ಮಲೇಷ್ಯಾ, ಏಪ್ರಿಲ್ 25: ಇರಾನ್ ಹಾಗೂ ಮಧ್ಯಪ್ರಾಚ್ಯ ರಾಷ್ಟ್ರಗಳಲ್ಲಿನ ಯುದ್ಧದ ಭೀತಿಯು ಜಾಗತಿಕ ಪೂರೈಕೆ ಸರಪಳಿಯ ಮೇಲೆ ಗಂಭೀರ ಪರಿಣಾಮ ಬೀರಿದ್ದು, ಮುಂದಿನ ದಿನಗಳಲ್ಲಿ ಕಾಂಡೋಮ್ಗಳ ಬೆಲೆ ಶೇ. 20 ರಿಂದ 30ರಷ್ಟು ಏರಿಕೆಯಾಗುವ ಲಕ್ಷಣಗಳು ಕಂಡುಬಂದಿವೆ. ವಿಶ್ವದ ಅತಿದೊಡ್ಡ ಕಾಂಡೋಮ್ ತಯಾರಕ ಸಂಸ್ಥೆಯಾದ ಮಲೇಷ್ಯಾ ಮೂಲದ ‘ಕಾರೆಕ್ಸ್’ (Karex), ಈ ಹೆಚ್ಚುವರಿ ವೆಚ್ಚದ ಹೊರೆಯನ್ನು ಗ್ರಾಹಕರಿಗೆ ವರ್ಗಾಯಿಸುವುದು ಅನಿವಾರ್ಯವಾಗಿದೆ ಎಂದು ತಿಳಿಸಿದೆ.
ವಿಶ್ವದ ಕಾಂಡೋಮ್ ಬೇಡಿಕೆಯ ಬಹುಪಾಲು ಪೂರೈಕೆಯು ಆಗ್ನೇಯ ಏಷ್ಯಾದ ರಾಷ್ಟ್ರಗಳಿಂದ ನಡೆಯುತ್ತದೆ. ಹಾರ್ಮುಜ್ ಜಲಸಂಧಿ ಮತ್ತು ಕೆಂಪು ಸಮುದ್ರದ ಮಾರ್ಗಗಳಲ್ಲಿ ಭದ್ರತಾ ಭೀತಿ ಎದುರಾಗಿರುವುದರಿಂದ, ಸರಕು ಸಾಗಣೆ ಹಡಗುಗಳು ದೀರ್ಘವಾದ ಪರ್ಯಾಯ ಮಾರ್ಗಗಳನ್ನು ಆಶ್ರಯಿಸಿವೆ. ಇದರಿಂದಾಗಿ ಸಾಗಾಟ ವೆಚ್ಚ ಹಾಗೂ ವಿಮಾ ವೆಚ್ಚಗಳು (Insurance Cost) ವಿಪರೀತವಾಗಿ ಏರಿಕೆಯಾಗಿದ್ದು, ಯುರೋಪ್ ಮತ್ತು ಅಮೆರಿಕದಂತಹ ದೇಶಗಳಿಗೆ ಉತ್ಪನ್ನಗಳು ತಲುಪಲು ಮೊದಲಿನ ಅವಧಿಗಿಂತ ದುಪ್ಪಟ್ಟು ಸಮಯ ತಗುಲುತ್ತಿದೆ. ಈ ವಿಳಂಬವು ಮಾರುಕಟ್ಟೆಯಲ್ಲಿ ಕೃತಕ ಅಭಾವವನ್ನು ಸೃಷ್ಟಿಸಿದೆ.
ಕಾಂಡೋಮ್ ತಯಾರಿಕೆಯಲ್ಲಿ ಪ್ರಮುಖವಾಗಿ ಬಳಸುವ ಪೆಟ್ರೋಕೆಮಿಕಲ್ ಆಧಾರಿತ ಕಚ್ಚಾ ವಸ್ತುಗಳಾದ ಸಿಲಿಕೋನ್ ಆಯಿಲ್, ಅಮೋನಿಯಾ ಮತ್ತು ಸಿಂಥೆಟಿಕ್ ರಬ್ಬರ್ ಬೆಲೆಗಳು ತೈಲ ದರ ಏರಿಕೆಯ ಬೆನ್ನಲ್ಲೇ ಗಣನೀಯವಾಗಿ ಹೆಚ್ಚಾಗಿವೆ. ಕೆಲವು ಅಗತ್ಯ ಕಚ್ಚಾ ವಸ್ತುಗಳ ಬೆಲೆಯಲ್ಲಿ ಶೇ. 100ರಷ್ಟು ಏರಿಕೆಯಾಗಿದೆ ಎಂದು ವರದಿಯಾಗಿದೆ. ಇದರೊಂದಿಗೆ ಪ್ಯಾಕಿಂಗ್ಗೆ ಬಳಸುವ ಅಲ್ಯೂಮಿನಿಯಂ ಫಾಯಿಲ್ ಮತ್ತು ಪೇಪರ್ ಬಾಕ್ಸ್ಗಳ ಬೆಲೆ ಕೂಡ ಹೆಚ್ಚಾಗಿದ್ದು, ಉತ್ಪಾದನಾ ವೆಚ್ಚವನ್ನು ಏರಿಸಿದೆ.
ವಿಶ್ವದ ಪ್ರತಿ ಐದು ಕಾಂಡೋಮ್ಗಳಲ್ಲಿ ಒಂದನ್ನು ಉತ್ಪಾದಿಸುವ ಕಾರೆಕ್ಸ್ ಸಂಸ್ಥೆಯ ಈ ನಿರ್ಧಾರವು ಭಾರತೀಯ ಮಾರುಕಟ್ಟೆಯ ಮೇಲೆಯೂ ಪರಿಣಾಮ ಬೀರಲಿದೆ. ಭಾರತದಲ್ಲಿ ಲಭ್ಯವಿರುವ ಡ್ಯುರೆಕ್ಸ್ (Durex), ಟ್ರೋಜನ್ (Trojan) ನಂತಹ ಅಂತರಾಷ್ಟ್ರೀಯ ಬ್ರ್ಯಾಂಡ್ಗಳ ಬೆಲೆ ಶೀಘ್ರದಲ್ಲೇ ಏರಿಕೆಯಾಗುವ ಸಾಧ್ಯತೆಯಿದೆ. ಅಲ್ಲದೆ, ಸ್ಥಳೀಯ ಕಂಪನಿಗಳಿಗೂ ಕಚ್ಚಾ ವಸ್ತುಗಳ ಆಮದು ತುಟ್ಟಿಯಾಗುತ್ತಿರುವುದು ಬೆಲೆ ಏರಿಕೆಗೆ ದಾರಿ ಮಾಡಿಕೊಡುತ್ತಿದೆ.