ಸುಮಾರು 5:00 ಗಂಟೆಗೆ ಈ ಭೀಕರ ಹತ್ಯಾಕಾಂಡ ಆರಂಭವಾಗಿದ್ದು, ಮೊದಲು ಮಹಿಳೆಯೊಬ್ಬರ ಮೇಲೆ ದಾಳಿ ನಡೆಸಿದ ಎಲ್ಕಿನ್ಸ್, ನಂತರ ಮನೆಯಲ್ಲಿದ್ದ 1 ರಿಂದ 14 ವರ್ಷದೊಳಗಿನ ಮಕ್ಕಳನ್ನು ಗುರಿಯಾಗಿಸಿಕೊಂಡು ಮನಬಂದಂತೆ ಗುಂಡು ಹಾರಿಸಿದ್ದಾನೆ.
ಪೊಲೀಸರು ಸ್ಥಳಕ್ಕೆ ಧಾವಿಸಿದಾಗ ಎಂಟು ಮಕ್ಕಳ ಶವಗಳು ಪತ್ತೆಯಾಗಿವೆ. ಇವರಲ್ಲಿ ಏಳು ಮಕ್ಕಳು ಎಲ್ಕಿನ್ಸ್ನ ಸ್ವಂತ ಮಕ್ಕಳಾಗಿದ್ದು, ಮತ್ತೊಬ್ಬ ಮಗು ಸಂಬಂಧಿಕರದ್ದು ಎಂದು ತಿಳಿದುಬಂದಿದೆ. ದಾಳಿಯ ವೇಳೆ ಪ್ರಾಣ ಉಳಿಸಿಕೊಳ್ಳಲು ಮನೆಯ ಮೇಲ್ಛಾವಣಿ (Roof) ಹತ್ತಿದ ಮಗುವನ್ನು ಕೂಡ ಕ್ರೂರಿ ಎಲ್ಕಿನ್ಸ್ ಬೆನ್ನಟ್ಟಿ ಹತ್ಯೆ ಮಾಡಿದ್ದಾನೆ. ಘಟನೆಯಲ್ಲಿ ಗಂಭೀರವಾಗಿ ಗಾಯಗೊಂಡಿರುವ ಶೂಟರ್ ಪತ್ನಿ ಮತ್ತು ಮತ್ತೊಬ್ಬ ಮಹಿಳೆ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾರೆ.
ಹತ್ಯಾಕಾಂಡದ ನಂತರ ಎಲ್ಕಿನ್ಸ್ ವ್ಯಕ್ತಿಯೊಬ್ಬನ ಕಾರನ್ನು ಕಸಿದುಕೊಂಡು (Carjacking) ಪರಾರಿಯಾಗಲು ಯತ್ನಿಸಿದನು. ಬಾಸ್ಸಿಯರ್ ಸಿಟಿ ವರೆಗೂ ಈತನನ್ನು ಬೆನ್ನಟ್ಟಿದ ಪೊಲೀಸರು, ಶರಣಾಗಲು ನಿರಾಕರಿಸಿ ಗುಂಡಿನ ದಾಳಿ ನಡೆಸಿದ ಶೂಟರ್ನನ್ನು ಎನ್ಕೌಂಟರ್ನಲ್ಲಿ ಹತ್ಯೆ ಮಾಡಿದ್ದಾರೆ. ಈ ಕಾರ್ಯಾಚರಣೆಯಲ್ಲಿ ಯಾವುದೇ ಪೊಲೀಸ್ ಅಧಿಕಾರಿಗಳಿಗೆ ಗಾಯಗಳಾಗಿಲ್ಲ ಎಂದು ಹಿರಿಯ ಅಧಿಕಾರಿಗಳು ದೃಢಪಡಿಸಿದ್ದಾರೆ.
ತನಿಖೆಯ ವೇಳೆ ಶಮರ್ ಎಲ್ಕಿನ್ಸ್ ಈ ಹಿಂದೆಯೂ ಕ್ರಿಮಿನಲ್ ಚಟುವಟಿಕೆಗಳಲ್ಲಿ ಭಾಗಿಯಾಗಿರುವುದು ಬೆಳಕಿಗೆ ಬಂದಿದೆ. 2019 ರಲ್ಲಿ ಅಕ್ರಮ ಶಸ್ತ್ರಾಸ್ತ್ರ ಹೊಂದಿದ್ದಕ್ಕಾಗಿ ಈತ ಬಂಧಿತನಾಗಿದ್ದನು ಮತ್ತು ಪ್ರಸ್ತುತ ಕಾನೂನು ನಿಗಾ (Probation) ಅಡಿಯಲ್ಲಿದ್ದನು. ಈ ಭೀಕರ ಹತ್ಯಾಕಾಂಡಕ್ಕೆ ನಿಖರವಾದ ಕಾರಣವಿನ್ನೂ ತಿಳಿದುಬಂದಿಲ್ಲವಾದರೂ, ಪ್ರಾಥಮಿಕ ತನಿಖೆಯಲ್ಲಿ ಇದು ತೀವ್ರ ಕೌಟುಂಬಿಕ ಕಲಹದ ಪರಿಣಾಮ ಎಂದು ಶಂಕಿಸಲಾಗಿದೆ. ನಗರದ ಮೇಯರ್ ಟಾಮ್ ಆರ್ಸೆನೋಕ್ಸ್ ಈ ಘಟನೆಯನ್ನು ನಗರದ ಇತಿಹಾಸದಲ್ಲೇ ಅತ್ಯಂತ “ದುರಂತಮಯ ಮತ್ತು ಕರಾಳ ಸನ್ನಿವೇಶ” ಎಂದು ಬಣ್ಣಿಸಿದ್ದಾರೆ. 2026 ರಲ್ಲಿ ಅಮೆರಿಕದಲ್ಲಿ ನಡೆದ ಅತ್ಯಂತ ಭೀಕರ ಸಾಮೂಹಿಕ ಹತ್ಯೆಗಳಲ್ಲಿ ಇದು ಒಂದಾಗಿದ್ದು, ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದೆ.