ದೋಹಾ, ಮಾರ್ಚ್ 21: ಕತಾರ್ನ ಪ್ರಮುಖ ಎಲ್ಎನ್ಜಿ ಉತ್ಪಾದನಾ ಕೇಂದ್ರವಾದ Ras Laffan Industrial City ಮೇಲೆ ಇರಾನ್ ನಡೆಸಿದ ಕ್ಷಿಪಣಿ ದಾಳಿಯಿಂದ ಭಾರೀ ಹಾನಿ ಸಂಭವಿಸಿದೆ. ಘಟಕವನ್ನು ಸಂಪೂರ್ಣವಾಗಿ ಮರುಸ್ಥಾಪಿಸಲು ಕನಿಷ್ಠ 3ರಿಂದ 5 ವರ್ಷಗಳ ಅವಧಿ ಬೇಕಾಗಬಹುದು ಎಂದು ತಿಳಿದುಬಂದಿದೆ.
ಮಾರ್ಚ್ 18 ಮತ್ತು 19ರಂದು ಸತತ ಎರಡು ದಿನ ನಡೆದ ದಾಳಿಯಲ್ಲಿ ಅನೇಕ ಎಲ್ಎನ್ಜಿ ಸೌಲಭ್ಯಗಳು ಗಂಭೀರವಾಗಿ ಹಾನಿಗೊಳಗಾಗಿವೆ. ಪರಿಣಾಮವಾಗಿ ಅನಿಲ ಉತ್ಪಾದನೆ ಸ್ಥಗಿತಗೊಂಡಿದ್ದು, ಜಾಗತಿಕ ಇಂಧನ ಪೂರೈಕೆಯಲ್ಲಿ ಅಸ್ಥಿರತೆ ಉಂಟಾಗಿದೆ. ಅಂತರಾಷ್ಟ್ರೀಯ ಮಾಧ್ಯಮಗಳಾದ Reuters ಮತ್ತು Bloomberg ವರದಿ ಪ್ರಕಾರ, ಈ ದಾಳಿಯ ಪರಿಣಾಮ ಎಲ್ಎನ್ಜಿ ರಫ್ತು ಶೇ.15ರಿಂದ 20ರಷ್ಟು ಕುಸಿತ ಕಾಣಬಹುದು. ಇದರಿಂದ ಜಾಗತಿಕ ಮಾರುಕಟ್ಟೆಯಲ್ಲಿ ಅನಿಲದ ಬೆಲೆ ಏರಿಕೆ ಸಾಧ್ಯತೆ ಹೆಚ್ಚಾಗಿದೆ.
ಈ ಬೆಳವಣಿಗೆ India ಸೇರಿದಂತೆ ಕತಾರ್ನ ಮೇಲೆ ಅವಲಂಬಿತ ರಾಷ್ಟ್ರಗಳಿಗೆ ದೊಡ್ಡ ಹೊಡೆತವಾಗಿದೆ. ಭಾರತ ತನ್ನ ಎಲ್ಎನ್ಜಿ ಅಗತ್ಯದ ಪ್ರಮುಖ ಭಾಗವನ್ನು ಕತಾರ್ನಿಂದಲೇ ಆಮದು ಮಾಡಿಕೊಳ್ಳುತ್ತದೆ. ಇದರಿಂದ ಅನಿಲ ಕೊರತೆ ಮತ್ತು ಬೆಲೆ ಏರಿಕೆ ಆತಂಕ ಎದುರಾಗಿದೆ. ಕತಾರ್ ಎನರ್ಜಿ ಸಿಇಒ ಹಾಗೂ ಇಂಧನ ವ್ಯವಹಾರಗಳ ರಾಜ್ಯ ಸಚಿವ Saad Al-Kaabi ಪ್ರತಿಕ್ರಿಯಿಸಿ, “ಪವಿತ್ರ Ramadan ಸಮಯದಲ್ಲಿ ಇಂತಹ ದಾಳಿ ನಡೆಯುವುದು ಅಚ್ಚರಿಯ ಸಂಗತಿ. ನಾವು ಇದನ್ನು ನಿರೀಕ್ಷಿಸಲಿಲ್ಲ,” ಎಂದು ತಿಳಿಸಿದ್ದಾರೆ.
ದಾಳಿಯಿಂದ ಉಂಟಾದ ಹಾನಿಯ ಪರಿಣಾಮವಾಗಿ ಈ ಕೈಗಾರಿಕಾ ಪ್ರದೇಶದ ಅಭಿವೃದ್ಧಿ ಕನಿಷ್ಠ 10ರಿಂದ 20 ವರ್ಷ ಹಿಂದಕ್ಕೆ ಹೋಗಿರುವಂತಾಗಿದೆ ಎಂದು ಅವರು ಹೇಳಿದ್ದಾರೆ. ಇದೇ ವೇಳೆ, ExxonMobil ಹಾಗೂ Shell ಸೇರಿದಂತೆ ಅಂತರರಾಷ್ಟ್ರೀಯ ಕಂಪನಿಗಳು ಪಾಲುದಾರರಾಗಿರುವ ಕೆಲವು ಘಟಕಗಳ ದುರಸ್ತಿಗೆ ಕನಿಷ್ಠ ಒಂದು ವರ್ಷ ಬೇಕಾಗಬಹುದು ಎಂದು ಅಂದಾಜಿಸಲಾಗಿದೆ.