ಢಾಕಾ ಮೇ 29: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ವಿಶಿಷ್ಟ ಹೇರ್ಸ್ಟೈಲ್ ಹೋಲುವ ಹೊಂಬಣ್ಣದ ಕೂದಲುಗಳನ್ನು ಹೊಂದಿದ್ದ, ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಹವಾ ಸೃಷ್ಟಿಸಿದ್ದ ಅಪರೂಪದ ಆಲ್ಬಿನೋ (ಬಿಳಿ) ಎಮ್ಮೆಯೊಂದು ಈದ್ ಹಬ್ಬದ ಬಲಿಯಾಗುವುದರಿಂದ ಕೊನೆಯ ಕ್ಷಣದಲ್ಲಿ ಸ್ವಲ್ಪದರಲ್ಲೇ ತಪ್ಪಿಸಿಕೊಂಡಿದೆ. ಸರ್ಕಾರದ ಆದೇಶದ ಮೇರೆಗೆ ಕಾರ್ಯಾಚರಣೆ ನಡೆಸಿದ ಪೊಲೀಸರು ಎಮ್ಮೆಯನ್ನು ಕಸ್ಟಡಿಗೆ ಪಡೆದು ಢಾಕಾದ ರಾಷ್ಟ್ರೀಯ ಮೃಗಾಲಯಕ್ಕೆ ರವಾನಿಸಿದ್ದಾರೆ.
ಢಾಕಾದಲ್ಲಿ ಬಕ್ರೀದ್ ಆಚರಣೆಯ ಹಿನ್ನೆಲೆಯಲ್ಲಿ ಈ ಅಪರೂಪದ ಆಲ್ಬಿನೋ ಎಮ್ಮೆಯನ್ನು ಬಲಿಕೊಡಲು ಎಲ್ಲಾ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿತ್ತು. ಆದರೆ, ಬಲಿ ಪ್ರಕ್ರಿಯೆಗೆ ಕೆಲವೇ ಗಂಟೆಗಳ ಮೊದಲು ಸರ್ಕಾರದ ಉನ್ನತ ಆದೇಶದ ಮೇರೆಗೆ ಸ್ಥಳಕ್ಕೆ ಧಾವಿಸಿದ ಪೊಲೀಸರು, 700 ಕೆಜಿ ತೂಕದ ಈ ಎಮ್ಮೆಯನ್ನು ಬಲಿಕೊಡದಂತೆ ಮಾಲೀಕರಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದರು. ಪಶುಸಂಗೋಪನಾ ಇಲಾಖೆ ಅಧಿಕಾರಿಗಳ ಸಲಹೆಯಂತೆ, ಈ ವಿಶೇಷ ಎಮ್ಮೆಯು ಇನ್ನೂ ಕಿರಿಯ ವಯಸ್ಸಿನದ್ದಾಗಿದ್ದು, ಇನ್ನು ಕೆಲವು ವರ್ಷಗಳ ಕಾಲ ಬದುಕಬಲ್ಲದು ಎಂದು ನಿರ್ಧರಿಸಿ ಅದನ್ನು ರಾಷ್ಟ್ರೀಯ ಮೃಗಾಲಯದಲ್ಲಿ ಸಂರಕ್ಷಿಸಲು ಸರ್ಕಾರ ತೀರ್ಮಾನಿಸಿದೆ. ಮೃಗಾಲಯದಲ್ಲಿ ಅದಕ್ಕಾಗಿ ಪ್ರತ್ಯೇಕ ಶೆಡ್ ಹಾಗೂ ವಿಶೇಷ ಕೇರ್ಟೇಕರ್ ವ್ಯವಸ್ಥೆಯನ್ನೂ ಮಾಡಲಾಗಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿದ ಎಮ್ಮೆಯ ಪ್ರಸ್ತುತ ಮಾಲೀಕ ಮೊನಿರುಝ್ ಜಮಾನ್, “ಮೂರು ದಿನಗಳ ಹಿಂದಷ್ಟೇ ನಾನು ಈ ಅಪರೂಪದ ಎಮ್ಮೆಯನ್ನು ಖರೀದಿ ಮಾಡಿದ್ದೆ. ಇಂದು ಮಧ್ಯಾಹ್ನ ಪೊಲೀಸರು ಬಂದು ಇದನ್ನು ಸಂರಕ್ಷಿಸಲು ಸರ್ಕಾರ ನಿರ್ಧರಿಸಿದೆ ಎಂದು ತಿಳಿಸಿದರು. ನಮಗೆ ಯಾವುದೇ ಸಂಘರ್ಷ ಬೇಡವಾದ್ದರಿಂದ ಎಮ್ಮೆಯನ್ನು ಹಸ್ತಾಂತರಿಸಿದ್ದೇವೆ. ಇದರ ಬದಲಿಗೆ ಸರ್ಕಾರ ನಮಗೆ ಮತ್ತೊಂದು ಎಮ್ಮೆ, ಹಸು ಅಥವಾ ಗೂಳಿಯನ್ನು ನೀಡುವುದಾಗಿ ಭರವಸೆ ನೀಡಿದೆ” ಎಂದಿದ್ದಾರೆ.
ಎಮ್ಮೆಯ ಮಾಜಿ ಮಾಲೀಕರು ಮಾತನಾಡಿ, “ಸಾಮಾನ್ಯವಾಗಿ ಕಪ್ಪು ಚರ್ಮದ ಎಮ್ಮೆಗಳೇ ಹೆಚ್ಚಾಗಿರುತ್ತವೆ, ಬಿಳಿ ಎಮ್ಮೆಗಳು ಅತ್ಯಂತ ಅಪರೂಪ. ಈ ಎಮ್ಮೆಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಕೂದಲಿನ ಮಾದರಿಯನ್ನು ಹೋಲುವ ಅಪರೂಪದ ಹೊಂಬಣ್ಣದ ಕೂದಲಿತ್ತು. ಇದೇ ಕಾರಣಕ್ಕೆ ನನ್ನ ಸಹೋದರ ಇದಕ್ಕೆ ‘ಡೊನಾಲ್ಡ್ ಟ್ರಂಪ್’ ಎಂದು ಹೆಸರಿಟ್ಟಿದ್ದ” ಎಂದು ನೆನಪಿಸಿಕೊಂಡಿದ್ದಾರೆ.
ದಿನಕ್ಕೆ ನಾಲ್ಕು ಬಾರಿ ಸ್ನಾನ, ಅತ್ಯುತ್ತಮ ಆಹಾರ ನೀಡಿ ವಿಶೇಷ ಕಾಳಜಿಯಿಂದ ಸಾಕಲಾಗುತ್ತಿದ್ದ ಈ ಎಮ್ಮೆಯ ವಿಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ವೈರಲ್ ಆಗಿ ಜನರನ್ನು ಆಕರ್ಷಿಸಿದ್ದವು. ಬಾಂಗ್ಲಾದೇಶದಲ್ಲಿ ಈದ್ ಹಬ್ಬದ ವೇಳೆ ಮೇಕೆ, ಕುರಿ, ಹಸು ಮತ್ತು ಎಮ್ಮೆಗಳು ಸೇರಿದಂತೆ 1.2 ಕೋಟಿಗೂ ಹೆಚ್ಚು ಪ್ರಾಣಿಗಳನ್ನು ಬಲಿ ನೀಡಲಾಗುತ್ತದೆ ಎಂದು ಪಶುಸಂಗೋಪನಾ ಅಧಿಕಾರಿಗಳು ಅಂದಾಜಿಸಿದ್ದಾರೆ. ಆದರೆ ಈ ಕೋಟ್ಯಂತರ ಪ್ರಾಣಿಗಳ ನಡುವೆ ‘ಡೊನಾಲ್ಡ್ ಟ್ರಂಪ್’ ಮಾತ್ರ ಸರ್ಕಾರದ ಮಧ್ಯಪ್ರವೇಶದಿಂದಾಗಿ ಬದುಕಿ ಉಳಿದು ಮೃಗಾಲಯದ ಆಕರ್ಷಣೆಯಾಗಲು ಸಜ್ಜಾಗಿದೆ.