ಮಧುರೈ ಎಪ್ರಿಲ್ 09: ತಮಿಳುನಾಡಿನ ತೂತುಕುಡಿ ಜಿಲ್ಲೆಯ ಸಾಥನ್ಕುಲಂನಲ್ಲಿ ನಡೆದ ಜಯರಾಜ್ ಮತ್ತು ಬೆನ್ನಿಕ್ಸ್ ಅವರ ಅಮಾನವೀಯ ಕಸ್ಟಡಿ ಸಾವು ಪ್ರಕರಣದಲ್ಲಿ ಒಂಬತ್ತು ಪೊಲೀಸರಿಗೆ ಗಲ್ಲು ಶಿಕ್ಷೆಯಾಗಿದೆ. ಈ ಐತಿಹಾಸಿಕ ತೀರ್ಪು ಹೊರಬರಲು ಸಾಧ್ಯವಾಗಿದ್ದು ಹೆಡ್ ಕಾನ್ಸ್ಟೇಬಲ್ ರೇವತಿ ಎಂಬ ಮಹಿಳಾ ಅಧಿಕಾರಿಯೊಬ್ಬರ ಅಚಲ ಧೈರ್ಯದಿಂದ. ತನ್ನ ವೃತ್ತಿಜೀವನ ಮತ್ತು ಕುಟುಂಬದ ಸುರಕ್ಷತೆಯನ್ನು ಪಣಕ್ಕಿಟ್ಟು, ಸಹೋದ್ಯೋಗಿಗಳ ವಿರುದ್ಧವೇ ಸಾಕ್ಷ್ಯ ನುಡಿದ ಅವರ ಸಾಹಸ ಈಗ ದೇಶಾದ್ಯಂತ ಶ್ಲಾಘನೆಗೆ ಪಾತ್ರವಾಗಿದೆ.
ಕ್ರೌರ್ಯದ ಸಾಕ್ಷಿ:
2020ರ ಜೂನ್ನಲ್ಲಿ ನಡೆದ ಆ ಕರಾಳ ರಾತ್ರಿಯ ಘಟನೆಯನ್ನು ರೇವತಿ ಮ್ಯಾಜಿಸ್ಟ್ರೇಟ್ ಮುಂದೆ ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದರು. “ನಾನು ಠಾಣೆಗೆ ಬಂದಾಗ ಒಳಗಿನಿಂದ ‘ಅಮ್ಮಾ, ನೋವಾಗುತ್ತಿದೆ, ನನ್ನನ್ನು ಬಿಟ್ಟುಬಿಡಿ’ ಎಂದು ಯಾರೋ ಕಿರುಚುತ್ತಿದ್ದರು. ಅಷ್ಟೊತ್ತಿಗಾಗಲೇ ಜಯರಾಜ್ ಮತ್ತು ಬೆನ್ನಿಕ್ಸ್ ರಕ್ತಸಿಕ್ತರಾಗಿದ್ದರು. ಅವರ ಮೇಲೆ ಪೊಲೀಸರು ಅಮಾನವೀಯವಾಗಿ ಹಲ್ಲೆ ನಡೆಸುತ್ತಿದ್ದರು,” ಎಂದು ಅವರು ವಿವರಿಸಿದ್ದರು.
ಭಯದ ನಡುವೆಯೂ ಧೈರ್ಯ:
ಬಂಧಿತ ಅಧಿಕಾರಿಗಳು ಹಿರಿಯರು ಮತ್ತು ಪ್ರಭಾವಶಾಲಿಗಳಾಗಿದ್ದರೂ, ಕಾನ್ಸ್ಟೇಬಲ್ ಆಗಿದ್ದ ರೇವತಿ ಸತ್ಯ ಹೇಳಲು ಹಿಂದೆ ಸರಿಯಲಿಲ್ಲ. “ಸರ್, ನಾನು ಇಬ್ಬರು ಹೆಣ್ಣುಮಕ್ಕಳ ತಾಯಿ. ನನ್ನ ಮಕ್ಕಳ ಸುರಕ್ಷತೆ ಮತ್ತು ಕೆಲಸದ ಬಗ್ಗೆ ನೀವು ಖಾತರಿ ನೀಡಬಲ್ಲಿರಾ?” ಎಂದು ಮ್ಯಾಜಿಸ್ಟ್ರೇಟ್ ಎಂ.ಎಸ್. ಭಾರತಿದಾಸನ್ ಅವರ ಮುಂದೆ ಕಣ್ಣೀರು ಹಾಕುತ್ತಲೇ ಘಟನೆಯ ಪ್ರತಿ ನಿಮಿಷದ ವಿವರಗಳನ್ನು ದಾಖಲಿಸಿದ್ದರು.
ಅಪರೂಪದ ಸಾಕ್ಷ್ಯ:
ಸಾಮಾನ್ಯವಾಗಿ ಪೊಲೀಸ್ ಇಲಾಖೆಯಲ್ಲಿ ಸಹೋದ್ಯೋಗಿಗಳ ವಿರುದ್ಧ ಸಾಕ್ಷ್ಯ ಹೇಳುವುದು ಬಹಳ ವಿರಳ. ಆದರೆ, ರೇವತಿ ಅವರು ಠಾಣೆಯಲ್ಲಿದ್ದ ಸಿಸಿಟಿವಿ ದೃಶ್ಯಗಳನ್ನು ಅಳಿಸಿಹಾಕುವ ಪ್ರಯತ್ನ ಮತ್ತು ಲಾಠಿ-ಟೇಬಲ್ಗಳ ಮೇಲಿದ್ದ ರಕ್ತದ ಕಲೆಗಳನ್ನು ಗುರುತಿಸಲು ತನಿಖಾಧಿಕಾರಿಗಳಿಗೆ ನೆರವಾಗಿದ್ದರು. ಪೊಲೀಸರು ಗಾಯಗೊಂಡ ವ್ಯಕ್ತಿಯಿಂದಲೇ ನೆಲದ ಮೇಲಿದ್ದ ರಕ್ತವನ್ನು ಒರೆಸುವಂತೆ ಮಾಡಿದ್ದನ್ನು ಅವರು ಕಣ್ಣಾರೆ ಕಂಡಿದ್ದರು.
ಬೆದರಿಕೆ ಮತ್ತು ರಕ್ಷಣೆ:
ರೇವತಿ ಸಾಕ್ಷ್ಯ ನೀಡದಂತೆ ಠಾಣೆಯಲ್ಲಿದ್ದ ಇತರ ಪೊಲೀಸರು ಭಾರಿ ಒತ್ತಡ ಹೇರಿದ್ದರು. ಮ್ಯಾಜಿಸ್ಟ್ರೇಟ್ ವಿಚಾರಣೆ ನಡೆಸುತ್ತಿದ್ದಾಗಲೂ ಪೊಲೀಸರು ಠಾಣೆಯ ಸುತ್ತುವರಿದು ಬೆದರಿಕೆ ಹಾಕುತ್ತಿದ್ದರು. ಈ ಹಿನ್ನೆಲೆಯಲ್ಲಿ ಮದ್ರಾಸ್ ಹೈಕೋರ್ಟ್ ಆದೇಶದ ಮೇರೆಗೆ ಅವರಿಗೆ ವಿಶೇಷ ಪೊಲೀಸ್ ರಕ್ಷಣೆ ನೀಡಲಾಗಿತ್ತು. ಅಂದಿನ ಹೈಕೋರ್ಟ್ ನ್ಯಾಯಾಧೀಶರು ಸ್ವತಃ ದೂರವಾಣಿ ಕರೆ ಮಾಡಿ ರೇವತಿ ಅವರಿಗೆ ಧೈರ್ಯ ತುಂಬಿದ್ದರು.
ನ್ಯಾಯದ ಜಯ:
ಒಂಬತ್ತು ಪೊಲೀಸರಿಗೆ ಮರಣದಂಡನೆ ವಿಧಿಸಿರುವ ಮಧುರೈ ನ್ಯಾಯಾಲಯವು, ರೇವತಿ ಅವರ ಸಾಕ್ಷ್ಯವು ಪ್ರಕರಣದಲ್ಲಿ ಎಷ್ಟು ಮಹತ್ವದ್ದಾಗಿತ್ತು ಎಂಬುದನ್ನು ಉಲ್ಲೇಖಿಸಿದೆ. ಅಧಿಕಾರ ದುರುಪಯೋಗಪಡಿಸಿಕೊಂಡ ಖಾಕಿ ಪಡೆಗೆ ಈ ತೀರ್ಪು ಒಂದು ಎಚ್ಚರಿಕೆಯಾಗಿದ್ದು, ಇದರಲ್ಲಿ ರೇವತಿ ಅವರ ಪಾತ್ರ ಸುವರ್ಣಾಕ್ಷರಗಳಲ್ಲಿ ಬರೆದಿಡುವಂತದ್ದು.