ಮಂಗಳೂರು ಜುಲೈ 06: ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವ್ಯಾಸಂಗ ಮುಗಿಸಿ ಉದ್ಯೋಗಕ್ಕಾಗಿ ಹುಡುಕಾಟ ನಡೆಸುತ್ತಿದ್ದ 28 ವರ್ಷದ ಯುವ ಇಂಜಿನಿಯರ್ ಒಬ್ಬರಿಗೆ ಹೆಸರಾಂತ ವೋಲ್ವೋ (Volvo) ಕಂಪನಿಯಲ್ಲಿ ಕೆಲಸ ಕೊಡಿಸುವುದಾಗಿ ನಂಬಿಸಿ, ಸೈಬರ್ ವಂಚಕರು ಬರೋಬ್ಬರಿ ₹2,93,512 ಹಣವನ್ನು ವಿವಿಧ ಬ್ಯಾಂಕ್ ಖಾತೆಗಳ ಮೂಲಕ ದೋಚಿ ವಂಚಿಸಿರುವ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ.
ವಂಚನೆಗೆ ಒಳಗಾದ ಇಂಜಿನಿಯರ್ ತಕ್ಷಣವೇ ‘1930’ ಸೈಬರ್ ಕ್ರೈಂ ಹೆಲ್ಪ್ಲೈನ್ಗೆ ಕರೆ ಮಾಡಿ ದೂರು ದಾಖಲಿಸಿದ ಬೆನ್ನಲ್ಲೇ, ಇಂದು ಪೊಲೀಸ್ ಠಾಣೆಗೆ ಭೇಟಿ ನೀಡಿ ಅಧಿಕೃತ ಲಿಖಿತ ದೂರು ನೀಡಿದ್ದಾರೆ.
ಪೊಲೀಸ್ ದೂರಿನ ವಿವರಗಳ ಪ್ರಕಾರ, ಮೇ 27, 2026 ರಂದು ಮಧ್ಯಾಹ್ನ ಪಿರ್ಯಾದಿದಾರರಿಗೆ 8777542510 ಮೊಬೈಲ್ ಸಂಖ್ಯೆಯಿಂದ ಕರೆ ಬಂದಿತ್ತು. ತಾನು ‘ಪ್ರವೀಣ್ ಜಾಬ್ ಏಜೆನ್ಸಿ’ಯಿಂದ ಮಾತನಾಡುತ್ತಿರುವುದಾಗಿ ಪರಿಚಯಿಸಿಕೊಂಡ ವ್ಯಕ್ತಿ, ಬೆಂಗಳೂರಿನ ಹೊಸಕೋಟೆ ವೋಲ್ವೋ ಕಂಪನಿಯಲ್ಲಿ ಮೆಕ್ಯಾನಿಕಲ್ ಪ್ರೊಡಕ್ಷನ್ ಇಂಜಿನಿಯರ್ ಹುದ್ದೆ ಖಾಲಿ ಇದೆ ಎಂದು ನಂಬಿಸಿದ್ದಾನೆ. ಮೊದಲು ಇಂಟರ್ವ್ಯೂ ಚಾರ್ಜ್ ಎಂದು ₹2,000 ಹಣವನ್ನು ಯೂನಿಯನ್ ಬ್ಯಾಂಕ್ ಖಾತೆಗೆ ವರ್ಗಾಯಿಸಿಕೊಳ್ಳಲಾಗಿತ್ತು. ಇದಾದ ಬಳಿಕ ಮೇ 29 ರಂದು ವಂಚಕರು ಇಂಜಿನಿಯರ್ಗೆ ನಕಲಿ ಇಮೇಲ್ ಐಡಿ (amit.sharma@career-volvogroup.com) ಮೂಲಕ ಇಂಟರ್ವ್ಯೂ ವಿಡಿಯೋ ಲಿಂಕ್ ಒಂದನ್ನು ಕಳುಹಿಸಿಕೊಟ್ಟಿದ್ದರು.
ಜೂನ್ 1 ರಂದು “ನೀವು ಇಂಟರ್ವ್ಯೂನಲ್ಲಿ ಸೆಲೆಕ್ಟ್ ಆಗಿದ್ದೀರಾ” ಎಂದು ನಂಬಿಸಿ ವಂಚಕರು ಮತ್ತೆ ₹20,000 ಹಣವನ್ನು ಜಮೆ ಮಾಡಿಸಿಕೊಂಡಿದ್ದಾರೆ. ಇದಾದ ಬಳಿಕ ಜೂನ್ 6 ರಂದು ಗೇಟ್ ಪಾಸ್ ಚಾರ್ಜ್ ಎಂದು ₹27,600, ಜೂನ್ 13 ರಂದು ಮೆಡಿಕಲ್ ಚಾರ್ಜ್ ಎಂದು ₹40,000 ಹಣವನ್ನು ಇಂಡಿಯನ್ ಓವರ್ಸೀಸ್ ಬ್ಯಾಂಕ್ ಖಾತೆಗೆ ವರ್ಗಾಯಿಸಿಕೊಂಡಿದ್ದಾರೆ. ಜೂನ್ 15 ರಿಂದ ಜೂನ್ 25 ರವರೆಗಿನ ಅವಧಿಯಲ್ಲಿ ಬೇರೆ ಬೇರೆ ಸುಳ್ಳು ಕಾರಣಗಳನ್ನು ನೀಡಿ ಲಕ್ಷಾಂತರ ರೂಪಾಯಿ ಹಣವನ್ನು ವಂಚಕರು ಇಂಜಿನಿಯರ್ ಖಾತೆಯಿಂದ ದೋಚಿದ್ದಾರೆ.
ನಿರಂತರವಾಗಿ ಹಣ ಕೇಳುತ್ತಿದ್ದರಿಂದ ಬೇಸತ್ತ ಇಂಜಿನಿಯರ್, ಜೂನ್ 26 ರಂದು ಕರೆ ಮಾಡಿ ತನಗೆ ಉದ್ಯೋಗ ಬೇಡ, ಪ್ರಕ್ರಿಯೆಯನ್ನು ಕ್ಯಾನ್ಸಲ್ ಮಾಡಿ ಹಣ ವಾಪಸ್ ಕೊಡಿ ಎಂದು ಕೇಳಿದ್ದಾರೆ. ಈ ವೇಳೆ ಖದೀಮರು ಉದ್ಯೋಗ ಪ್ರಕ್ರಿಯೆ ಕ್ಯಾನ್ಸಲೇಶನ್ ಚಾರ್ಜ್ ಎಂದು ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಖಾತೆಗೆ ಮತ್ತೆ ₹15,579 ಹಣವನ್ನು ವರ್ಗಾಯಿಸಿಕೊಂಡಿದ್ದಾರೆ. ಕೊನೆಗೆ ಯಾವುದೇ ಉದ್ಯೋಗವನ್ನೂ ನೀಡದೆ, ಹಣವನ್ನೂ ವಾಪಸ್ ನೀಡದೆ ಒಟ್ಟು ₹2,93,512 ಲೂಟಿ ಮಾಡಿ ಮೊಬೈಲ್ ಆಫ್ ಮಾಡಿಕೊಂಡಿದ್ದಾರೆ. ಸೈಬರ್ ಪೊಲೀಸರು ಐಟಿ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡು, ವಂಚಕರು ಬಳಸಿದ ಐಪಿ ವಿಳಾಸ, ಇಮೇಲ್ ಹಾಗೂ ಬ್ಯಾಂಕ್ ಖಾತೆಗಳ ಬ್ಯಾಂಕ್ ಸ್ಟೇಟ್ಮೆಂಟ್ ಆಧರಿಸಿ ತನಿಖೆ ಚುರುಕುಗೊಳಿಸಿದ್ದಾರೆ.